Jing leh sa klei mưng, grăp aguah, Y Tài ti să Quảng Phú, kdriêk Krông Knô, čar Dak Nông kreh mă đĭng mmuñ hmư̆ Hdră mđung asăp blŭ klei M’nông mơ̆ng Sang mđung asăp blŭ Việt Nam. Y Tài brei thâo, thŭn anei êbeh leh 80 thŭn, ƀiădah ñu mđing êdi kơ klei mâo hlăm ala čar lehanăn tar rŏng lăn hluê radio hŏng klei M’nông grăp hruê. Boh nik, Hdră anei lŏ mkăp lu klei thâo săng kơ hdră mnêč ngă bruă mrâo mrang lehanăn lu klei hlăp mbul hơ̆k mơak hŏng dŭm ênhiang mmuñ, klei yăl dliê đưm, đru kriê pioh dhar kreh jăk siam mơ̆ng djuê ana.

“Kâo hmư̆ klei M’nông mơ̆ng Sang mđung asăp blŭ Việt Nam mơ̆ng thŭn 2006 truh kơ ară anei, kaoa khăp êdi hmư̆ Hdră mđung Hrăm mbĭt hŏng ƀĭng ngă lŏ hma čiăng tui ksiêm kơ hdră mnêč dlăng kriê wiê ênăk dŭm mta mnơ̆ng pla, tal 2 jing kâo hmư̆ dŭm ênhiang mmuñ djuê ana M’nông pô, klei M’nông mơ̆ng Sang mđung asăp blŭ Việt Nam jăk êdi hmư̆, ênưih thâo săng, klei M’nông preh ti dŭm êpul mdê mdê mơ̆ng djuê ana M’nông jăk sơaĭ, hluê hŏng hdră anei kâo čang hmăng phung êdam êra ară anei gĭr hriăm mjuăt, mđĭ lar lehanăn kriê pioh knhuah dhar kreh mơ̆ng djuê ana pô, amâo dưi wơr bĭt ôh dŭm knhuah bhiăn jăk siam mơ̆ng djuê ana pô”.

Leh 18 thŭn mđung asăp, Hdră mđung asăp blŭ klei M’nông mơ̆ng Sang mđung asăp blŭ Việt Nam ƀrư̆ ƀrư̆ mkăp djŏ hŏng klei čiăng mơ̆ng ƀĭng hmư̆ hdră mđung. Phung mă bruă čih mkra, mđup asăp msĕ si Thị Đoắt, H’Thi Rya, Điểu Thân, Y Sưng amâo mdei mđĭ klei thâo kơ bruă. Amâo djŏ knŏng mblang, răk dŭm bruă klei mrâo, dŭm klei čih ti adŭ mă asăp, ƀiădah diñu lŏ nao truh ti dŭm krĭng ƀuôn sang Lăn dap kngư tui ksiêm, hiu čih klei mrâo, hưn lač kơ klei hdĭp mnuih ƀuôn sang. Ƀuh jih jang bruă ngă yuôm bhăn anăn, Y Cam- Kơiăng khua Anôk bruă sang čư̆ êa să Quảng Phú, kdriêk Krông Knô, čar Dak Nông tĭng dlăng:

“Klei M’nông mơ̆ng Sang mđung asăp blŭ Việt Nam jăk êdi hmư̆, ênưih thâo săng, hưn mthâo lu mta klei mnuih ƀuôn sang dôk čiăng mđing hmư̆, msĕ si Hdră mtrŭn mơ̆ng Đảng, Knŭk kna truh kơ mnuih ƀuôn sang, hưn mthâo kơ hdră mnêč ngă bruă lŏ hma, dlăng kriê kphê, tiêu… mnuih ƀuôn sang ăt mđing kơ dŭm klei mâo hlăm ala čar, hdră mđung ƀuh jăk găl êdi hŏng mnuih ƀuôn sang. Kâo čang hmăng hdră mđung klei M’nông srăng mâo lu mta mrâo, jăk hĭn, klă sĭt hĭn kơ mnuih ƀuôn sang.

