Ƀuôn knhuah gru djuê ana K’Ho, alŭ Klong Trao 1, să Di Linh, čar Lâm Đồng kdrưh kơăm mkŏ mjing knăm huă êsei mrâo djuê ana  K'ho S'rê. Anei jing sa hlăm dŭm knăm mơak prŏng dưi kơrŭ wĭt, mđĭ lar klei jăk siam dhar kreh djuê ana mơ̆ng alŭ wăl anei.

 Knăm mơak jiă kma klei đăo kơ phung yang, jing knhuah gru dhar kreh jăk siam. Hlue si wưng pla mjing mdiê, leh hrui êmiêt, mnuih ƀuôn sang Lăn Dap Kngư khăng mkŏ mjing klei bhiăn huă êsei mrâo. Knăm mơak čiăng bi mni kơ phung yang brei leh yan boh mnga jăk siam, klei hdĭp trei mđao, mbĭt anăn ăt jing gưl čiăng kơ mnuih ƀuôn sang brei yan boh mnga jăk siam, klei hdĭp trei mđao; mbĭt anăn ăt jing gưl mnuih ƀuôn sang hrăm mbĭt mơak mñai, dưn boh tŭ ai tiê mă bruă knuă, akâo kơ yan kơ anăp lŏ dơ̆ng trei mđao. Leh klei bhiăn riu yang, ngă yang myơr mnơ̆ng hdĭp, bi hmô klei bhiăn tlŏ kbao, jing kdrêč iêô phung yang mnăm kpiê, phung tue leh anăn mdah klei tông čing.

 Ƀuôn sang klă sĭt mŭt hlăm knăm mơak hŏng klei  mdêč čing, mmuñ ênhiang mmuñ djuê ana, kdŏ čhuang, hlai mbĭt hlăm ênai mmuñ, klei kdŏ jăk siam leh anăn mnâi kpiê ƀâo mngưi mơ̆ng Lăn Dap Kngư.

 Knăm mơak huă êsei mrâo kƀĭn lu phung mbruă, phung khua mduôn, phung mda asei mơ̆ng lu ƀuôn sang hŏng phung hlăm êpul tông čing. Adei Tâm Bộ Thùy, ti alŭ Klong Trao 1, mơak yăl dliê: Kâo dưi hgŭm mdah klei kdŏ hlăm gưl anei jing klei ktưn hưn. Anei jing boh kdrŭt kơ kâo lŏ dơ̆ng hriăm, đru mguôp răng mgang leh anăn mđĭ lar ênoh dhar kreh jăk siam djuê ana pô.

“Kâo ƀuh hơ̆k mơak êjai dưi nao hlăm klei tông čing hŏng ƀuôn sang. Jing sa čô anak hlăm ƀuôn sang čiăng kơ grăp čô thâo kơ knhuah gru mnuih K’Ho pô. Êdei anăp, pô ăt čiăng anak čô, ênuk êdei thâo kdŏ, thâo tông čing, djăp pioh knhuah gru djuê ana pô.

Mduôn K’Keo, ti alŭ Hàng Làng, ƀuôn hgŭm Di Linh brei thâo, dŭm thŭn êgao, Đảng leh anăn Knŭk kna mkŏ mjing klei găl đru kơ mnuih ƀuôn sang mkŏ wĭt bruă dhar kreh. Amâo djŏ knŏng ti ƀuôn sang, čĭng čhar dưi ba mtô hlăm sang hră mơar, leh anăn dŭm êpul bruă dhar kreh. Kyuanăn, ƀrư̆ mâo lu hĭn phung êdam êra nao hriăm tông čing. Hluê si mduôn K’Keo, bruă mkŏ mjing knăm mơak mdiê mrâo jing wưng kơ anak čô lŏ čuê, bi lar knhuah dhar kreh djuê ana.

“Anei jing knăm mơak kdrưh kơăm, jăk êdimi. Kâo pô jing mduôn ƀuôn, sa čô mâo kơhưm ti krĭng mnuih djuê ƀiă kyuanăn čiăng lŏ bi râo knhuah gru anei, čiăng kriê pioh kơ anak čô lŏ hriăm. Tơdah mâo klei găl hĭn, srăng krŭ wĭt čiăng lŏ dơ̆ng kriê pioh klei tông čing čar knhuah gru djuê ana pô, mbĭt hŏng êpul êya dŭm djuê ana ayŏng adei”.

