Čiăng mprăp kơ klei bi lông, mơ̆ng êlâo anăn dŭm hruê kăm, dŭm êpul tông čing ti dŭm ƀuôn sang gĭr hriăm, lŏ bi hdơr klei tông čing mưng leh amâodah hriăm mbŏ, bi mrâo klei tông. Amai H Nhuen Mlô, ti ƀuôn Kŏ Siêr, ƀuôn hgŭm Tân Lập, ƀuôn prŏng Ƀuôn Ama Thuôt, čar Dak Lak brei thâo, ñu hŏng phung hlăm êpul tông čing mniê ƀuôn hgŭm Tân Lập hriăm jih sa mlan anei čiăng dưi tông riah 2 klei tông čing knah, čing kram bi mguôp hŏng kdŏ čhuang.

“Êlâo kơ nai mtô snăn hmei čŏng hriăm, dăp êpul. Leh nai hriê snăn knŏng kƀĭn ktrâo lač dŭm anôk ka kjăp, ka jăk đuč. Snăn hmei hriăm lu blư̆ êla raih kơh mdei. Phung amai adei hriăm tông čing anăn ăt hur har mơh, grăp čô gĭr jih ai tiê čiăng dưi bi êdah jăk hĭn”.

 Thŭn anei jing gưl tal 2 klei bi lông tông čing mâo čar Dak Lak mkŏ mjing. Mbĭt hŏng tông čing leh anăn kdrăp tông ayŭ djuê ana, hlăm klei bi lông lŏ mâo klei kưt mmuiñ, hưn mthâo kơ knăm ngă yang, klei bhiăn hdĭp mda djuê ana mguôp hŏng dhar kreh čing čhar Lăn Dap Kngư. Anei jing gưl čiăng kơ dŭm anôk bruă tui hriăm, bi trông klei thâo, bi êdah klei thâo, klei mbruă, mđĭ kyar dŭm mta klei kưt mmuñ leh anăn kdrăp tông ayŭ. Pô mbruă Y Phúc Êban, ti ƀuôn Ju, să Ea Tu, ƀuôn prŏng Ƀuôn Ama Thuôt, čar Dak Lak brei thâo:

“Ƀrư̆ ƀrư̆ tui hriăm djăp mta čiăng dưi thâo kluôm ênŭm hĭn. Klei bi lông jing čiăng bi lông ktưn, mjing klei hur har bi lông ktưn snăn jih ai tiê mơ̆ng grăp êpul srăng đĭ hĭn”

Klei bi lông thŭn anei mâo êbeh 500 čô mbruă, phung hgŭm hlăm klei bi lông mơ̆ng 13 kdriêk, wăl krah, sang hră Gưl prŏng Lăn Dap Kngư leh anăn dŭm sang hră gưl 3 mnuih djuê ƀiă hlăm čar nao hgŭm. Grăp anôk bruă ba klei kdŏ mmuñ jăk snăk mâo klei hgŭm mơ̆ng phung mbruă hlăm lu gưl thŭn, lŏ mkŏ wĭt sa kdrêč klei ngă yang, knăm mơak djuê ana mơ̆ng sa djuê ana, sa alŭ wăl. Amai H’Lâm H Mok, ti wăl krah Ƀuôn Trấp, kdriêk Krông Ana brei thâo:

“Hmei hơ̆k mơak tơdah hiê tinei dưi tui hriăm hŏng phung êpul găp hdră tông čing leh anăn dưi hriăm lu hĭn klei thâo mơ̆ng êpul găp ti ƀuôn mkăn hriê hlăm klei bi lông”.

