Ki pah mkra mjing mơ̆ng ki kbao knô - hlô mnơ̆ng mâo hlăm klei hĭp mda, mă bruă leh anăn klei đăo mnuih ƀuôn sang. Pô ayŭ ki pah tơdah čiăng bi mlih hnơ̆ng ti dlông srăng yua kđiêng kngan điâo gư̆ phưi tĭng knur, yua kngan hnuă pah ti nah prŏng, mjing ênai kwang ktang snăk.

Čiăng mjing sa ƀĕ ki pah yuôm bhăn, phung mbruă Êđê mâo sa hdră mkra mjing dleh snăk leh anăn luč lu hruê mmông, brei mâo klei thâo săng kơ mnơ̆ng dhơ̆ng pioh mkra mjing leh anăn hdră mnêč mtô bi hriăm. Diñu ruah ki kbao prŏng, kjăp, amâo mčah ôh, leh anăn bi mdoh bi nik, ktir ƀăng hlăm lam leh anăn mjing rup. Pô mbruă Y-Dăk Niê (Aê H’Nhăm), ti ƀuôn Sut Mđưng, să Čư̆ Suê, kdriêk Čư̆ M’Gar, čar Dak Lak brei thâo, kdrêč bi mklă ênai ki pah jing bruă dưm êlah hŏng mơô amâodah kyâo ti anôk ayŭ. Sa ƀĕ ki pah amâo djŏ knŏng siam ti êngao ôh ƀiădah kwang ênhiang jăk siam mơ̆ng dliê kmrơ̆ng, mngăt êwa.

“Hlăk dôk điêt, kâo ƀuh phung aê, ama kâo sa ƀĕ kyâp dliê mkra anôk ayŭ, êlan hŏng mơô, dưi mkŏ hŏng ki kbao hŏng hlĭn jŭ. Hlăk đưm arăng knŏng ayŭ kipah hlăm hma đuč, hlăm ƀuôn arăng kăm. Ară anei snăn brei drei gĭr mtô kơ phung anak čô hlăm ƀuôn pô knhuah gru djuê ana msĕ si ki pah.”’

Amâo kdrăm kơah msĕ si ênai čing, kăn êdu êun msĕ si buôt, kipah mâo ênai kwang ktang snăk, mâo mngăt êwa lăn, ana kyâo mtâp, rơ̆k tơ̆k , angĭn thŭt… lar bra ktang snăk ti krah dap kngư liă lia, ba sa ênai siam snăk, mâo knhuang  yuôm bhăn, jĕ giăm hŏng dliê kmrơ̆ng, dliê êa.

 Hlăm klei ngă yang kơ êman, ki pah msĕ si klei blŭ hŏng phung yang, klei kwưh akâo čang hmăng klei êđăp ênang, klei suaih pral leh anăn klei myun kơ êman leh anăn êpul êya. Ênai ki pah lŏ iêô bi kƀĭn ƀuôn sang, ênai hưn mâo tue hriê ti ƀuôn sang, truh kơ klei hưn brei răng mơ̆ng dliê kmrơ̆ng, jih jang dưi ba hlăm ênai yuôm bhăn anăn. Pô mbruă Y-Dŭ Êban (Ama Đam), ƀuôn Sut Mđưng, să Čư̆ Suê, kdriêk Čư̆ M’Gar, čar Dak Lak lŏ brei thâo:

“Kâo hmư̆ phung aê lŏ yăl dliê, hlăk đưm mnuih Êđê ayŭ ki pah hlăm dua klei mâo yuôm bhăn snăk. Tal sa hlăm knăm čang phung mdrŏng hĭn hlăm ƀuôn ngă leh yang hŏng kbao, djiê hlăk êbeh 70 thŭn. Tal dua jing phung ngă leh yang hŏng kbao leh anăn dưi mkra leh sa boh kpan dlông. Tơdah ngă yang mđĭ kpan srăng ayŭ ki pah hưn hŏng mnuih ƀuôn sang, hưn klei mơak kơ êpul êya.”

 Klei hdĭp đĭ kyar, anôk pioh ayŭ ki pah yuôm bhăn ăt ƀiă mơh. Leh anăn phung mbruă ƀrư̆ luč, klei thâo mkra mjing ki pah mnuih Êđê dôk ti anăp klei luč ram. Pô mbruă Y- Trinh Êban (Aê Yuôm), ti ƀuôn Sut Mđưng, să Čư̆ Suê, kdriêk Čư̆ M’Gar, čar Dak Lak brei thâo:

"Čiăng dưi mkra kipah dleh snăk, phung khua thŭn thâo săng kơ kipah kơh thâo mkra, phung mda asei amâo thâo ôh. Ară anei hlăm ƀuôn pô amâo mâo ôh hlei pô mkra mjing kipah anei,  dŭm ƀuôn mkăn knŏng dôk dŭm čô đuč. Ară anei snăn hmei ăt yua mơh hlăm knăm mơak, ayŭ hưn mdah hŏng tue hiu čhưn ênguê.”

Si ngă čiăng răng kriê ki pah - anei jing klei phung mbruă ti ƀuôn sang Êđê. Klei kriê pioh ki pah amâo djŏ knŏng kriê pioh kdrăp tông ayŭ ôh, ƀiădah lŏ kriê pioh jih sa kdrêč hƀuê ênuk, sa klei đăo, knhuah dhar kreh jăk siam, čiăng kơ klei yăl dliê kơ ƀuôn sang, kơ klei hdĭp mnuih Êđê dưi yăl dliê nanao hlăm ênai kwang yuôm bhăn anăn./.