VOV4.Êđê- Ti anăp klei đĭ lar mơ̆ng klei ruă bi bŏk gŭ klĭt êmô, kbao; čar Dak Lak dôk pŏk ngă pral hdră tlŏ vaccine kñăm gang mkhư̆ klei ruă anei, bi hrŏ klei luič liê kơ mnuih rông mnơ̆ng ti alŭ wăl.

Lê Văn Chín, khua kiă kriê anôk bruă rông mnơ̆ng lehanăn mdrao mgŭn kơ mnơ̆ng rông kdriêk Čư̆ Kuiñ čar Dak Lak brei thâo, klei ruă bi bŏk ti gŭ klĭt hlăm êmô kbao mâo hlăm alŭ wăl mơ̆ng hruê 8/6 ti să Ea Ning tưp lar hmar truh leh kơ dŭm să mkăn hlăm kdriêk. Truh kơ ară anei, klei ruă anei mâo leh hlăm 19 alŭ, ƀuôn ti 8 să hŏng giăm 50 drei êmô, kbao mâo klei ruă, hlăm anăn čuh bi rai leh 42 drei. ti anăp klei dleh dưi ksiêm dlăng mơ̆ng klei ruă tưp anei, ti krah wah mlan 6 bruă sang čư̆ êa kdriêk Čư̆ Kuiñ bi êdah leh klei ruă tưp hlăm alŭ wăl lehanăn mkăp prăk hŏng ênoh 700 êklăk prăk čiăng blei vaccine lehanăn êa drao mdjiê kman. Mkŏ mjing bruă nao tlŏ mgang vaccine hlăm dŭm anôk mâo klei ruă. Lê Văn Chín lač:

  “Anôk bruă srăng mkŏ mjing nao mdjiê kman hlăm dŭm anôk êmô kbao mâo klei ruă tưp. anei jing klei ruă tưp mrâo, kyuanăn yơh čiăng hâo hưn kơ mnuih ƀuôn sang, mtrŭt mjhar mnuih ƀuôn sang čuh bi rai hĕ dŭm drei êmô kbao mâo klei ruă, lehanăn mâo hdră đru mơ̆ng knŭk kna msĕ hŏng hdră mtrŭn mrô 2 kơ mnuih ƀuôn sang. Mbĭt anăn lŏ đru bruă sang čư̆ êa alŭ wăl kơ vaccine, êa drao mdjiê kman hlăm dŭm anôk mâo klei ruă tưp.”

Knuă druh mă mta ksiêm mkă hlăm êpul êmô đing djŏ klei ruă

Yap truh kơ krah mlan 7, klei ruă bi bŏk ti gŭ klĭt hlăm êmô, kbao mâo leh truh kơ 76 gŏ sang hlăm 9 kdriêk ti čar Dak lak.  Ênoh êmô kbao mâo klei ruă jih jang truh 135 drei, hlăm anăn ba bi rai truh 69 drei, hŏng boh ktrŏ giăm 12 tôn mkrah. Mbĭt hŏng kdriêk Čư̆ Kuiñ bi êdah leh mâo klei ruă tưp anei, klei ruă tưp anei ti kdiêk Krông Pač ăt dleh dưi ksiêm dlăng hŏng ênoh êbeh 60 drei êmô mâo klei ruă lehanăn čuh bi rai leh 17 drei. Khădah ka hưn mdah ôh mâo klei ruă, ƀiădah kdriêk Krông Pač bi liê leh ngăn prăk čiăng mprăp blei vaccine gang mkhư̆ kñăm ksiêm dlăng klei ruă tưp hlăm dŭm să.         

Hlăm 7 kdriêk adôk ti čar Dak Lak, klei ruă tưp mâo taih sa bĭt. Ti anăp klei anei, mâo lu gŏ sang bi mguôp, đru kơ dŭm čô mdrao mgŭn kơ mnơ̆ng rông nao tlŏ mgang. Dŭm đang war rông mnơ̆ng čŏng blei vaccine wĭt tlŏ kơ êmô kbao, amâo guôn ôh vaccine mơ̆ng klei đru. Nguyễn Quang Đức, khua êpul kiă kriê đang war rông mnơ̆ng lehanăn mdrao kơ mnơ̆ng rông kdriêk Čư M’Gar brei thâo, leh hlăm alŭ wăl kdriêk mâo klei ruă anei hlăm 5 gŏ sang, anôk bruă ngă leh klei čuh rai 3 drei êmô mâo klei ruă kjham lehanăn dŭm hdră êlan gang mkhư̆ klei ruă tưp.

