Jiă kma klei mĭn Hồ Chí Minh, thâo săng klă kơ kơhưm, bruă klam yuôm bhăn mơ̆ng dhar kreh jing “Mngăt êwa mơ̆ng djuê ana”, “Dhar kreh adôk djuê ana srăng adôk”, Khua gĭt gai Đảng Nguyễn Phú Trọng mkăp jih ai tiê mkŏ mjing knhuah dhar kreh mrâo mrang, jiă kma knhuah gru djuê ana, klă sĭt jing tur knơ̆ng ai tiê mơ̆ng yang ƀuôn, jing ai ktang mơ̆ng lam, boh kdrŭt yuôm bhăn čiăng mđĭ kyar lăn čar. Êjai gĭt gai klei kƀĭn trông hyuă kjăp, hluê ngă klei bi klă mrô 23 mơ̆ng Phŭn bruă kđi čar kơ hdră êlan mđĭ kyar bruă duh mkra ala ƀuôn, răng mgang klei êđăp ênang krĭng Lăn Dap Kngư truh ti thŭn 2030, tă hdră truh ti thŭn 2045, Khua gĭt gai Đảng Nguyễn Phú Trọng mñă ktang kơ mta phŭn anei:

Mkŏ mjing dhar kreh krĭng Lăn Dap Kngư mrâo mrang jiă kma knhuah gru djuê ana, bi sa ai hlăm klei lu jơr. Mpŭ kơ dŭm knhuah dhar kreh mdê mdê plah wah dŭm djuê ana, anei dưi dlăng jing boh kdrŭt tur knơ̆ng đĭ kyar leh anăn ñŭ kma tar rŏng lăn. Mđing tal êlâo kơ bruă kriê pioh leh anăn bi lar dŭm knhuah gru dhar kreh, knhuah gru đưm, knhuah dhar kreh djuê ana mơ̆ng mnuih djuê ƀiă, ƀoh nik jing dŭm knăm mơak knhuah gru, wăl dhar kreh čĭng čhar krĭng Lăn Dap Kngư. Kâo čiăng mñă ktang kơ dhar kreh. Blŭ hrăm truh ti krĭng Lăn Dap Kngư drei mâo leh knhuah gru dhar kreh, knhuah mdê hjăn, diih dưi ngă mơ̆? Anei amâodjŏ knŏng dhar kreh klei hlăp lêñ, anei jing kriê pioh knhuah gru dhar kreh djuê ana leh anăn jing mbah drei ngă bruă duh mkra hlăm wưng ară anei jing jăk êdi."

Lŏ hdơr wĭt 13 thŭn êlâo, êjai Khua gĭt gai Đảng Nguyễn Phú Trọng nao čuă kdriêk Mường Lát, čar Thanh Hóa, Lầu Minh Pó khua kiă kriê hđăp bruă Đảng kdriêk Mường Lát ăt dưi hmư̆ klei mtă mtăn mơ̆ng Awa kơ klei lui hĕ dŭm klei bhiăn amâo mâo lŏ djŏ leh anăn kriê pioh knhuah gru djuê ana. Ară anei mnuih ƀuôn sang mnuih Mông ti Mường Lát lui leh klei bhăn amâo mâo lŏ djŏ leh anăn dưi bi lar knhuah dhar kreh djuê ana:

"Knhuah gru djuê ana mmông Awa hriê awa lač djăp djuê ana srăng kriê pioh knhuah gru dhar kreh djuê ana anăn, kyuanăn mnuih Mông truh kơ ară anei ăt djă pioh knhuah gru dhar kreh, boh nik jing mmuñ bi kuôl ung mô̆. Mniê nao dôk ung srăng mâo klei kreh kriăng, anăn jing dhar kreh mnuih djuê ana Mông. Tal 2 jing ayŭ đĭng, ayŭ brô̆ hla mơ̆ng mnuih djuê ana Mông ăt dôk gĭr mkŏ wĭt”.

Ayŏng Đinh Ply, mnuih Bahnar mơ̆ng čar Gia Lai dôk hdĭp ti sang mbĭt 54 djuê ana (ti ƀuôn Dhar kreh hiu čhưn ênguê dŭm djuê ana Việt Nam, Đồng Mô-Sơn Tây-Hà Nội), ăt dôk hdơr nanao kơ klei mtă mtăn mơ̆ng khua gĭt gai Đảng kơ bruă djă pioh dhar kreh:

"Awa tuôm lač kơ bruă djăp pioh leh anăn bi lar răng kriê knhuah gru dhar kreh djuê ana Việt Nam, hlăm anăn mâo dŭm djuê ana mnuih djuê ƀiă si srăng ngă pô srăng bi mguôp, hrăm mbĭt mkŏ mjing ƀuôn sang, lăn čar đĭ kyar, mkŏ mjing klei găl kơ hdơ̆ng pô čiăng mđĭ kyar bruă duh mkra, bi đru hdơ̆ng pô, hriăm kơ dhar kreh. Bi lar bruă klam anăn kâo ăt djă pioh čiăng hluê ngă klei Awa mtă, awa ăt mă leh anăn mrâo anei nao mă hdruôm hră awa, mđup brei kơ mnuih ƀuôn sang dŭm djuê ana. Hdruôm hră dlăng mgei ai tiê, awa čih kơ bruă djă pioh, bi lar knhuah dhar kreh jăk siam djuê ana Việt Nam, ăt msĕ mơh djuê ana bahnar dôk bi lar ti ƀuôn Dhar kreh, mâo boh tŭ dưn yuôm bhăn êdi hŏng djuê ana Việt Nam drei”.

Hlăm klei kƀĭn trông Dhar kreh kluôm ala thŭn 2021, Khua gĭt gai Đảng Nguyễn Phú Trọng mñă ktang: “Dhar kreh jing knhuah gru djuê ana, dhar kreh adôk, djuê ana adôk, luč dhar kreh srăng luč djuê ana”. Klei hưn yuôm bhăn anei dưi leh anăn dôk ba wĭt ai hdĭp mrâo, klei jing mrâo hlăm dŭm krĭng war taih kbưi mơ̆ng lăn čar. Hĭn kơnăn, knhuah gru dhar kreh dŭm djuê ana dưi djă pioh, bi lar jing ai ktang lui hĕ dŭm klei bhiăn amâo mâo lŏ djŏ, klei ư̆ êpa, ƀun ƀin, bi râo dŭm krĭng lăn, mđing truh kơ mgi dih mngač tač hĭn.