Mnuih djuê ana Sedang ti čar Kon Tum, mâo lu kdrăp tông ayŭ djuê ana, msĕ si: Brô̆ T’rưng, K’lông Pŭt, brô̆ êa, ki, hgơr, čing čhar. Brô̆ T’rưng, K’lông Pŭt jing 2 kdrăp juăt mưng leh mơ̆ng mnuih ƀuôn sang. Mnơ̆ng yua mkra kdrăp anei ăt mơ̆ng kram, alê, m’ô. Phan Văn Hoàng, K’iăng khua knơ̆ng bruă Dhar kreh, Mjuăt ktang asei mlei lehanăn Hiu čhưn ênguê čar Kon Tum brei thâo:

" Mơ̆ng klei nao mă bruă pưk bruă hma, mnuih ƀuôn sang čŏng pô mkra dŭm kdrăp anei hlăm klei hdĭp aguah tlam mlam hruê, K'lông Pŭt lu jing phung mniê ba yua. Diñu kreh hlăp mơ̆ng 2 truh kơ 3 čô. Bi čing čhar lu jing phung êkei. Tơdah mdah, mnuih ƀuôn sang kreh yua brô̆ T’rưng, Klông Pŭt mguôp mbĭt hŏng čing čhar lehanăn dŭm kdrăp tông ayŭ mkăn tông ayŭ mbĭt”.

Đĭng brô̆ T’rưng msĕ si klei brô̆ ghitar, jing mta yuôm bhăn čiăng bi mâo ênai. Grăp đĭng brô̆ mâo dua kdrêč jing êlan kbiă êwa lehanăn êlan đĭng hmư̆ ênai. Klei bi mguôp dua êlan anei mjing leh ênai kwang jăk êdi hmư̆. Brô̆ anei mâo dŭm đĭng đrao bi mguôp mbĭt hŏng sa aruăt klei điêt, kjăp. Čiăng mkra ênai kwang mơ̆ng grăp đĭng, pô mbruă brei thâo ngă mkra bi jăk mbah đĭng, leh kơnăn čŏng pô bi mklă ênai kwang kbiă mơ̆ng êlan đĭng anei.

Hlăk êjai anăn, Klông Pŭt dưi mkra mơ̆ng đĭng đrao lehanăn ênai kwang kbiă hriê mơ̆ng dŭm blư̆ drei tông ti mbah đĭng. Klông Pŭt kreh mâo mơ̆ng 7 – 10 đĭng tui hluê hŏng klei hlăp mơ̆ng mdê bi pô. Tơdah mdah, brô̆ anei dưi dưm ti dlông klŏ boh tâo amâo dah dưh ti djiêu ana kyâo, hŏng kiê kngan mbruă mơ̆ng phung mniê mnuih djuê ana Sedang, ênai Klông Pŭt hmư̆ kwang bŏ čư̆ dliê jăk êdi. Mnuih ƀuôn sang đăo knang, dŭm đĭng đrao čiăng tông Klông Pŭt siă suôr hŏng đĭng kjuk asăr mjeh ngă pưk hma mơ̆ng mnuih ƀuôn sang.

Diñu mâo klei mĭn dŭm đĭng dưm asăr mjeh anăn jing anôk dôk mơ̆ng mngăt mdiê. Kyua anăn, tơdah tông Klông Pŭt ti pưk hma srăng đru kơ ana mdiê đĭ jing, ngă bruă djŏ boh mnga, adiê jăk êa hlĭm hjan. Êngao anăn, ênai Klông Pŭt lŏ đru suôt hlông mnơ̆ng jhat lehanăn anei ăt jing sa mta mnơ̆ng bi êdah klei khăp êkei mniê. Pô mbruă êdah kdlưn Y Sinh, mnuih djuê ana Sedang ti čar Kon Tum, brei thâo:

"Lêñ Klông Pŭt brei mâo klei khap m’ai. Êlâo adih arăng dưi hlăp lêñ hlăm dŭm hruê. Si tô hmô, ƀuh mdiê čăt jing, mboh lu snăn mnuih ƀuôn sang srăng mkŏ mjing knăm m’ak ti Sang Roong, ba brô̆, mă čing ba tông. Bi brô̆ T’rưng arăng tông jih 2 kngan lehanăn tông hluê ênhiang čing mơh. Phung tuê hiu čhưn ênguê Japon, Dhŭng Korea, China kreh hriê dlăng.

Êngao brô̆ T’rưng, Klông Pŭt, mnuih djuê ana Sedang lŏ mâo brô̆ êa jăk êdi. Brô êa anei mâo lu đĭng đrao mâo hnơ̆ng đŭt dlông mdê mdê, dưi dưm ti hnoh êa. Êa đoh hlăm đĭng anei mjing ênai kwang jăk êdi hmư̆. Pô mbruă êdah kdlưn Y Sinh brei thâo:

"Brô̆ êa hin snăk, dleh mkra, knŏng mnuih khua thŭn kơh lŏ thâo mkra brô̆ anei. Đĭng điêt, đĭng đŭt, đĭng prŏng, đĭng dlông êa đoh hlăm lam đĭng mjing ênai kwang jăk hmư̆. Pô găn êa ƀuh brô̆ anei hdơr nanao yơh.  

Ti ya knăm m’ak, hdră bruă hlăm ƀuôn sang, leh kdrêč knăm ngă yang jing kdrêč knăm m’ak. Mmông anei, grăp čô bi kdŏ mmuñ mbĭt hŏng kdrăp tông ayŭ djuê ana. Anôk bruă dhar kreh čar Kon Tum dôk mđing kriê pioh, mđĭ lar knhuah dhar kreh djuê ana mơ̆ng đưm. Phan Văn Hoàng, K’iăng khua knơ̆ng bruă Dhar kreh,. Mjuăt ktang asei mlei lehanăn Hiu čhưn ênguê čar Kon Tum brei thâo:

"Anôk bruă Dhar kreh grăp thŭn mkŏ mjing nanao dŭm êpul phung mbruă nao mdah hlăm Hruê knhuah dhar kreh Việt Nam 23/11, dŭm hdră mâo Phŭn bruă Dhar kreh, Mjuăt ktamng asei mlei lehanăn Hiu čhưn ênguê mkŏ mjing. Anei jing wưng čiăng kơ mnuih ƀuôn sang dŭm djuê ana hưn mdah knhuah dhar kreh mơ̆ng pô. Mơ̆ng hdră mjĕ mjuk dhar kreh, diñu jing pô lŏ čuê kơ ênuk gưl hđeh thâo boh tŭ yuôm knhuah dhar kreh djuê ana pô.

Ară anei, dŭm ƀuôn sang ti čar Kon Tum mkŏ mjing leh lu êpul dhar kreh, kdŏ mmuñ. Mkăp kơ mnuih ƀuôn sang dlăng êjai, dŭm êpul kdŏ mmuñ, phung mbruă lŏ mtô hdră ngă, hdră tông ayŭ, hlăp dŭm kdrăp djuê ana kơ ênuk gưl hđeh, đru krơ̆ng kjăp knhuah dhar kreh djuê ana Sedang./.