Hlăm klei blŭ Chăm leh anăn đa đa klei blŭ dŭm djuê ana Lăn Dap Kngư, Chum jing Kčŭm, bi hmô kơ klei kah mbha leh anăn bi mguôp êpul êya. Hŏng mmông giăm 60 mnĭt, “Chum Show” yăl dliê kơ hdră anak mnuih lŏ tui duah phŭn agha klei khăp, klei hlao leh anăn klei mkŏ. Klei kdŏ mmuñ anei ngă kơ lu mnuih kdjăt êdu hŏng dŭm ênai leh anăn rup pô mưng hlăm aguah hlam, Mưng hŏng ênai čing, ênai hgơr, klei kdŏ djuê ana mơ̆ng êpyl êya mnuih Êđê, Raglai. Ka tuôm ƀuh kyua dưi kma mbĭt hŏng pui kƀŏng mngač, yuôt klei, yuôl čhiăm mrâo mrang.

Hŏng klei rang mdah xiếc yuôt klei, bi mguôp hŏng ênai mmuñ, klei kdŏ jăk siam, phung tuê dưi hdĭp hlăm ênhiăng hƀuê ênuk leh anăn ară anei, plah wah pô hŏng grăp čô, plah wah lăn leh anăn adiê. Nguyễn Hồng Quang, ti ƀuôn hgŭm Nha Trang, čar Khánh Hòa brei thâo:

 “Ênai mrâo mrang, pui mngač bi mguôp jăk êdi hŏng phung kdŏ mmuñ mkŏ mjing wăl siam êdi. Klei kdŏ mrâo mrang bi mguôp hŏng xiếc, ênhiang mmuñ knhuah gru djuê ana Chăm, dŭm djuê ana Lăn Dap Kngư ñŭ kma mbĭt hlăm wăl anei”.

Ngô Thanh Phương, Khua gĭt gai Chum Show brei thâo, phung ngă hdră čiăng mkŏ mjing wăl kdŏ mmuñ jăk, anôk phung kdŏ mmuñ leh anăn phung thâo mbruă bi mkŏ mjing. Grăp klei kdŏ mmuñ nao mbĭt hŏng ai tiê mơ̆ng mnuih ƀuôn sang Lăn Dap Kngư – Dhŭng Kwar krah, ƀiădah dưi yăl dliê ti anôk kdŏ mmuñ mrâo. Ba yua êlam dhar kreh dŭm djuê ana srăng đru kơ êpul êya thâo săng, kah mbha lu hĭn.

 “Klei hmei čiăng hưn hŏng phung hriê hŏng Chum Show dưi mkŏ, bi hlao, tui duah phŭn agha, asei mlei pô. Asei pô Chum hlăm klei blŭ đa đa mnuih djuê ƀiă jing kčŭm, anăn jing klei mkŏ, klei khăp leh anăn bi hlao, êjai ti nah êngao dih mâo klei truh yan adiê, angĭn êbŭ, klei bi blah”.

Leh bi mŭt mbĭt dŭm alŭ wăl Lăn Dap Kngư – Dhŭng kwar krah, hlăm wưng êgao dhar bruă hiu čhưn ênguê alŭ wăl anei đĭ kyar nanao. Hŏng Khánh Hoà, mta kñăm truh thŭn 2025 srăng drông hlăm brô 15 êklăk gưl čô tuê, hnư hrui wĭt êbeh 60 êbâo êklai prăk. bruă hiu čhưn ênguê lŏ dơ̆ng jing bruă phŭn mơ̆ng čar Khánh Hoà hlăm bruă duh mkra alŭ wăl, leh anăn nao mbĭt hŏng bruă hiu čhưn ênguê dhar kreh jing êlan nao čiăng êdi.

Dŭm hdră msĕ si Chum Show amâo djŏ knŏng bi lu jơr klei ktuê dlăng mơ̆ng phung tuê, ƀiădah lŏ mđĭ hĭn klei yuôm knhuah gru, mkŏ mjing klei bi ktưn. Trần Thị Kim Yến, khua kiă kriê sang kdŏ mmuñ Đó mñă klă, Khánh Hoà amâo djŏ knŏng mâo klei siam mơ̆ng dliê kmrơ̆ng, ƀiădah lŏ bŏ hŏng dhar kreh leh anăn klei mbruă, čiăng kơ grăp gưl nao jing sa anôk ktuê dlăng kluôm dhuôm.

 “Klei mĭn tal êlâo jing hdră bi mguôp knhuah siam lu djuê ana ti alŭ wăl. Phung tuê ala tač êngao ƀuh jăk êdi, khăp kơ bruă anei. Ƀiădah leh anăn mnuih Việt Nam drei ƀuh khăp leh anăn hriê lu hĭn. Diñu ƀuh msĕ aguah tlam leh anăn ƀuh klei jăk êdi./.