Mơ̆ng aguah ưm, ti sang dhar kreh ƀuôn Khal, să Čư̆ Pơ̆ng, bi ênŭm ênap lu mnuih mŭt kbiă mprăp kơ klei ngă yang đĭ dôk sang mrâo. Khua mduôn leh anăn phung mâo kơhưm hlăm ƀuôn bi dăp mnơ̆ng ngă yang, lông tông čing, phung êkei êdam mdơ̆ng čeh kpiê, mprăp kđeh čĭm leh anăn dăp jhưng mdhô̆, bi phung mniê hlăm kdrăp čŭt hơô djuê ana bi tăp briah, rao djam, tŭk knă. Grăp čô grăp bruă, mkŏ mjing ai êwa hơ̆k mơak. Amai H’Hinh Niê, ti ƀuôn Khal brei thâo:

 “Mơ̆ng aguah ưm phung amai adei bi mprăp leh, hriê tinei đru dŭm mta bruă msĕ si tŭk knă, mprăp dŭm mnơ̆ng ƀơ̆ng, bi doh hlăm sang čiăng drông tuê. Kâo pô ăt hơ̆k mơak êdu kyua dưi kriê pioh knhuah gru dhar kreh mơ̆ng mnuih Êđê mơ̆ng đưm êlâo”.

Knăm ngă yang đĭ dôk sang mrâo dưi mkŏ mjing hluê hdră bhiăn mơ̆ng mnuih Êđê, čiăng ƀơ̆ng huăn sang dhar kreh ƀuôn Khal – “Sang mbĭt” mơ̆ng ƀuôn sang mrâo dưi rŭ mdơ̆ng. Kyua sang mbĭt, anăn yơh jih êpul êya bi mprăp kơ klei ngă yang. Mnơ̆ng ngă yang mâo: 1 drei ŭn, 1 drei mnŭ, 6 čeh kpiê mbĭt hŏng đa đa mta mnơ̆ng ƀơ̆ng mơ̆ng mnuih ƀuôn sang čŏng bi tŭk mkra.

Leh mdơ̆ng jih mnơ̆ng ngă yang, ênai čing drông tuê kwang hưn kơ klei ngă yang kčưm leh. Pô riu yang ngă hluê si hdră bhiăn. Klei kwưh mbĭt hŏng ênai čing mkŏ yang ƀuôn, ba mbĭt hŏng klei hmăng hmưi mơ̆ng mnuih ƀuôn sang kơ klei răng mgang, kơup mgang kơ sang anei leh anăn grăp čô mnuih ƀuôn sang êđăp ênang, suaih pral, mâo klei bi mguôp, klei hdĭp trei mđao, mâo lu boh mnga.

 Hluê si pô Y Hliêm Mlô (aê Phước) – êlâo dih klei ngă yang sang mrâo mơ̆ng mnuih Êđê mâo 5 knhuang: tal êlâo jing ngă yang hưn mdah hŏng phung yang kơ sang mrâo, leh anăn ngă yang aduôn aê atâo tiêt, klei ngă yang ăt dưi khăt hĕ ƀiădah ăt hluê si klei găl mơ̆ng grăp boh sang.

 “Boh tŭ dưn yuôm bhăn mơ̆ng klei ngă yang sang mrâo msĕ si knhuah gru aê ama ti dŭm ƀuôn êlan jing hlăm bruă pioh kyâo ngă sang kreh mâo klei soh amâo mâo jăk, kyuanăn srăng mâo klei ngă yang suôt hĕ dŭm klei jhat, djă pioh dŭm klei jăk siam čiăng kơ pô sang mâo lu klei myun mdah, klei suaih pral”.

Ênai čing kwang jing ktang hĭn êjai dơ̆ng ruê̆ hdră bhiăn, kyuanăn jing knăm mơak dơ̆ng kčưm, kyua mmông huă ƀơ̆ng yang ƀuôn leh anăn dŭm čeh kpiê dưi mbŏ êa. Hlăm sang mrâo, grăp čô bi kkuh kŭm ƀơ̆ng dŭm ƀơ̆ng huă, mnăm kpiê leh anăn ñŭ kma mbĭt hŏng ênhiang ênai čing. Y- Yuynh Kbuôr, khua ƀuôn Khal brei thâo:

 “Knăm ngă yang sang mrâo jing wưng kơ mnuih ƀuôn sang bi kƀĭn, ksiêm wĭt dhar kreh čing čhar, mnăm kpiê čeh leh anăn kriê pioh knhuah gru djuê ana. Hmei lŏ hơ̆k mơak hĭn, jĕ giăm, hrăm mbĭt mă bruă knuă, mđĭ kyar ƀuôn sang pô”.

Ngă yang sang mrâo mơ̆ng gŏ sang mnuih Êđê hŏng boh tŭ lač jăk kơ yang đru leh kơ pô sang mâo lu boh mnga leh anăn mâo klei găl ngă sang mrâo. Hŏng sang mbĭt mơ̆ng êpul êya, klei ngă yang anei mâo boh tŭ dưn bi mguôp grăp čô, bi êdah klei hơ̆k mơak, leh anăn bi êdah klei uêñ mĭn mơ̆ng Đảng, knŭk kna hlăm bruă kriê pioh leh anăn bi lar dŭm boh tŭ yuôm dhar kreh mơ̆ng djuê ana.