Hlăm dŭm hrue knhal jih hrue kăm, A Huyền lŏ mtô kơ phung hđeh hlăm ƀuôn, hriăm brô̆  tơrưng, hriăm muiñ ênhiang djuê ana Xơ Đăng. Ñu lŏ mđrăm mbĭt hŏng pô mbruă Đinh Xuân Đề (pô thâo mmuiñ mơ̆ng êpul kdŏ muiñ čar Kon Tum hđăp) lŏ mtô, lŏ bi kơrŭ wĭt hdră kdŏ muiñ hŏng phung hđeh ti dŭm boh ƀuôn hgŭm , đru kơ phung hđeh kjăp ai tiê hlăm klei bi lông, lŏ mjhar êlah pui klei khăp hlăm ai tiê pô mbruă A Huyền, mtô truh kơ mnuih ƀuôn sang.

“Bruă mkra mjing, mdah tông kdrăp djuê ana pô, snăn găp djuê, mnuih ƀuôn sang, phung amuôn adei hlăm ƀuôn khăp sơăi. Amâo mâo djŏ knŏng hjăn mnuih ƀuôn sang djuê ana Xơ Đăng, ƀiădah wăt phung ayŏng adei mnuih djuê lar, ăt atăt phung anak pô tui nao hriăm tông čing, brô̆ tơrưng. Snăn găp djuê sa ai mbĭt hŏng kâo, kơ bruă lŏ mtô bi hriăm kdrăp pĕ tông djuê ana pô hŏng hđeh riêng gah, kñăm bi kriê pioh mđĭ bi lar knhuah gru pô dơ̆ng ram luič leh”.

Bi A Bliêt ti ƀuôn Kon wang, ƀuôn hgŭm Tân Tiến, Dak Lak tmkŏ mjing mtam dua êpul tông čing – êpul kdŏ muiñ ênhiang djuê ana pô kơ hđeh hriăm pioh mdah hlăm dŭm bruă prŏng msĕ si knăm mơak kphê Buôn Ma Thuột, Knăm mơak Boh durian krông Pač… ñu čih mkra, mkŏ mjing hdră mdah jăk msĕ si “Mnŭ kdjô̆”, “Ênai čing kwang hlăm ƀuôn sang kâo”, mâo mă leh klei pah mni ti anôk bi lông hlăm alŭ wăl. Dua čô anak ñu ăt lŏ čuê bruă răng kriê kdrăp djuê ana pô mbĭt hŏng găp djuê.

“Hlăm dua êpul tông čing, mâo 28 čô, hlăm anăn mâo dua čô anak ñu bi mguôp mbĭt. Ară anei anak prŏng dôk hriăm thŭn tal dua sang hră gưl krah Văn hoá Nghệ thuật Đăk Lăk, gơ̆ hriăm truăn kơ piano, mbĭt anăn lŏ hriăm dŭm kdrăp pĕ tông djuê ana pô.”

Leh mâo internet đĭ kyar, pô mbruă A Huyền lehanăn A Bliêt ăt thâo ba yua msĕ si Facebook, Zalo…, pioh bi lar klei pô khăp kơ kdrăp pĕ toong djuê ana pô hŏng hđeh gưl mrâo. Pô mbruă A Huyền brei thâo:

“Mta kñăm ba kdrăp pĕ tông djuê ana pô bi lar hlăm hla pŏk yang ƀuôn, čiăng kơ lu mnuih dưi thâo, kơ ênhiang kdrăp pĕ tông djuê ana mnuih djuê ƀiă lăn dap kngư. Kâo bŏ hŏng klei mơak, kyua klei tŭ dưn, mâo leh lu mnuih hmư̆, mâo lu like. Sĭt jing, čiăng kơ jih jang dŏ kâo thâo mkra leh dưi bi lar hlăm kdrăp pĕ tông pô truh hŏng jih jang mnuih mơ̆ng hla pŏk yang ƀuôn, snăn dôk mâo klei mĭn lŏ mprăp lu hĭng kdrăp mă bruă, pioh mdar rup, mă asăp, pioh bi lar.. lŏ mtrŭt mjhar phung hđeh, mtô bi hriăm diñu kdŏ muiñ, mơ̆ng clip snăn kơh mâo lu mnuih srăng dlăng. Bi wưng leh êgao, knŏng kreh mă rup, mdar rup tui si jing, lehanăn ayŏng adei duah mđung mă yơh hlăm hla pŏk yang ƀuôn. Mnuih mŭt dlăng lač jing jăk, snăn diñu sa ai hŏng pô mơh, asei mlei kâo pô ƀuh jing mơak mơh, leh mâo bi lar dŭm clip mơ̆ng pô duah mjing mă”.

Mâo klei mĭn ai tiê msĕ, čiăng ba rup mơ̆ng kdrăp pĕ tông djuê ana pô hlăm hla pŏk yang ƀuôn, A Bliêt lač:

“Kâo ăt ba leh dŭm mta rup klei tông tơ-rưng, tông čing, mnuih ênhiang djuê ana pô, wăt rup kdŏ čhuang… hlăm hla pŏk yang ƀuôn. Ƀiădah yua ară anei hmei ka djăp ôh kdrăp pioh mdar rup, lehanăn ka jăk dưi bi lar lu mơh hlăm hla pŏk yang ƀuôn. Kâo čang hmăng anăp anei, leh mâo čhiư̆ dŭm mta kdrăp pĕ tông kâo mkra, amâodah hiu mdah lu anôk mkăn srăng mâo djăp prăk pioh blei kdrăp mdar rup mă bruă jăk hĭn, kñăm kriê pioh dŭm klei tông muiñ jăk, dŭm klei kdŏ siam, klei kdŏ čhuang bi lar hlăm hla pŏk yang ƀuôn, hŏng mta kñăm čiăng hưn mdah dhar kreh djuê ana  Xơ Đăng truh hŏng jih jang mnuih lehanăn krĭng kwar.”