Leh lu blư̆ mdah ti ƀuôn prŏng Ƀuôn Ama Thuôt leh anăn dŭm kdriêk hlăm čar Dak Lak, mrâo anei, klei kưt mmuiñ ngă hlăp “Klei čang hmăng Dam Săn” dưi mdah ti anăp lu mnuih leh anăn phung khăp kơ klei kdŏ mmuiñ ƀuôn prŏng Hồ Chí Minh. Klei kưt mmuiñ ngă hlăp kyua pô čih mkra klei mmuiñ Nguyễn Cường čih mkra mơ̆ng klei khan Dam Săn djuê ana Êđê, yăl dliê kơ pô jhŏng ktang Dam Săn hŏng klei čang hmăng mkŏ mkra krĭng ƀuôn sang leh anăn răng mgang djuê ana jhŏng ktang. Dam săn dưi bi mlih klei mĭn Hbia Yang Hruê, ba klei mngač kơ ƀuôn sang, kuč mngač klei khăp leh anăn ai ktang mrâo ti krĭng čư̆ čhiăng Lăn Dap Kngư liă lia. Lưu Thị Hoa, ti ƀuôn prŏng

Hồ Chí Minh brei thâo: “Gưl tal êlâo kâo dlăng klei kưt mmuiñ ngă hlăp Klei čang hmăng Dam Săn, kâo ƀuh jăk snăk. Kâo tuôm dlăng leh lu klei mmuiñ Cải lương, klei mmuiñ ngă hlăp ƀiădah ka ƀuh ôh sa klei kưt mmuiñ ngă hlăp jăk snăk msĕ snăn. Pô jhŏng ktang djuê ana Dam Săn mâo klei khăp, ai ktang jhŏng ktang leh anăn bi lar leh kluôm ala čar čiăng kơ grăp čô mnuih ƀuôn sang tui hlue.”

 Keli kưt mmuiñ ngă hlăp kyua phung hlăm Êpul kưt mmuiñ djuê ana Dak Lak mdah. Hlăm anăn, pô ngă mgưt Dam Săn jing Nghệ sĩ ưu tú Y Joel Knul leh anăn hbia H Nhí (mô̆ Dam Săn) kyua mô̆ ñu jing pô kưt mmuiñ H’Lueng ngă mgưt.

 Nghệ sĩ ưu tú Y Joel Knul yăl dliê, mơ̆ng điêt ñu hmư̆ leh aduôn aê mmuiñ khan leh anăn khăp snăk kơ pô jhŏng ktang Dam Săn kyua ai tiê jhŏng ktang, săn asei ƀuôn sang. Kyua anăn, tơdah hgŭm hlăm klei kưt mmuiñ ngă hlăp, ñu hơ̆k mơak leh anăn ktưn hưn. Grăp blư̆ mdah, wăt tơdah hriăm mjuăt, ñu mâo nanao klei mrâo mrang hlăm ai tiê. Msĕ si ênoh dhar kreh djuê ana mơ̆ng aduôn aê jiă kma hlăm asei mlei pô.

 “Kâo mgưt ngă Dam Săn, mâo lu anôk pô ƀuh mgei ai tiê, kyua pô hlai mbĭt hlăm klei hdĭp pô anăn, si klei pô anăn găn. Ƀuh klei săn asei anăñ, kdrêč yơr kngan ăt mgei ai tiê mơh, kdrêč H’Nhĭ kmiêk leh anăn kĕ kngan Dam Săn mgei ai tiê snăk, ƀuh luh êa ală. Rup anăn msĕ si ênưih ƀiădah amâo ênưih ôh, êlam snăk. Boh phŭn klei kưt mmuiñ ngă hlăp mơ̆ng pô čih mkra klei mmuiñ Nguyễn Cường lŏ čih mơ̆ng “Klei khan Dam Săn” jiă kma klei jăk siam lu snăk.”

