VOV4.Êđê- Tlam hrue 7/6, ti tač êdeh phiơr prŏng Nội Bài, knơ̆ng bruă Pacific Foods klă klơ̆ng mâo čhĭ leh ênoh boh vải thiều Thanh Hà, Hải Dương tal êlâo kơ Ơrôp tui si klei kuôl kă bruă bi mnia mblei êngiê plah wah Việt Nam hŏng EU (EVFTA). Hlăm hrue kăm kơ anăp ênoh boh vải thiều Lục Ngạn, Bắc Giang ăt srăng mâo ba čhĭ mơh truh kơ 27 boh ala čar anăn.Ti knăm pŏk klei čhĭ mnia anei, Vũ Bá Phú, Khua anôk bruă bi mnia mblei mơ̆ng Phŭn bruă mnia mblei brei thâo, khădah hmăi amâo mâo jăk mơ̆ng klei ruă tưp covid 19, ƀiădah phŭn bruă mâo leh klei bi mguôp hŏng Phŭn bruă lŏ hma ngă leh lu bruă mơ̆ng yan thŭn 2021 pioh duah anôk mnia mblei hlăm ala čar, lehanăn čhĭ kơ ala tač êngao. Ară anei dŭm pluh tôn boh vải thiều mơ̆ng dua čar Hải Dương lehanăn Bắc Giang mâo leh hlăm knưng mnơ̆ng čhĭ mnia dŭm anôk čhĭ mnia ti Nhật Bản, Singapore. Lehanăn hlăm dŭm hrue kơ anăp srăng ba čhĭ truh kơ dŭm ala čar hlăm EU, jing anôk mâo truh 430 êklăk čô mnuih. Boh tŭ dưn anei mâo mơ̆ng dŭm klei gĭr tui duah, anôk bi mnia mblei mơ̆ng yan boh vải thŭn 2021./.

Pô mblang: Y-Khem Niê