Mơ̆ng 3 blư̆ mkŏ mjing, klei bi lông dhar kreh čing čhar mâo leh lu klei mlih mrâo. Hlăm anăn, bruă mkŏ mjing hdră kčah hŏng dŭm wưng klă klơ̆ng dưi pŏk ngă mơ̆ng hnưm anăn dŭm anôk bruă mâo lu mmông hriăm, ruah klei bi lông êdah êdi. Msĕ si ti ƀuôn prŏng Ƀuôn Ama Thuôt, Anôk bruă hâo hưn mtô mblang, dhar kreh leh anăn mjuăt ktang asei mlei ƀuôn prŏng mkŏ mjing leh Klei bi lông kdŏ mmuiñ jih jang mnuih ƀuôn sang čiăng ruah dŭm êpul phung mbruă êdah êdi leh anăn klei kdŏ mmuiñ jăk hĭn nao bi lông gưl čar. Phạm Thị Hải Bình, K’iăng Khua Anôk bruă brei thâo:

“Dŭm klei kdŏ mmuiñ mâo klei pah mni hlăm klei bi lông kdŏ mmuiñ srăng bao hlăm klei bi lông dhar kreh čing čhar mâo čar Dak Lak mkŏ mjing. Leh anăn hmei mĭn tĭng srăng mkŏ mjing mlam bi lông kdŏ mmuiñ čiăng kkuh drông bi hdơr 120 thŭn hruê mkŏ mjing čar Dak Lak, 120 thŭn Ƀuôn Ama Thuôt mkŏ mjing leh anăn mđĭ kyar, bi hdơr 80 thŭn hruê mkŏ mjing lĭng kahan yang ƀuôn Việt Nam, hlăm hdră kkuh drông bi hdơr 120 thŭn mkŏ mjing čar.”

Hlue si Lại Đức Đại, K’iăng Khua Knơ̆ng bruă dhar kreh, mjuăt asei mlei leh anăn hiu čhưn ênguê Dak Lak, klei mrâo mơ̆ng Klei bi lông thŭn anei jing bruă pŏk mlar anôk mkŏ mjing. Hrô kơ mkŏ mjing sa anôk ti Wăl krah dhar kreh čar snăn dŭm anôk bruă mbha mdah ti 2 ƀuôn đĭ kyar ktang kơ hiu čhưn ênguê. Mơ̆ng anăn, mjing mnơ̆ng dhơ̆ng hiu čhưn ênguê duh kơ tuê hiu čhưn gưl mdei knăm Mkŏ mjing ala čar, mbĭt anăn đru kơ klei mdah mơ̆ng dŭm anôk bi lông dưi lar ktang hĭn.

“Thŭn anei mkŏ mjing ti 2 anôk hiu čhưn ênguê hlăm gưl mdei 2/9 mâo lu tuê hiu čhưn, anăn jing Ƀuôn hiu čhưn ênguê êpul êya Ạkŏ Dhông leh anăn wăl hiu čhưn ênguê êpul êya ƀuôn Kŏ Tam. Klei bi lông mkŏ mjing amâo djŏ knŏng jing gưl bi trông klei thâo ôh, bi êdah klei čiăng, ai tiê lŏ čuê ênoh yuôm djuê ana mơ̆ng dhar kreh čing čhar ƀiădah lŏ jing gưl čiăng kơ čar Dak Lak hưn mthâo, hưn mdah dhar kreh čing čhar hŏng mnuih ƀuôn sang leh anăn tue hiu čhưn hlăm ala čar leh anăn ala tač êngao.”

 Giăm 30 hdră mdah kyua dŭm êpul mkŏ mjing, hŏng lu boh phŭn bi êdah klei dhar kreh jăk siam, klei bhiăn hdĭp mda leh anăn ênhiang mmuiñ djuê ana jăk siam, klei bi lông đru mpŭ kơ ênoh yuôm dhar kreh jăk siam mơ̆ng mnuih djuê ƀiă dôk hdĭp ti čar Dak Lak. Mbĭt anăn, đru hưn mdah dhar kreh, hiu čhưn ênguê mơ̆ng čar hŏng mnuih ƀuôn sang leh anăn hiu čhưn ênguê, mjing thiăm anôk hiu dlăng hlăm dŭm hruê mdei Knăm mơak mkŏ mjing ala čar ti alŭ wăl hlăm thŭn anei.