VOV4.Êđê - Ti krĭng dap kngư, ƀiădah êkei êdam Phạm Thế Hùng 25 thŭn, ti să Čư̆ Nĕ, kdriêk Krông Ƀuk, čar Dak Lak lŏ tŭ jing hŏng gru hmô rông kan Koi Japon. Ară anei mâo 3 anôk rông kan Koi prŏng dŭm pluh êbâo m2, ba prăk hrui wĭt êbeh 1 êklai prăk hlăm grăp thŭn.

Yăl dliê klei čô̆ kơ bruă mă, Phạm Thế Hùng, ti să Čư̆ Nĕ, kdriêk Krông Ƀŭk, leh bi ruê̆ klei hriăm gưl 3 hlăk thŭn 2015, hrô kơ bruă nao hriăm sang hră gưl prŏng, ñu hriăm bruă mkra êdeh leh anăn pŏk sang mkă êdeh ti sang ñu. Mâo klei khăp čiăng rông kan Koi Japon, êjai dŭm mmông wăn, ñu kreh mŭt hlăm internet dlăng kơ bruă rông kan, leh anăn ñu čhĭ hĕ êdeh p’phŭt ñu mă prăk blei kan mjeh wĭt rông. Kyua ka mâo klei thâo, 2 gưl kan tal êlâo djiê jih nguêč.

Amâo êdu ai, Hùng nao truh ti dŭm anôk rông kan ti ƀuôn prŏng Hồ Chí Minh, Đồng Nai…čiăng tui hriăm si ngă klei rông kan. Leh mâo klei thâo, ñu hlŏng mdei mtam bruă mkra êdeh, akâo kơ amĭ ama čan prăk knơ̆ng bruă ngăn prăk 120 êklăk duh bi liê kơ brŏng rông kan Koi. Gưl anei, kan đĭ hriê jăk leh anăn mboh nanao.

Ayŏng Phạm Thế Hùng brei thâo, čiăng rông tŭ jing kan Koi mta phŭn jing srăng mâo êa doh, dưm brŏng kơ dlông leh anăn mâo ƀăng brei angĭn mŭt, boh nik jing srăng gang mkhư̆ mmao ruă hlăm kan. Leh 3 thŭn čô̆ kơ bruă, ară anei ñu mâo leh 3 đang war rông kan hŏng ênhă 12.000 m² ti dŭm čar Dak Lak, Kon Tum leh anăn Lâm Đồng. “Ară anei sang kâo ba čhĭ nanao grăp mlan mơ̆ng 500kg truh kơ 1 tôn kan, mă hĕ jih prăk bi liê dôk hlăm brô 50 – 100 êklăk prăk hlăm sa mlan. Đăo tĭng hlăm hruê mmông kơ anăp, kâo srăng lŏ mkŏ mkra war tač, brŏng kan Koi hŏng klei siam, ngă sang mnăm kphê kan Koi čiăng kơ phung tuê hriê čuă dlăng, leh anăn tơdah diñu blei pô srăng mkra mjing mtam čiăng mđĭ hĭn prăk ba wĭt. Mkŏ mkra dŭm ênao êa rông kan, war tač.

Mơ̆ng klei tŭ jing pô, ară anei Phạm Thế Hùng dôk mkŏ mjing bruă mă kơ phung hđeh êdam êra hlăm alŭ wăl, mprăp klei ktrâo lač, đru kơ phung hđeh êdam êra čiăng hluê ngă msĕ pô. Nguyễn An Khánh, ti alŭ Kti 5, să Čư̆ Nĕ, kdriêk Krông Ƀŭk brei thâo. “Mă bruă hŏng ayŏng Hùng, ayŏng tla kơ hmei mơ̆ng 4 – 5 êklăk prăk hlăm sa mlan. Kâo dôk duh bi liê mkra brŏng, čuôr sang leh anăn kdrăp ksung êa… knhal jih mlan 4 anei srăng pŏk sang čhĭ kan Koi kâo pô. Kluôm ênoh prăk duh bi liê hlăm brô 100 êklăk prăk, kâo čan prăk amĭ ama hlăm brô 70 êklăk prăk, dŭm adôk čan prăk ayŏng Hùng, ayŏng amâo mă prăk mnga ôh. Tơdah lŏ kƀah ayŏng srăng lŏ đru brei mjeh kan leh anăn amlơ̆k kơ kan ƀơ̆ng, tla ƀrư̆ ƀrư̆ dưi mơh.

Hluê si ayŏng Võ Minh Cường, k’iăng khua kiă kriê êpul hgŭm phung hđeh êdam êra kdriêk Krông Ƀŭk, rông kan Koi jing mta bruă mrâo tĭ krĭng čư̆ čhiăng Lăn Dăp Kngư ƀiădah mâo leh klei tŭ jing, bruă anei đru mkŏ mjing boh kdrŭt dưi čô̆ kơ bruă mă hŏng klei mbruă kơ phung hđeh êdam êra alŭ wăl. “Êpul hgŭm phung hđeh êdam êra čô̆ kơ bruă kdriêk Krông Ƀŭk dôk mkŏ mjing lu klei bi hmô jăk amâodah dŭm anôk rông kan Koi mơ̆ng Phạm Thế Hùng đru brei. Hluê anăn, dưi đru mtô mjuăt klei mă bruă amâo mă bruă leh anăn ktrâo lač, tă êlan klei mă bruă kơ phung nao hgŭm. Mơ̆ng anăn, hmei dưi mkŏ mjing dŭm êpul bi mguôp prŏng hĭn hŏng dŭm mta bruă mrâo, mkŏ mjing bruă mă kơ hđeh êdam êra alŭ wăl, ăt msĕ hŏng prăk ba wĭt đru kơ gŏ sang phung mda asei.