Dŭm hruê anei, ti kdrăn lŏ prŏng hlăm dŭm ƀuôn hgŭm Čư̆ A Thai,  Phú Thiện, čar Gia Lai, mdiê să kñĭ leh msĕ si sa blah mñam prŏng liă lia. Đa đa kdrăn lŏ, ƀĭng lŏ hma mưn leh masin wiă hnưm. Kpă An (djuê ana Jarai) ti ƀuôn Ring Dap, ƀuôn hgŭm Čư̆ A Thai, nao čuă ti đang lŏ ƀuh mơak kyua amung mdiê ktrŏ boh. Ñu brei thâo mâo giăm 1,5 ha mdiê lŏ 2 yan, êa čŏng đoh mơ̆ng knơ̆ng kdơ̆ng êa Ayun Hạ, kyua anăn grăp thŭn mâo hlăm brô 20 ton mdiê. “Ară anei ngă mdiê lŏ ti krĭng anei, tơdah knŏng čiăng huă hlăm gŏ sang snăn êbeh lu leh. Leh tĭng yap ênoh bi liê msĕ si hbâo pruê̆, êa drao krih, ai mă bruă, wiă… adôk jing gŏ sang huă mnăm grăp thŭn.

Amâo djŏ knŏng djăp huă ôh ƀiădah lŏ pioh kơ thŭn êdei, leh anăn ba čhĭ thiăm čiăng mâo prăk. Êlâo dih, ngă pưk hma amâo mâo hơĭt. Bi ară anei, ngă mdiê lŏ kyua mâo knơ̆ng kdơ̆ng êa Ayun Hạ, mâo êa djăp krih, hnơ̆ng boh mnga lu hĭn. Mơ̆ng leh bi mlih pla mdiê lŏ, klei hdĭp mnuih ƀuôn sang djăp ênŭm.”

Hlăm kdrăn lŏ ti ƀuôn hgŭm Phú Thiện (čar Gia Lai) - anôk mâo anăn knăl “Braih Phú Thiện” hing ang, ênai masin ăt kwang nanao. Nay Keng (djuê ana Jarai), Khua thŭn Rbai, ƀuôn hgŭm Phú Thiện brei thâo, kyua mâo êa mơ̆ng knơ̆ng kdơ̆ng êa Ayun Hạ, mnuih ƀuôn sang lu jơr mnơ̆ng dhơ̆ng mkra mjing, mkŏ mjing dŭm krĭng pla mjing ana kbâo, hbei tao, hăt… Êlâo dih mnuih ƀuôn sang knŏng buh mdiê djăp huă, ară anei lŏ bi hgŭm hŏng anôk bruă duh mkra čiăng pla mjing mdiê jăk, mâo anăn knăl “Braih Phú Thiện” hing ang. “Mơ̆ng leh mâo knơ̆ng kdơ̆ng êa Ayun Hạ, bruă mkra mjing mnuih ƀuôn sang hlăm krĭng găl ênưih hĭn. Êa mơ̆ng knơ̆ng êa dưi đoh hlăm mnuôr mđoh êa truh ti kdrăn lŏ, kyua anăn mnuih ƀuôn sang găl buh pka, amâo lŏ jưh hlăm êa mơ̆ng adiê hjan msĕ si êlâo dih ôh. Grăp yan ăt rơ̆ng mâo djăp êa krih, mdiê đĭ kyar jăk, mboh lu, amâo lŏ kƀah msĕ si êlâo ôh. Mnuih ƀuôn sang amâo djŏ knŏng pla mdiê 2 yan ôh hlăm thŭn ƀiădah lŏ mâo klei yăl pŏk mlar ênhă, bi mguôp pla ana hăt, hbei tao čiăng mđĭ prăk hrui wĭt. Kyua anăn, klei hdĭp mnuih ƀuôn sang ƀrư̆ hruê hơĭt kjăp leh anăn đĭ kyar. Knơ̆ng kdơ̆ng êa Ayun hạ klă sĭt đru kơ mnuih ƀuôn sang klei mưng mkra mjing, mđĭ hnơ̆ng boh mnga, đru mđĭ kyar bruă duh mkra alŭ wăl.”