“Hlăm kdriêk ară anei mâo hlăm brô 2.000 hnơ̆ng vaccine, dŭm hnơ̆ng vaccine anei mnuih ƀuôn sang čŏng blei. Čiăng dưi tlŏ mgang vaccine anei, pô rông srăng nao akâo hŏng knuă druh hlăm să čiăng ngă klei tlŏ mgang. Ti anăp, anôk bruă srăng hrăm mbĭt hŏng dŭm să, wăl krah ksiêm dlăng jăk klei ruă tưp, mtô kơ mnuih ƀuôn sang bruă mgaih msir. Tal 2 jing, čiăng gang mkhư̆ klei ruă tưp anei, čiăng mâo klei hyuă kjăp dŭm bruă kiă kriê, ksiêm dlăng. Dah ƀuh dŭm klei knăl mâo klei ruă tưp srăng mdrao mtam. Mbĭt anăn bi doh mta ruă lehanăn kman hlăm war rông.”

Ba êđai êmô mâo klei ruă nao čuh dơr

            Tui si Thủy Lệ Vũ, k’iăng khua kiă kriê anôk bruă rông mnơ̆ng lehanăn mdrao mgŭn kơ mnơ̆ng rông čar Dak Lak, truh kơ ară anei, hlăm čar ngă leh klei tlŏ mgang êbeh 40.000 hnơ̆ng vaccine klei ruă bi bŏk ti gŭ klĭt hlăm êmô kbao. Čiăng ngă klei găl kơ mnuih ƀuôn sang, anôk bruă blŭ hrăm leh hŏng dŭm anôk ba mkăp vaccine, mkăp êbeh 20.500 hnơ̆ng vaccine hlăm sang mnia mblei mơ̆ng anôk bruă. Mbĭt hŏng anăn, anôk bruă mâo leh klei đru kčĕ hŏng bruă sang čư̆ êa čar, čiăng bi liê ênoh prăk blei vaccine mkăp đru kơ mnuih ƀuôn sang rông êmô, kbao.

“Hmei nao akâo leh sa ênoh prăk mơ̆ng bruă sang čư̆ êa čar, srăng gĭr hlăm hruê mmông hmar hĭn srăng mâo prăk dưi blei vaccine đru kơ mnuih ƀuôn sang hlăm bruă tlŏ mgang kơ êmô kbao. Bruă tlŏ mgang anăn yơh jing klei bi klă dưi ksiêm dlăng klei ruă tưp đĭ lar, lehanăn jing bruă mdjiê kman, bi doh mtă ruă hlăm wăl hdĭp mda lehanăn răng kriê mnơ̆ng rông. Ară anei, mnuih ƀuôn sang mâo leh klei thâo săng, čŏng nao blei vaccine lehanăn tlŏ mgang kơ mnơ̆ng rông, kyua anăn yơh klei ruă tưp hlăm alŭ wăl čar jing dôk ti hnơ̆ng man dưn, mâo kjham msĕ hŏng dŭm čar krĭng dưr ôh.”

            Ăt tui si Thủy Lệ Vũ, ară anei jing dôk hlăm yan hjan, dŭm mta mnơ̆ng hdĭp mâo kman đĭ lar ktang. Kyua anăn yơh, êngao kơ bruă tlŏ mgang vaccine, pô rông mnơ̆ng srăng bi doh war rông mnơ̆ng pô, bi doh hĕ mta ruă ti war rông, mdjiê bi jih dŭm mta mnơ̆ng mâo klei ruă msĕ si ruê, kêč, juôp kriê dlăng jăk mnơ̆ng rông čiăng diñu mâo ai ktang bi mdrơ̆ng hŏng kman anei.

Pô mblang: Y-Ƀel Êban