VOV4.Êđê-  Dŭm thŭn giăm anei, teinan dưi yap jing mnơ̆ng pla phŭn ba wĭt boh tŭ bruă duh mkra kơ mnuih ƀuôn sang ti dŭm să krĭng taih kbưi Čư̆ Pui, Čư̆ Drăm lehanăn Yang Mao, kdriêk Krông Bông, čar Dak Lak. Hnư hrui wĭt mơ̆ng boh teinan đru leh kơ lu gŏ êsei tlaih kơ ƀun kpưn đĭ kơ mdrŏng. Khă snăn, hlăm yan thŭn anei, mnuih pla teinan ti krông Bông dôk tui duah anôk hrui blei boh teinan kơ krĭng anei.

Kyua djŏ guôp hŏng yan adiê, lăn ala, tei nan pla ti dŭm să Čŭ Drăm, Čŭ Pui leh anăn Yang Mao ( Krông Bông) mâo hnơ̆ng mơ̆ng 35 - 40 ton/ ha/ yan

Gưl pla tei nan thŭn anei, gŏ sang Trần Dương Sỹ, ti să čư̆ Drăm, kdriêk Krông Bông, čar Dak Lak pla mjing 4 ha tei nan. Jih jang boh tei nan truh leh hruê đăk ƀiădah gŏ sang ñu msĕ hŏng dôk dlông êlah pui, kyuadah ênoh čhĭ boh tei nan trŭn êlưih êdi, mnuih hriê blei jing ƀiă. Trần Dương Sỹ brei thâo, duh bi liê giăm 160 êklăk prăk blei hbâo brŭ, dŭm mnơ̆ng dhơ̆ng Sinh học, êa drao răng mgang klei hluă ƀơ̆ng mnơ̆ng mngă, mưn mnuih mă bruă… čiăng kơ war boh mâo mboh hĭn, ƀiădah ară anei dleh êdi kơ bruă čhĭ mnia, mâo klei hyưt srăng luič liê.

“Dŭm hruê mmông leh êgao, hlăm ƀrô krah mlan sang dưi čhĭ hŏng ênoh 20.000 prăk/boh. ƀiădah ară anei knŏng adôk 12.000-13.000 prăk/boh. Phung hiu blei lač srăng lŏ trŭn hĭn kyua mnuih ƀuôn sang đăk lu. Mnuih ƀuôn sang hlăm alŭ wăl hmăng hmưi srăng mâo drăp masin mkra mjing amâodah srăng mâo êpul bi mguôp čiăng hgŭm hŏng anôk mkăn dưi ba chĭ boh tei nan.”

Khădah anôk ba čhĭ tei nan ngă kơ mnuih pla mjing tei nan ti dŭm să ti kdriêk Krông Bông rŭng răng

Mâo djŏ knŏng hjăn gŏ sang Trần Dương Sỹ, lu gŏ sang pla tei nan ti să Čư̆ Pui, Čư̆ Drăm lehanăn Yang Mao, kdriêk Krông Bông ăt dôk lĕ hlăm klei dleh dlan kyua truh leh hruê đăk tei nan. Dŭm gưl êlâo, hŏng ênoh čhĭ tei nan mơ̆ng 19.000-20.000/boh hŏng boh ktrŏ mơ̆ng 2kg, ƀiădah ară anei knŏng adôk mă 10.000-12.000 prăk. êjai tei nan mâo lu boh lehanăn čhĭ yuôm mơh, hlăm sa ha dưi mâo prăk mnga truh kơ 50 êklăk prăk, kyuanăn lu gŏ sang dưi rŭ mdơ̆ng sang dôk siam. Bi kơ ară anei, ênoh čhĭ tei nan mtrŭn lu, prăk mnga ƀiă, lu gŏ sang pla tei nan dôk ti anăp klei luič prăk hơăi mang.

Aduôn Niê Thanh Trang - k’iăng khua bruă Đảng să Čư̆ Drăm, kdriêk krông Bông brei thâo, kluôm hlăm să mâo 300 gŏ sang pla tei nan, hlăm ƀrô 450 ha. Dôk ti anăp klei pla ana tei nan kreh tuôm “Lu boh luič ênoh čhi, mâo ênoh chĭ ƀiădah amâo mâo boh”, bruă sang čư̆ êa alŭ wăl ăt mâo lu hdră êlan čiăng đru kơ mnuih buôn sang pla mjing ƀiădah ka mâo ôh boh tŭ dưn:

“Ară anei, mnuih ƀuôn sang dôk đăk tei nan, kyuadah ka thâo bĭt ôh anôk ba chĭ, kyuanăn ênoh čhĭ boh tei nan jing êlưih êdi. Bruă Đảng nah gŭ mâo klei akâo kơ bruă Đảng gưl dlông hĭn srăng iêu mthưr kơ dŭm čô duh bi liê srăng rŭ mdơ̆ng sang mkra jing boh tei nan čiăng hrui blei boh tei nan mơ̆ng mnuih ƀuôn sang. Khădah, kơ ară anei ka dưi ngă ôh bruă anei.

Kluôm kdriêk Krông Bông mâo êbeh 550 ha pla ana tei nan, kñăm hlăm dŭm să, Čư̆ Pui, Čư Drăm, Yang Mao. Aduôn Trần Thị Len - khua êpul hgŭm bruă lŏ hma Čư̆ Drăm lač, ana tei nan anei jing djŏ hŏng lăn, yan adiê hlăm alŭ wăl. Hnơ̆ng boh mâo mơ̆ng 35-40 tôn boh/ha/yan pla. Boh tei nan ti nei mâo klei mmih, bâo mngưi, boh siam lehanăn msăt knar kñĭ ƀlĭp. Hnơ̆ng boh lehanăn hnơ̆ng jăk mơ̆ng ana tei nan ti Krông Bông dưi bi mklă leh mơ̆ng lu thŭn êgao, ƀiădah klei hyưt dôk na nao hŏng mnuih ƀuôn sang jing amâo thâo bĭt anôk ba chĭ boh tei nan.

Băng: “Ênhă lăn pla tei nan ti să Čư̆ Drăm ară anei truh kơ 450 ha. Ƀiădah ka thâo ôh anôk hrui blei boh tei nan kơ mnuih ƀuôn sang. Truh kơ ară anei ka mâo sa knơ̆ng bruă amâo dah anôk bruă hriê bi mklă bruă srăng hrui blei boh tei nan mơ̆ng mnuih ƀuôn sang. Klei hmăng mưi mơ̆ng dŭm čô mnuih hlăm êpul bi mguôp jing dưi mâo anôk hrui blei lehanăn dưi čhĭ boh tei nan. Kyuadah mnuih ƀuôn sang pla mjing boh tei nan jing suăi êdi.”

Pô mblang: Y-Khem Niê