VOV4.Êđê - Hruê 25/5, phung khua kiă kriê Knơ̆ng bruă Lŏ hma lehanăn mđĭ kyar krĭng ƀuôn sang čar Dak Nông brei thâo, êpul êya dôk pŏk ngă dŭm hdră msir mđĭ bruă kriê dlăng hnơ̆ng tŭ mjeh ana makka ti alŭ wăl čar. Hluê anăn, Knơ̆ng bruă Lŏ hma lehanăn mđĭ kyar krĭng ƀuôn sang čar kčah mtrŭn, dŭm anôk mkra mjing, čhĭ mjeh ana makka brei hưn mthâo klă hnơ̆ng čuăn ba yua djŏ si klei kčah mtrŭn. Hnơ̆ng čuăn ba yua mjeh makka ti alŭ wăl kdriêk amâo dưi dôk ti gŭ hĭn mkă hŏng hnơ̆ng čuăn ala čar. Dŭm êpul êya, mnuih brei hluê ngă kjăp klei kčah mtrŭn djŏ hdră bhiăn hlăm bruă pla mjing, čhĭ mjeh ana makka. Êlaoa kơ ba čhĭ mjeh ana makka, dŭm êpul êya, mnuih brei ba m’ĭt hră hưn mthâo kơ Knơ̆ng bruă Lŏ hma lehanăn mđĭ kyar krĭng ƀuôn sang čar Dak Nông kơ dŭm mta mâo: Anôk čhĭ, anăn pô čhĭ amâo dah pô bi ala djŏ hdră bhiăn, mrô đĭng blŭ./.

H Nêč pô mblang