  Ayun Hạ jing sa hlăm dŭm knơ̆ng kdơ̆ng êa prŏng ti alŭ wăl Lăn Dap Kngư, duh êa krih kơ êbeh 13.500h ha ana pla mjing dŭm mta, hlăm anăn lu jing mdiê lŏ. Mbĭt hŏng mjeh mdiê mrâo, yua klei kreh knhâo mrâo mrang hdră mnêč, hlăm dŭm thŭn êgao êa krih mơ̆ng knơ̆ng kdơ̆ng êa Ayun Hạ đru mđĭ hnơ̆ng mdiê ti dŭm ƀuôn hgŭm Phú Thiện, Ayun Pa, Chư A Thai đĭ truh 8 ton/ha, mâo anôk truh 10 ton/ha. Phạm Văn Lượng, êlâo dih jing Khua dlăng bruă Đảng kdriêk Phú Thiện, ară anei jing K’iăng Khua dlăng bruă Đảng - Khua Knơ̆ng bruă sang čư̆ êa să Čư̆ A Thai, čar Gia Lai, brei thâo mdiê jing ana pla mjing phŭn ti alŭ wăl. Hlue ngă Hdră mtrŭn mơ̆ng bruă Đảng kdriêk (êlâo dih) kơ klei mđĭ ba yua klei kreh knhâo - kdrăp mrâo hlăm bruă mkra mjing, mđing kơ klei mkŏ mjing anăn knăl “Braih Phú Thiện”, grăp thŭn alŭ wăl mđing prăk bi liê đru kơ ƀĭng lŏ hma, boh nik mnuih djuê ƀiă pŏk mlar ênhă kdrăn lŏ prŏng. Knơ̆ng kdơ̆ng êa Ayun Hạ ăt đru kơ mnuih ƀuôn sang bi mlih klă klơ̆ng mơ̆ng klei mĭn mkra mjing; boh nik jing mnuih djuê ƀiă bi mlih mơ̆ng bruă pla mjing knang kơ adiê hjan jing pla mjing thơ̆ng tŭ dưn. “Mđĭ lar tŭ dưn mơ̆ng  Knơ̆ng kdơ̆ng êa Ayun Hạ, mâo phŭn êa krih čiăng mđĭ kyar bruă duh mkra, mnuih ƀuôn sang kƀĭn bi mlih dŭm gru hmô bruă duh mkra, Hŏng alŭ wăl kdriêk Phú Thiện êlâo dih snăn mnuih ƀuôn sang hlue ngă gru hmô bi hgŭm mdiê lŏ ba klei tŭ dưn lu. Mơ̆ng anăn, mnuih ƀuôn sang hơĭt klei hdĭp mda, boh nik mnuih Jarai ba leh lu mjeh mdiê mâo hnơ̆ng boh mnga leh anăn ênoh yuôm.”

Dŭm kdrăn lŏ mdiê ksă hruê anei ba klei mơak djŏ yan boh mnga kơ mnuih ƀuôn sang ti krĭng wăl dŭm boh ƀuôn hgŭm Čư̆ A Thai, Phú Thiện, Ayun Pa (čar Gia Lai) bi êdah klă klei tŭ dưn mơ̆ng knơ̆ng kdơ̆ng êa Ayun Hạ. Mơ̆ng anôk mkra mjing amâo hơĭt, knang kơ adiê hjan, mnuih ƀuôn sang tinei pral pla 2 yan mdiê hơĭt kjăp, bi mguôp mđĭ kyar thiăm lu mta ana pla mjing mkăn, grăp knhuang mđĭ prăk hrui wĭt, gĭr ktưn kpưn đĭ kơ mdrŏng. Klei tŭ jing anăn ăt brei ƀuh klei yuôm bhăn mơ̆ng bruă yua klei kreh knhâo - kdrăp mrâo leh anăn ba yua tŭ dưn dŭm knơ̆ng kdơ̆ng êa hlăm klei mđĭ kyar bruă lŏ hma kjăp ti krĭng Lăn Dap Kngư.