Boh giêt jing sa mta mnơ̆ng dưi pla lu hlăm wăl sang lehanăn pưk hma mơ̆ng mnuih ƀuôn sang krĭng Lăn dap kngư. Dŭm mta mnơ̆ng mkra mơ̆ng boh giêt krô amâo djŏ jing mnơ̆ng yua aguah tlam mlam hruê đuič ôh ƀiădah lŏ siă suôr hŏng klei hdĭp, ai tiê klei mĭn mơ̆ng dŭm djuê ana lač kluôm hlăm anăn mâo mnuih djuê ana Êđê. Ti djiêu kpur pui gŏ sang, H’Luôn Arul, kreh iêu Aduôn Khương ti ƀuôn Jung, să Êa Ktur, čar Dak Lak brei thâo, čiăng dưi mâo boh giêt krô siam kreh sui dŭm mlan.

 “Êlâo adih, boh giêt dưi pla lu hlăm wăl sang, hlăm pưk hma. Boh mda tŭk knă djam, bi boh khua drei mă jih asăr hlăm lam, ba tram hlăm lŭ amâo dah dưm ti dlôn pra pui, lui sa wưng gơ̆ krô, gơ̆ thu. Ngă snăn, boh giêt srăng mâo êa mil jŭ, ƀlĭp, muôr amâo kĕ ƀơ̆ng ôh, siam snăk dlăng”.

Boh giêt krô dưi ba yua lu hlăm klei hdĭp mơ̆ng mnuih Êđê. Boh giêt krô yua dưm êa, dưm mjeh mnơ̆ng pla tơdah nao kơ pưk hma, ngă kbin hŭl điŏ…. Boh giêt krô ăt dưi yua čiăng mkra dŭm kdrăp tông ayŭ mơ̆ng djuê ana msĕ si đĭng năm, brô goong… Klei bi mguôp mơ̆ng boh giêt krô lehanăn dŭm mta mnơ̆ng mâo hlăm lăn adiê msĕ si kram, alê, hlĭn mjing leh dŭm kdrăp tông ayŭ mâo ênai kwang jăk êdi hmư̆. 

Mbĭt hŏng dŭm boh tŭ dưn ba yua grăp hruê, boh giêt krô lŏ dưi ba yua hlăm dŭm knăm mơak djuê ana, klei bhiăn yuôm bhăn mơ̆ng mnuih Êđê msĕ si ngă yang pian êa, akâo adiê jăk êa hlĭm hjan, yan ngă bruă djŏ bioh mnga, akâo klei suaih pral… Ayŏng Y -Tuel, Niê, kreh iêu Ama Kain, ti ƀuôn Alê B, ƀuôn hgŭm Êa Kao, čar Dak Lak brei thâo snei:

 “Hruê anei, khădah klei hdĭp mâo lu klei bi mlih, ƀiădah kâo mơak kyua lu krĭng ƀuôn sang ăt dôk djă pioh lehanăn hluê ngă dŭm klei bhiăn djuê ana mơ̆ng đưm. Lehanăn hlăm dŭm knăm dưi mkŏ mjing, kâo ƀuh boh giêt krô jing sa mta mnơ̆ng amâo dưi kƀah ôh ba myơr kơ Yang.

Khădah klei hdĭp ti dŭm krĭng ƀuôn sang Lăn dap kngư hruê anei mâo lu klei bi mlih, ƀiădah dŭm bh tŭ yuôm hlăm ai tiê klei mĭn mơ̆ng boh giêt krô ăt msĕ hđăp. Lu gŏ sang mnuih Êđê ăt rah pla, djă pioh asăr mjeh mơ̆ng ênuk anei truh kơ ênuk gưl êdei msĕ si sa mta asăr mjeh yuôm hin kñăm mtă mtăn lehanăn mjuăt bi hriăm čô anak kơ phŭn agha ana hruê̆ djuê ana pô jĕ giăm hŏng lăn adiê. Boh giêt krô jing leh sa mta mnơ̆ng mđup brei kơ tuê hiu čhưn ênguê mơ̆ng djăp krĭng truh ti lăn dap kngư bŏ hŏng angĭn lehanăn mđiă, bi êdah klei mpŭ thâo khăp kơ tuê mơ̆ng mnuih ƀuôn sang tinei./.