VOV4.Êđê - Čar Dak Lak ară anei mâo 208 êbâo ha kphê hlăk dôk hlăm yan krih. Klei čiăng yua êa lu hlăk êjai phŭn mkăp êa hrŏ jing klei dleh dlan kơ phung pla kphê hlăm lu thŭn êgao. Khă snăn, hlăm yan không anei, dŭm hdră krih êa hŏng klei mkiêt mkriêm dưi ba yua lar ƀar đru mđĭ mlih leh boh klei, kphê dưi đĭ kyar jăk wăt hlăm wưng adiê không kƀah êa.

Triệu Văn Khang ti să Êa Mdroh, kdriêk Čư̆ Mgar mâo 2 ha kphê hlăk mboh brei thâo, truh ară anei, dŭm hnoh êa, ênao êa amâo dah knơ̆ng kdơ̆ng êa khuôt êa leh. Ƀiădah kyua hluê ngă jăk hdră krih êa mkiêt mkriêm, hŏng hnơ̆ng êa mơ̆ng dŭm kbăng êa ktir ƀiă mơh, gŏ sang ñu ăt rơ̆ng mâo djăp êa krih kơ mnơ̆ng pla đĭ jing “Krih êa gưl tal 2 anei, gŏ sang kâo yua êa mơ̆ng kbăng êa ktir. Êjai mmông krih kâo ba yua hdră krih êa mkiêt mkriêm hŏng hdră dôk gak răng ti hma mtam. Grăp blư̆ krih dlăng djăp leh, kâo dai đĭng kơ anôk mkăn amâo lui êa ling ngă liê êa ôh.

Ăt hluê ngă hdră krih êa mkiêt mkriêm, Phùng Văn Nhiên ti să Quảng Hiệp, kdriêk Čư̆ Mgar bi mlih mơ̆ng hdră krih msĕ yang đar jing hdră krih êa sui thưt kơ 3 ha kphê gŏ sang ñu. Nhiên brei thâo, duh bi liê hdră krih êa sui thưt khădah liê prăk kăk tal êlâo, ƀiădah mâo Knŭk kna mtrŭt mđĭ, đru, rơ̆ng kơ ana kphê đĭ jing jăk wăt hlăm adiê mđiă thu krô. “Krĭng sang kâo, grăp blư̆ truh akŏ yan bhang jih hnoh êa, êa nao khuôt jih. Kyua anăn, sang kâo kreh yua kbăng êa ktir krih kơ mnơ̆ng pla. Jih jang đang war sang kâo krih hluê hdră sui thưt s’aĭ, hdră anei mâo knŭk kna đru mkrah wah ênoh prăk duh bi liê. Tơdah krih kâo ăt dlăng mmông amâo krih êbeh êa ngă liê êa, snăn kơh kâo dưi krih djăp êa kơ mnơ̆ng pla truh kơ jih yan bhang.

Hluê si Nguyễn Thanh Long – Khua kiă kriê Knơ̆ng kdơ̆ng êa čar Dak Lak brei thâo, adiê mđiă thu krô sui hlăm yan bhang ngă kƀah êa krih kơ kphê, boh klei anei mâo nanao hlăm lu thŭn êgao ti alŭ wăl. Khă snăn, klei anei ƀrư̆ dưi bi mlih hŏng bruă mđĭ lar klei ba yua hdră krih êa mkiêt mkriêm. Anôk bruă sang čư̆ êa čar Dak Lak ăt mâo leh hdră đru klă sĭt čiăng kơ mnuih ƀuôn sang ênưih ba yua hdră krih êa mrâo: “Mơ̆ng akŏ yan bhang hmei mtă leh kơ mnuih ƀuôn sang brei ba yua êa mkiêt mkriêm ti dŭm hnoh êa, ênao êa mkăp kơ hdră krih kơ mnơ̆ng pla. Kơ hdră krih hmei ktrâo lač kơ mnuih ƀuôn sang krih êa mkiêt mkriêm, amâo ngă liê lu ôh. Pŏk hdră ba yua klei krih êa mrâo, hluê gru hmô krih êa mkiêt mkriêm. Bruă anei mâo Anôk bruă sang čư̆ êa čar đru 50% ênoh bi liê kơ mnuih ƀuôn sang tơdah gŏ sang bi mlih mơ̆ng hdră krih êa hđăp jing hdră krih êa mkiêt mkriêm hluê hdră krih sui thưt”./.