Nao mbĭt hŏng bruă kriê pioh, bi lar knhuah dhar kreh mơ̆ng djuê ana, dŭm êpul bi hgŭm tông čing ti Di Linh, čar Lâm Đồng lŏ nao hgŭm rang mdah, đru kơ phung tuê. Anei jing sa bruă hiu čhưn ênguê mrâo, đru mtrŭt mđĭ bruă duh mkra ala ƀuôn mơ̆ng alŭ wăl đĭ kyar hŏng êlan hơĭt kjăp.

 Ƀuôn bruă djuê ana K'Ho ti alŭ Klong krao 1,să Di Linh, čar Lâm Đồng dưi ba yua hlăm mlan 9 thŭn dih, hŏng ênoh bi liê 12 êklai prăk. Anei jing hdră bruă êdah êdi, hlăm hdră bruă 6 (Hdră kñăm ala čar) kơ klei mđĭ lar ênoh yuôm dhar kreh djuê ana jăk siam mnuih djuê ƀiă mguôp hŏng mđĭ kyar hiu čhưn ênguê êpul êya hơĭt kjăp ti Lâm Đồng.

Ƀuôn sang mnuih djuê ana K’Ho (ti Klong Trao 1, ƀuôn hgŭm Di Linh, čar Lâm Đồng) hŏng 5 boh sang krum mâo rŭ mdơ̆ng hlăm sa wăl prŏng. Anei amâo mâo djŏ knŏng jing anôk bi mguôp kơ ƀuôn sang, mkŏ mjing dŭm knăm mơak djuê ana, ƀiădah lŏ jing anôk kriê pioh knhuah gru dhar kreh djuê ana K’Ho. Tinei jing anôk pioh wăt kơ phung tue hiu čhưn dhing.

Ti anei, mnuih ƀuôn sang mkŏ mjing leh leh knăm Ñô lir bong (Mơak huă êsei mrâo) mơ̆ng mnuih K’ Ho Sre. Khua mduôn K’Breo ti ƀuôn hgŭm Di Linh brei thâo knăm Ñô lir bong amâo mâo djŏ knŏng đru mnuih ƀuôn sang bi kriê pioh knhuah gru dhar, ƀiădah đru iêo jak lu tuê hriê čhưn.

Ƀuôn knhuah gru đưm mnuih K’Ho jing anôk lŏ dơ̆ng rŭ mdơ̆ng bi hmô kơ knhuah gru mơ̆ng đưm, mâo anôk bi mguôp, mkŏ mjing dŭm knhuah gru mâo leh mơ̆ng đưm mnuih K’Ho đưm, msĕ si dhar kreh čing čhar, klei ngă yang asei, ngă yang kơ mdiê, ngă yang huă êsei mrâo, jing sa hlăm dŭm knăm mơak prŏng, lehanăn mnuih K’Ho lŏ mâo klei ngă yang kbao čiăng bi jăk êa hlĭm hjan, djŏ boh mnga, ƀuôn sang mâo klei suaih pral, mnuih ƀuôn sang thâo bi mguôp. Anei jing dŭm dhar kreh đưm djuê ana K’Ho čang hmăng thâo bi kriê pioh, lŏ mtô bi hriăm kơ anak čô, gưl êdei”.

Ti ƀuôn dhar kreh djuê ana K’Ho mâo nanao phung mbruă, phung khua mduôn, mnuih dôk thâo djă pioh knhuah gru dhar kreh, đru kơ phung tue ksiêm duah klei thâo săng. Boh nik tinei, mâo êpul hgŭm tông čing čhar ƀuôn hgŭm Di Linh truh 14 čô bi mguôp, lu jing hlăk ai. Amai Tam Bộ Thơ (kkiêng thŭn 1990) – Khua êpul hgŭm brei thâo, mbĭt hŏng bruă ngă ti ƀuôn dhar kreh, êpul hgŭm kreh hiu mdah ti dŭm anôk hiu čhưn ênguê msĕ si ti drai Bồbla, drai Li Liang, anôk hiu čhưn ênguê ênao kdơ̆ng êa Kala… kñăm hưn mdah kơ knhuah gru dhar kreh djuê ana, jiă knhuah gru dhar kreh  K’Ho.

