Wưng leh êgao, klei bi mguôp bruă kđi čar, klei mjĕ mgiăm lŏ mâo klei đĭ kyar jăk, knư̆ hrue knư̆ mâo klei đăo knang jăk. Jih dua nah bi jĕ êrô gưl khua prŏng, lehanăn djăp gưl, tă êlan kơ klei mđĭ kyar mbĭt dua ala čar. Hgŭm bruă lĭng kahan răng mgang kjăp klei êđăp ênang. Dua nah jih ai tiê hlue ngă dŭm klei leh bi tŭ ư, kơ hdră leh bi hgŭm, hgŭm kiă kriê bruă mŭt kbiă mơ̆ng dua ala čar, gang mkhư̆ lehanăn bi rai phung ngă soh hluh lăn čar.

Hgŭm bruă duh mkra mnia mblei, lehanăn duh bi liê  plah wah dua ala čar lŏ dơ̆ng mâo klei duh bi liê. Kñăm mjing klei găl kơ kơ phung duh mkra lehanăn mnuih ƀuôn sang dua ala čar, dua nah kuôl kă klei čih pioh kơ bruă mđĭ kyar, lehanăn bi mguôp hlăm bruă mnia mblei ti knông lăn Việt Nam-Lào, Klei kuôl kă duh mmkra mnia mblei Việt Nam-Lào; Mơ̆ng dŭm klei gĭr mơ̆ng dua nah, ênoh kơ klei bi mnia mblei dua nah thŭn 2024 kruak knăl ênoh bi mnia mblei mâo 2,2 tỷ USD, đĭ 34% mkă hŏng thŭn 2023.

Bruă sang hră mơar, klei mjuăt bi hriăm lehanăn dhar kreh ăt jing bruă mâo klei bihgŭm jăk mơ̆ng dua ala čar. Ară anei, mâo leh êbeh 14 êbâo čô phung hđeh hriăm hră  Lào dôk hriăm ti Việt Nam. Dua nah hlăk dôk hlue ngă klei bi hgŭm bruă sang hră mơar  Việt Nam-Lào wưng thŭn 2021-2030 lehanăn hdră mtrŭn kơ klei bi hgŭm Việt Nam-Lào.  Muiñ lehanăn hiu čhưn ênguê. Việt Nam đru leh Lào hdră êlan mđĭ kyar bruă mjuăt asei mlei wưng thŭn 2023-2030.

Klei bi hgŭm dŭm alŭ wăl, boh nik dŭm alŭ wăl mâo knông lăn mbĭt, lŏ dơ̆ng hyuă kjăp, mtrŭn agha êlam hĭn, kluôm dhuôm, đru răng mgang klei êđăp ênang, ti dŭm alŭ wăl knông lăn mbĭt. Dŭm boh tŭ dưn mơ̆ng thŭn bi mguôp hgŭm mbĭt Việt Nam-Lào 2022 lehanăn lu bruă bi hgŭm mkăn dŭm thŭn leh êgao đru lŏ hyuă kjăp hĭn klei bi thâo săng hdơ̆ng găp, lehanăn lŏ bi kjăp klei bi mguôp mnuih ƀuôn sang dua ala čar.

Hlăm klei bi hgŭm lu tĭng, dua nah mâo klei bi mguôp kjăp, bi sa ai hlăm dŭm klei bi kƀĭn alŭ wăl lehanăn tar rŏng lăn, boh nik ti anôk bi kƀĭn (ASEAN), klei bi kƀĭn êpul hgŭm lu ala čar, lehanăn dŭm krĭng wăl điêt mkăn.

Dua nah mkŏ mjing leh tŭ jing klei bi kƀĭn tal 46 dhar bruă hghŭm knŭk kna kơ klei bi mguôp dua nah Việt Nam-Lào lehanăn klei bi mtuôm ghưl dlông plah wah Đảng Cộng sản Việt Nam lehanăn Đảng yang ƀuôn krŭ kdơ̆ng Lào. Mơ̆ng klei ksiêm wĭt jih jang klei tŭ dưn leh mâo, dua nah bi tŭ ư lŏ tă hdră êlan mbĭt prŏng hĭn hlăm wưng tinăp.

Klei bi mguôp yuôm bhăn plah wah Việt Nam-Lào hlăk lŏ dơ̆ng ksul mbŭ kyua mta kñăm mbĭt mơ̆ng dua ala čar, hŏng ai tiê thâo bi đru mbĭt, atăt klei mlih mrâo dua nah mâo klei dưi nanao hlăm jih klei lông dlăng, klei dleh dlan.

Việt Nam lehanăn Lào srăng lŏ dơ̆ng gĭr mtrŭn agha êlan hĭn klei bi hgŭm, hlăm klei thâo bi mguôp kjăp kluôm dhuôm, kyua klei tŭ dưn klă mngač mơ̆ng mnuih ƀuôn sang dua ala čar, kyua klei êđăp ênang, hgŭm mbĭt lehanăn mđĭ kyar ti alŭ wăl lehanăn tar rŏng lăn./.