Ƀuh lu gru kruăk bi êdah năng ai mâo bruă mkra boh tâo siam ti Wăl ksiêm hriăm mnơ̆ng hđăp đưm Thác Hai. Anei jing mta phŭn dưi hưn mdah ti Klei bi kƀĭn hưn mthâo boh tŭ bruă tui ksiêm, kuai mă mnơ̆ng hđăp đưm Thác Hai tal 3 mâo Sang kriê pioh mnơ̆ng Dak Lak mkŏ mjing tlam (13/9). Wăl ksiêm hriăm mnơ̆ng hđăp đưm Thác Hai ti alŭ 6, să Ia Jlơi, kdriêk Êa Sup, čar Dak Lak, dưi ƀuh akŏ thŭn 2020. Sang kriê pioh mnơ̆ng Dak Lak bi hgŭm hŏng Sang kriê pioh kdrăp hƀuê ênuk ala čar kuai mă 2 blư̆ hlăm thŭn 2021 lehanăn 2022. Mơ̆ng anăn, maoa leh lu mta mnơ̆ng yuôm bhăn dưi ƀuh ti Lăn dap kngư, hlăm anăn mâo “Kdrăp ktir boh tâo Thác Hai” dưi tŭ yap jing mnơ̆ng yuôm ala čar mơ̆ng thŭn 2023.

Ksiêm dlăng kluôm brei ƀuh, knhuah gru Thác Hai mâo sui hŏng anei hlăm brô 4 êbâo thŭn truh kơ 2 êbâo thŭn êlâo, dôk sui êbeh 1 êbâo thŭn, êdei kơ ênuk gưl boh tâo mrâo truh kơ ênuk gưl mnơ̆ng msei hjei. Hlăm hdră kuai mă tal 3, mơ̆ng knhal jih mlan 6 truh kơ mlan 7 thŭn anei, knŏng klei ti sa anôk ƀăng mâo boh prŏng 20m2 mâo leh giăm 1.400 mta mnơ̆ng… Boh nik, gưl tal êlâo ƀuh lu mta mnơ̆ng bi msiam hŏng boh tâo mčah, đa dưi mkra siam, dŭm pŏk mčah, jing klei bi êdah kơ bruă mkra boh tâo siam tinei./.