VOV4.Êđê- Hruê 12/8, Anôk bruă sang čư̆ êa čar Dak Lak hưn mthâo leh hdră kčah hrui blei 2 mta boh kroh phŭn mŏng čar jing boh durian lehanăn boh ƀơr hŏng hnơ̆ng mâo hlăm brô 150 êbâo ton. Hdră kčah anei mâo čih mkra hlăk klei ruă Covid 19 dưi ksiêm dlăng kjăp lehanăn klei ruă Covid 19 dleh dưi ksiêm dlăng, bruă ba čhĭ kơ ala tač êngao tuôm hŏng klei dleh dlan. Hluê si hdră kčah, Anôk bruă sang čư̆ êa čar Dak Lak tĭng, tơdah klei ruă Covid 19 dôk hlăm hnơ̆ng dưi ksiêm dlăng msĕ si ară anei snăn alŭ wăl srăng krơ̆ng kjăp hnơ̆ng ba čhĭ boh durian kơ ala tač êngao mâo 70%, bi knar 72 êbâo ton; 30% hnơ̆ng adôk dưi hrui blei hlăm ala čar.

Hŏng boh ƀơr, mta kñăm hlăm brô 80%, bi knar 32 êbâo ton hrui blei hlăm ala čar, ênoh adôk ba čhĭ kơ ala tač êngao. Hdră kčah tal 2 jing klei ruă Covid 19 dleh ksiêm dlăng, čar srăng mđing đru kơ mnuih ƀuôn sang čhĭ boh durian, boh ƀơr. Mta kñăm ba čhĭ boh durian kơ ala tač êngao hrŏ adôk 50% lehanăn boh ƀơr 10%. Truh ară anei, boh durian mjeh Dona, mjeh ba wĭt boh tŭ bruă duh mkra phŭn  dôk mŭt hlăm yan hrui êmiêt boh, ênoh čhĭ ti đang war gŭ 45 êbâo prăk/kg, hrŏ êbeh 20% mkă hŏng thŭn êlâo./.

Pô mblang: H’Nêč Êñuôl