Čiăng mkăp djŏ hŏng klei đĭ kyar mơ̆ng anôk bruă klei mrâo ênuk anei, mbĭt hŏng klei đĭ kyar mơ̆ng bruă hâo hưn yang ƀuôn, mbĭt hŏng hdră mđung asăp hlăm radio, mơ̆ng hruê 23/3/2024, Hdră mđung asăp blŭ klei M’nông mơ̆ng Sang mđung asăp blŭ Việt nam ba leh hlăm hla pŏk web yang ƀuôn Facebook hŏng Fanpage “Tiếng Mnông VOV Tây Nguyên”. Hŏng hdră ngă mrâo anei đru leh kơ lu mnuih thâo hĭn kơ Hdră mđung asăp blŭ klei M’nông mơ̆ng Sang mđung asăp blŭ Việt Nam. Sa čô găp kreh hmư̆ hdră mđung mâo nick name facebook là “Huế Xưa” brei thâo:

“Kâo thâo klei Bunong hluê “Fanpage tiếng Mnông Tây Nguyên”. Mơ̆ng Fanpage kâo ăt dưi hmư̆ dŭm hdră mđung mơ̆ng anôk bruă mđung asăp, hlăm hla pŏk web hŏng klei M’nông, phung hđeh ară anei yua lu hla pŏk web yang ƀuôn kyua anăn Fanpage anei jăk găl êdi hŏng phung hđeh mnuih M’nông khăp tui ksiêm kơ boh blŭ, dhar kreh pô. Mâo Fanpage jih jang yua klei blŭ M’nông anei jăk êdi. Kâo khăp snăk hmư̆ klei yăl dliê đưm, phung mbruă mmuñ ênhiang djuê ana… lehanăn dŭm klei hâo hưn mkăn hlăm Facebook hŏng klei M’nông, hưn klă mngač êdi.

Boh nik, pô mâo nick name “Songtheothoigian” bi êdah klei mơak hlăk dưi thâo fanpage “Tiếng Mnông VOV Tây Nguyên”, lehanăn kreh êmuh hrăm nanao hŏng ayŏng amai ngă hdră anei. Ñu čih mơĭt klei blŭ snei “ Kâo ƀuh hlăm Fanpage Tiếng Mnông mâo video clip amĭ kâo mmuñ ênhiang djuê ana, di ayŏng amai dôk mơh clip amĭ kâo mmuñ, lŏ mđung lu hĭn hŏ…”

“ Alum kkuh kơ ayŏng amai, anăn kâo Nam, thŭn anei 34 thŭn, ti să Quảng Trực, kâo hmư̆ hdră mđung klei M’nông hluê Fanpage “Tiếng Mnông VOV Tây Nguyên”, kâo ƀuh klei čih lehanăn rup jăk êdi dlăng, kâo ăt hưn mthâo sŭm klei čih anei kơ ƀĭng găp mkăn čiăng dưi bi lar klei blŭ djuê ana pô truh kơ phung êdam êra mkăn, ară anei grăp čô yua Facebook sơaĭ snăn hdră mđung anei guôp lehanăn găl êdi hŏng hlei pô amâo dưi hmư̆ hdră mđung hlăm radio”.

Fanpage “Tiếng Mnông VOV Tây Nguyên” Ară anei mâo giăm 1.500 čô tui ksiêm, grăp hruê Fanpage hưn mthâo nanao dŭm klei čih, klei mmuñ, klei mrâo, klei yăl dliê đưm, klei hlăp ngă mgưt.. hŏng klei M’nông mâo lu rup lehanăn file asăp blŭ găl êdi kơ mnuih hmư̆ lehanăn dlăng… Sa čô mâo nick name là “Tung Jôk” brei thâo:

“Fanpage tiếng Mnông VOV Tây Nguyên jăk êdi, kâo khăp êdi hmư̆ klei mrâo, ayŏng amai hưn mthâo mâo mbĭt hŏng rup lehanăn asăp blŭ, drei knŏng pŏk dlăng snăn hmư̆ yơh, găl êdi hŏng phung hđeh ênuk ară anei”

 Pluh sa păn thŭn êgao, Hdră mđung asăp blŭ klei M’nông mơ̆ng Sang mđung asăp blŭ Việt Nam, mâo Anôk bruă jưh dôk ti krĭng Lăn dap kngư hluê ngă, amâo mdei mkra mđĭ hnơ̆ng tŭ jăk lehanăn hdră mđung. Mbĭt hŏng hdră mđung asăp grăp hruê lehanăn hla pŏk web hâo hưn điện tử VOV4.M’nông, snăn Fanpage: “Tiếng Mnông VOV Tây Nguyên” jing “kdrông mkŏ” mơ̆ng Hdră mđung asăp blŭ klei M'nông, mkăp djŏ hŏng klei čiăng ƀrư̆ hruê ƀrư̆ đĭ mơ̆ng ƀĭng dlăng hdră mđung./.