Mdah dŭm klei mdêč čing kơ phung tue dlăng, lehanăn mdar fim, ma rup dŭm bruyă dhar kreh, lehanăn bi lar hlăm hla pŏk yang ƀuôn, Y Justin Adrơng, ti ƀuôn Kmrơ̆ng Prŏng A, să Ea Tu, ƀuôn prŏng Ƀuôn Ama Thuôt, hŏng klei mơak.  Y Justin lač:

 “Kâo mâo hiăm mdêč čing, lehanăn hrĭm klei mă rup, mdar fim čiăng hĭn  hưn mdah kơ čing čhar, klei anăn jing yuôm bhăn amâo mâo djŏ knŏng hjăn kơ kâo, ƀiădah kơ jih jang mnuih ƀuôn sang djăp djuê ana ti lăn dap kngư, dôk hlăm dhar kreh čing čhar msĕ. Mâo dŭm mta rup lehanăn dŭm klei thâo mă rŭp mdar fim, mơ̆ng anăn bi kriê pioh truh kơ jih jang mnuih”.

 Mơ̆ng rup čiăng yăl dliê kơ dhar kreh dŭm djuê ana, amâodah arăng pia Photo Voice, jing bruă mâo leh anôk bruă dhar kreh, mơ̆ng phŭn bruă dhar kreh, mjuăt asei mlei, hiu čhưn ênguê mkŏ mjing leh ti Daklak mơ̆ng knhal jih thŭn  2024 hŏng bruă bi mguôp dhar kreh čing čhar hŏng bruă hiu čhưn ênguê ti Ƀuôn Ama Thuôt – Daklak” phung hriăm lŏ hriăm bi mưng klei thâo mdêč čing, hriăm mơ̆ng ênưih hlŏng kơ dleh, hriăm bi raih klei thâo mdêč, lŏ tui hriăm mâo lu ênhiang tông mdê mdê mơ̆ng čing đưm anak Êđê,… Y - Bây Kƀuôr, ti ƀuôn Kmrơ̆ng Prŏng A, să Ea Tu, ƀuôn prŏng Ƀuôn Ama Thuôt lač:

 “Êlâo dih dŭm ênhiang mdêč knah mơ̆ng anak Ê Đê amâo tuôm mâo klei hriăm ƀhĭ klĭ msĕ si ară anei ôh. Hŏng dŭm boh adŭ mâo mjuăt bi hriăm, phung hđeh mâo klei thâo săng hĭn, lehanăn ƀuh klei yuôm bhăn mơ̆ng čing čhar mnuih lăn dap kngư, dưi thâo săng lehanăn mâo hriăm dŭm klei mdêč čing mơ̆ng aê ama pô êlâo”.

Bruă bi mguôp dhar kreh čing čhar hŏng bruă hiu čhưn ênguê jing bruă dôk hlăm hdră êlan mrô 06, hlăm hdră ala čar kñăm mđĭ kyar klei duh mkra ala ƀuôn krĭng mnuih djuê ƀiă, lehanăn čư̆ čhiăng wưng thŭn 2021-2030. Ti Daklak bruă anăn mâo mkŏ mjing leh ti dŭm boh ƀuôn hlăm să Ea Tu, ƀuôn prŏng Ƀuôn Ama Thuôt.

Knŏng sa mlan leh mâo mkŏ mjing, mâo leh truh 60 video, êbeh 100 pŏk rup mơ̆ng mnuih ƀuôn sang čŏng ngă, jing klei mă rup anăn lač djŏ kơ jih bruă ngă hlăm dhar kreh bŏ hŏng klei jĕ giăm. Lại Đức Đại, K’iăng khua knơ̆ng bruă dhar kreh, mjuăt asei mlei lehanăn hiu čhưn ênguê čar Daklak lač, hdră anei mâo leh klei tŭ dưn hŏng bruă bi kriê pioh, mđĭ lar knhuah gru dhar kreh čing čhar lăn dap kngư anăp đuĕ nao kơ bruă mđrĭng hŏng klei hiu čhưn ênguê hlăm yang ƀuôn.

 “Lŏ čuê dŭm klei tŭ jing mơ̆ng bruă bi hmô mâo ngă tal anei, mbĭt hŏng klei anôk bruă dhar kreh, hlăm phŭn bruă dhar kreh mđing uêñ, hlăm thŭn  2025, knơ̆ng bruă srăng gĭt gai dŭm adŭ bruă, djăp alŭ wăl lŏ dơ̆ng ngă dŭm klei bi hmô mkăn hlăm čar Daklak. Srăng mâo klei bi hgŭm kjăp hĭn, ngă djăp mta bruă hlăm sa blư̆, pŏk dŭm boh adŭ lŏ dơ̆ng čuê, mdrăm mbĭt hŏng phung knhăk, phung thâo hlăm bruă anei”.

Mbĭt hŏng Daklak, dŭm boh adŭ mjuăt bi hriăm ăt mâo mkŏ mjing ti dŭm boh čar Gia Lai, Kon Tum lehanăn Tây Ninh, hŏng dŭm djuê ana. Bruă mtô bi hriăm, mâo leh phung knhâo, phung mbruă hlăm yang ƀuôn mtô bi hriăm brei hŏng dŭm ênhiang mdêč knah, hlăm grăp ênhiang mkŏ mjing klei tông mdê mdê. Tui si nai prĭn Nguyễn Thị Thu Trang, Khua adŭ bruă kiă kriê knhuah gru dhar kreh amâo mâo êdah klă, anôk bruă knhuah gru, lač tơdah mâo mprăp klei thâo săng, mnuih ƀuôn sang lŏ mâo hĭn klei mưng, klei thâo ba yua knhuah gru dhar kreh pô pioh kơ bruă duah ƀơ̆ng, mđĭ kyar yang ƀuôn, bi kriê pioh knhuah gru pô.

 “Hlăm klei bi mguôp ƀuôn sang hŏng dŭm knhuah gru dhar kreh, klei bi mguôp dŭm gưl mnuih, lehanăn maoa klei ktrâo atăt kơ yang ƀuôn hŏng hdră Photo Voice jing ƀuôn sang čŏng kriê pioh klei blŭ pô, bruă pô ngă. Amâo lŏ mâo pô mkăn ôh, asei mnuih ƀuôn sang anak ÊĐê pô yơưh jing mnuih lŏ yăl dliê jih kơ dhar kreh anăn hŏng klei djŏ hĭn, ênŭm hĭn, jăk hĭn, lehanăn čŏng ksiêm duah, thâo săng, kriê pioh knhuah gru dhar kreh djuê ana pô, čiăng lŏ bi lar, djă pioh knhuah gru dhar kreh djuê ana pô”.

Amâo mâo djŏ knŏng mđĭ klei thâo săng kơ bruă kriê pioh lehanăn mđĭ bi lar knhuah gru dhar kreh čing čhar lăn dap kngư – dhar kreh amâo mâo êdah klă mơ̆ng anak mnuih, klei bi mguôp knhuah gru dhar kreh mđrĭng hŏng bruă hiu čhưn ênguê lŏ dơ̆ng klei kjăp hĭn kơ bruă dhar kreh čing čhar đĭ lar hlăm ênuk ară anei. Dưn yua jih klei găl kơ kdrăp mrâo mrang lehanăn hla pŏk yang ƀuôn, grăp čô mnuih brei thâo djă yua bi mguôp mjing ai hdĭp sĭt hlăm ƀuôn sang pô, mơ̆ng anăn lŏ bi lar knhuah gru dhar kreh mơ̆ng djăp djuê ana bi kriê pioh mdê mdê./.