Hluê si Nghệ sĩ ưu tú Y Joel Knul, tal êlâo pô mgưt ngă Dam Săn dưi jao kơ pô mkăn. Ƀiădah hlăm klei bi tuôm leh anăn lông ngă, pô čih mkra klei mmuiñ Nguyễn Cường bi mklă ruah ñu ngă. Hlăk jing pô kưt mmuiñ leh anăn gư̆ đĭng pĕ brô̆, tơdah lông ngă hlăm klei kưt mmuiñ ngă hlăp, ñu gĭr hriăm lu snăk. Kyua anăn, tơdah klei ngă hlăp kưt mmuiñ Klei čang hmăng Dam Săn dưi mdah leh anăn mâo mnuih ƀuôn sang khăp snăn anăn jing sa knhuang mrâo hlăm bruă knuă ñu.

 Hlăm giăm 25 thŭn kưt mmuiñ leh anăn 15 thŭn mă bruă hlăm Êpul kdŏ mmuiñ djuê ana Dak Lak, Nghệ sĩ ưu tú Y Joel Knul mâo leh lu klei tŭ jing, mâo lu mêdai, klei pah mni hlăm klei bi lông hlăm ala čar leh anăn ala tač êngao. Êdah êdi msĕ si Medai êa prăk thŭn 2019 leh anăn medai êa mah thŭn 2022 hlăm klei bi lông kưt mmuiñ ASEAN, medai êa kông klei kdŏ mmuiñ kluôm ala thŭn 2021… Amai H Su Yn Byă, ti ƀuôn prŏng Ƀuôn Ama Thuôt, čar Dak Lak brei thâo:

 “Nghệ sĩ ưu tú Y Joel ba leh klei kưt mmuiñ, ênhiang mmuiñ anak Êđê, ênhiang ñu mmuiñ mdê hjăn snăk, mâo lu mnuih thâo. Čang hmăng ñu dưi mâo lu klei kưt mmuiñ, klei mmuiñ jăk hĭn, mâo lu mnuih thâo hĭn”.

Nguyễn Thụy Phương Hiếu, K’iăng Khua Knơ̆ng bruă dhar kreh, mjuăt asei mlei leh anăn hiu čhưn ênguê brei thâo, nghệ sĩ Y Joel Knul mâo arăng mđup brei klei pah mni nghệ sĩ ưu tú mơ̆ng thŭn 2015, hlăk mrâo 40 thŭn, ară anei jing pô mda asei hĭn hlăm 4 čô nghệ sĩ ưu tú ti čar. Amâo djŏ knŏng mâo asăp mmuiñ siam, jiă kma Lăn Dap Kngư ôh, Nghệ sĩ ưu tú Y Joel Knul jih ai tiê, gĭr tui hriăm amâo mdei. Ară anei, nghệ sĩ Y Joel djăp leh klei găl, kyua anăn, Knơ̆ng bruă dôk bi leh hră mơar akâo kơ Knŭk kna mđup brei anăn knăl Nghệ sĩ Nhân dân.

 “Nghệ sĩ ưu tú Y Joel Knul ăt gĭr tui hriăm nanao hlăm klei kưt mmuiñ, hlăm jih jang bruă ngă mơ̆ng Êpul kdŏ mmuiñ čar, mbĭt hŏng Êpul mkŏ mjing sa êpul bi hgŭm leh anăn ƀrư̆ hruê đĭ kyar. Knơ̆ng bruă ăt mjing klei găl kơ Nghệ sĩ ưu tú Y Joel Knul dưi hriăm mjuăt čiăng mâo klei tŭ dưn hĭn, mbŏ klei găl dưi yap jing Nghệ sĩ Nhân dân”.

 Hŏng klei gĭr leh anăn klei kjăp hlăm bruă knuă, Nghệ sĩ ưu tú Y Joel Knul ngă leh leh anăn dôk mâo lu klei tŭ jing hlăm bruă kưt mmuiñ, mâo lu klei khăp mơ̆ng mnuih ƀuôn sang. Hŏng klei kưt mmuiñ, ñu dôk mâo lu hdră mĭn tĭng mrâo hlăm ênhiang mmuiñ Lăn dap Kngư, mjing sa mta klei kưt mmuiñ mrâo kơ mnuih ƀuôn sang.