Phung dôk hlăm êpul hgŭm, êngao kơ bruă đru mguôp hlăm klei kriê pioh knhuah gru dhar kreh djuê ana, lŏ mâo dŭm klei jăk klei siam mơ̆ng dhar kreh čing čhar, kdŏ čhuang mơ̆ng djuê ana truh hŏng tue hiu čhưn ênguê, kñăm čiang lŏ mđĭ hĭn prăk mâo ba wĭt, đru mđĭ klei hdĭp êjai dŭm mmông wăn. Êngao kơ dŭm alŭ wăl hiu čhưn ênguê, dŭm anôk bi mkŏ mjing hlăm alŭ wăl dah thâo êpul hgŭm nao bi mguôp mbĭt, ară anei êpul hgŭm hmei lŏ hưn mthâo hŏng hla pŏk yang ƀuôn hlăm facebook, tiktok… hdră mă bruă anei đru leh kơ êpul hgŭm mâo lu phung tue thâo pral hĭn.

Ƀuôn hgŭm Di Linh, anôk mâo êlan dơ̆ng prŏng mrô 28 lehanăn êlan dơ̆ng prŏng mrô 20 găn nao, jing leh anôk mkŏ êlan klông plah wah Gia Nghiã truh kơ Phan Thiết, Đà Lạt truh kơ ƀuôn prŏng Hồ Chí Minh. tinei mâo dliê hngô, ênao mgơ̆ng êa, drai Li Liang… mbĭt hŏng knhuah gru djuê ana K’Ho, jing klei găl kơ bruă mđĭ kyar hiu čhưn ênguê lăn mnga êa mơak lehanăn dhar kreh. K’ Brợt - K'iăng khua kiă kriê ƀuôn dharkreh K’Ho, brei thâo. 

Mơ̆ng hrue bi leh bruă mkŏ mjing ƀuôn dhar kreh, mâo leh lu bruă ngă dưi mkŏ mjing, msĕ si klei bi trông bruă yuôm bhăn hlăm ƀuôn, drông lu tue hriê čhưn dlăng, kssiêm duah kơ dhar kreh mơ̆ng kwar yŭ, mơ̆ng alŭ wăl Di Linh. mâo leh 6 bog adŭ, wăt nai mtô klei blŭ K’Ho hrie čuă dlăng, ksiêm duah kơ kdrăp yua đưm, sang pưk đưm, bruă hrĭ mñam, bruă knă kpiê čeh, klei tăp mdiê... mơ̆ng mnuih K’Ho. Phung mbruă ktrâo atăt ƀhĭ klĭ hŏng phung hriê hriăm kơ dhar kreh djuê ana, pioh kơ klei čih hlăm bruă ksiêm hriăm. Wưng tinăp, hlăm mlan 10, ƀuôn dhar kreh srăng mkŏ mjing klei ngă yang mdiê (ñô wèr) jing sa knăm bruă lŏ hma mnuih K’Ho Sre, čiăng hưn mdah hŏng tue hlăm ala čar thâo kơ ƀuôn sang, lehanăn hriê ksiêm hriăm.

Ƀuôn dhar kreh mâo rŭ mdơ̆ng ti ƀuôn Klong Trao 1, ƀuôn hgŭm Di Linh, čar Lâm Đồng, jing anôk kriê pioh, lehanăn lŏ bi kơrŭ klei jăk siam mơ̆ng yang ƀuôn mnuih K’Ho Sre hlăm klei hdĭp ênuk ară anei. Mơ̆ng wăl hdĭp mda hlăm ƀuôn sang, hlŏng kơ djăp knăm mkŏ mjing mơ̆ng djuê ana, hlŏng truh kơ dŭm êpul tông čing mda asei bŏ hŏng klei hur har, jih jang hlăk dôk lŏ bi kơrŭ jih jang bruă dhar kreh, bi lar klei yuôm bhăn mơ̆ng dhar kreh djuê ana, lehanăn pŏk mlar hdră êlan kjăp kơ klei mđĭ kyar bruă hiu čhưn ênguê dhar kreh, mbĭt hŏng bruă kỉê pioh knhuah gru dhar kreh./.