Hlue si klei mĭn mnuih Jrai, leh djiê, mngăt ăt adôk jŭm dar găp djuê mơh, mnuih djiê hŏng mnuih hdĭp ăt mâo klei bi mguôp. Kyua anăn, grăp hruê mnuih hdĭp ăt nao ti msat găp djuê, kih mdoh leh anăn ba êsei huă êa mnăm kơ mnuih djiê. Leh sa wưng, bruă anei mdei tơdah arăng ngă knăm lui msat. Čiăng truă rup lăn lŭ hlăm knăm lui msat, msĕ si mngăt phung djiê, arăng mă lăn lŭ ƀhĭ, siam leh anăn mmia kluôm asei mlei.  Mmia hlăm asei mlei knư̆ jhat, knư̆ bi huĭ, msĕ hŏng ksơ̆k snăn knư̆ jăk. Hlăm knăm lui msat brei mâo ksơ̆k lăn lŭ. Amai Siu Thỏi, djuê ana Jrai hdĭp mda ti să Ia Mơ Nông, kdriêk Čư̆ Pap, čar Gia Lai, brei thâo:

"Hlue si klei bhiăn hdĭp mda mnuih Jrai tơdah ngă knăm lui msat brei mâo ksơ̆k lăn lŭ. Mă lăn lŭ mmia hlăm ƀô̆ mta jing ksơ̆k lăn lŭ.”

Mnuih Jrai lač phung Bram jing nphung ksơ̆k jăk, răng mgang kơ mnuih djiê mơ̆ng phung yang jhat ngă, amâodah jing mngăt phung djiê leh lŏ wĭt ti ƀuôn sang, hrăm mbĭt mơak hŏng ƀuôn sang riêng gah sang msat. Amai Rơ Châm H’Xuyết, djuê ana Jrai hdĭp ti să Ia Mơ Nông, kdriêk Čư̆ Pah, čar Gia Lai, brei thâo:

"Arăng truă rup ksơ̆k lăn lŭ tơdah ngă knăm lui msat. Tơdah ngă ksơ̆k lăn lŭ arăng mdăp hĕ ƀô̆ mta, mdăp hĕ anăn. Ƀô̆ mta jing ksơ̆k lăn lŭ mmia lăn hlăm ƀô̆ mta amâodah truă rup mkra hŏng ana mtei čiăng guôm hĕ ƀô̆ mta phung ngă ksơ̆k lăn lŭ. Ksơ̆k lăn lŭ bi hmô kơ mnuih djiê leh hŏng mnuih dôk hdĭp.”

Phung mâo ruah ngă Bram jing phung suaih prak, mâo kơhưm. Mmia bi thâo, čiăng kơ pô mkăn amâo thâo kral ôh pô, tơdah arăng thâo kral jing phung Bram amâo bi leh ôh bruă klam leh anăn ksơ̆k srăng mă.

 Amai Rơ Châm Hà, djuê ana Jrai, ti Ia Mơ Nông, kdriêk Čư̆ Pah, čar Gia Lai, brei thâo:

"Ksơ̆k lăn lŭ khăng mâo hlăm knăm lui msat amâo djŏ hlăm hruê aguah tlam ôh. Knŏng phung êkei ngă mgưt ksơ̆k lăn lŭ, phung mniê amâo dưi ngă ôh. Khăng mâo mnuih prŏng leh anăn hđeh điêt mgưt ksơ̆k lăn lŭ, hlue si klei čiăng, klei ruah mơ̆ng pô ngă knăm lui msat. Hlăk đưm mnuih mgưt ksơ̆k lăn lŭ brei kăm. Pô anăn brei jing mnuih mâo mô̆ djiê leh amâodah ka mâo mô̆ anak.”

Phung Bram mâo klei mpŭ, mâo êpul tông čing drông mơ̆ng mmia hlăm asei mlei truh kơ sang msat. Leh mgưt ngă ksơ̆k lăn lŭ ti wăl sang msat, phung Bram wĭt hlăm klei hdĭp aguah tlam. Phung ngă Bram hŏng mnuih ƀuôn sang huă mnăm, kdŏ mmuñ, blŭ tlao dria dria. Amai H’Uyên Niê, K’iăng Khua Êpul hgŭm phung mniê să Ia Mơ Nông, brei thâo:

"Bram mâo tơdah mkŏ mjing knăm lui msat, hruê aguah tlam amâo mâo ôh. Bram bi hmô kơ mngăt phung djiê, wĭt huă mnăm hlăm knăm mơak knhal tuč. Jing leh hruê anăn, arăng amâo lŏ ba êsei djam êa mnăm ti msat phung djiê ôh. Bram jing phung mnuih sĭt ƀiădah jing phung mngăt. Ksơ̆k lăn lŭ dưi bi blŭ hrăm, nao jŭm dar sang msat blŭ hrăm hŏng mnuih ƀuôn sang, găp djuê knhal tuč, leh anăn nao wĭt hŏng aduôn aê atâo atiêt”.

Mnuih Jrai lač mnuih djiê leh leh anăn mnuih hdĭp ăt mâo klei bi mguôp. Mgưt ngă Ksơ̆k lăn lŭ hlăm knăm lui msat, bi êdah ai tiê ênguôt hnĭng, mpŭ mơ̆ng mnuih hdĭp hŏng mnuih djiê. Arăng čang hmăng mngăt phung djiê răng mgang kơ phung dôk hdĭp suaih pral, ƀuôn sang mâo klei hdĭp jăk mơak, trei mđao./.