Leh 50 thŭn lăn čar hluh hlir, bruă čuh klei yăl dliê Dak Lak mâo lu klei čih mrâo hŏng hnơ̆ng tŭ jăk, bi myuôm klei khăp kơ lăn čar leh anăn knhuah hdĭp anak mnuih, dưi mă yua dhar kreh jăk siam mơ̆ng dŭm djuê ana. Čar dưi duah leh anăn pioh, đăo tĭng dŭm êtuh klei khan Êđê leh anănM’Nông, klei yăl dliê đưm, dŭm êbâo klei ngă yang hlăm dŭm hdră bhiăn mnuih ƀuôn sang. Mkăp brei dŭm êtuh hlâo ring čing leh anăn kdrăp čŭt hơô djuê ana, mkŏ mjing lu knăm mơak knhuah gru, kriê pioh dhar kreh nao mbĭt hŏng bruă hiu čhưn ênguê.

Êa mil hlăm dhar kreh dŭm djuê ana mkŏ mjing ti Dak Lak klei đĭ kyar lu jơr mơ̆ng klei čih yăl dliê. Nguyễn Văn Cừ, khua êpul hâo hưn leh anăn čung ba mnuih ƀuôn sang bruă Đảng kdriêk Ea Sup brei thâo, bruă kriê pioh leh anăn bi lar boh tŭ dhar kreh čiăng mđĭ kyar klei čih yăl dliê, ăt srăng bi mguôp hŏng mđĭ kyar bruă hiu čhưn ênguê hŏng bruă duh mkra.

 “Mă dhar kreh ngă bruă duh mkra leh anăn mă dhar kreh rông dhar kreh. Mkŏ mjing bruă hiu čhưn ênguê kdriêk Ea Sup, dlăng kơ ênao êa sup nah dlông, gơ̆ng yang prŏng, nao čuă 5 ƀuôn ti wăl krah Ea Sup hŏng ring čing đru kơ klei huă ƀơ̆ng, dhar kreh, knăm mơak čiăng kơ mnuih ƀuôn sang mđĭ kyar klei hdĭp mda gŏ sang, mơ̆ng anăn mkŏ mjing hdră bruă dar leh anăn krĭp, anăn jing bruă duh mkra, dhar kreh, bruă kđi čar leh anăn yang ƀuôn đĭ kyar leh anăn hơĭt kjăp”

Trần Doãn Tới, K’iăng khua êpul bruă hâo hưn leh anăn čung ba mnuih ƀuôn sang čar Dak Lak brei thâo, lŏ čuê kơ dŭm klei tŭ jing, lŏ dơ̆ng ngă dŭm bruă klam, hdră êlan mđĭ kyar klei čih yăl dliê hlăm wưng mrâo.

       “ Êpul bruă hâo hưn leh anăn čung ba mnuih ƀuôn sang čar srăng lŏ dơ̆ng kcĕ hŏng bruă Đảng čar mâo klei gĭt gai, hluê anăn ngă jăk hĭn hdră mtrŭn mrô 23 kơ klei čih yăl dliê. Leh anăn êjai drei mŭt hlăm ênuk kpưn đĭ, bi mguôp wăl anôk, drei seăng mâo klei mlih lu hĭn kơ klei čih yăl dliê, hluê ngă leh anăn bi lar klei ktang bi mguôp dhar kreh mơ̆ng krĭng čư̆ čhiăng leh anăn klei bi kna hlăm dhar kreh klei čih yăl dliê mơ̆ng krĭng kwar krah êjai drei ngă klei bi mŭt mbĭt”.

Mđing truh kơ ênuk đĭ kyar, klei bi mguôp plah wah dhar kreh – klei kdŏ mmuñ leh anăn bruă duh mkra, boh nik bruă hiu čhưn ênguê srăng pŏk klei găl kơ Dak Lak đĭ kyar hơĭt kjăp, kriê pioh leh anăn bi hluh klei mbruă. Mơ̆ng tur knơ̆ng hƀuê ênuk, dhar kreh lu êa mil leh anăn ai tiê khăp kơ lăn čar, klei čih yal dliê Dak Lak hruê anei srăng lŏ kpưn đĭ, đru mkŏ mjing sa Lăn Dap Kngư mdrŏng siam.