Ti krah wăl tač sang kƀĭn Ky, ƀuôn prŏng Ƀuôn Ama Thuôt, čar Dak Lak, ênai pô ngă yang iêo yang mbĭt hŏng ênai čing kwang. Hlăm klei kwưh kơ yang mâo kdrêč: “­Ơ Phung yang…Ơ aduôn aê tâo tiêt…wĭt bĕ ti ƀuôn Ky anei ktuê dlăng hmei ngă yang akâo hjan, brei kơ hmei êa hlĭm hjan, ana pla mjing čăt đĭ, boh mnga mâo lu. Brei kơ mnuih ƀuôn sang mâo klei suaih pral, klei hdĭp êđăp ênang, amâo mâo klei ruă tưp hŏng anak mnuih, ana pla mjing leh anăn mnơ̆ng rông…”.

Ruê̆ klei kwưh, pô ngă yang mơ̆ng mnơ̆ng ngă yang kơ phung yang mâo sa drei mnŭ knô leh anăn sa kčeh kpiê. Leh kơnăn jing hdră bhiăn êmiêt pưk hma, lua mnah hlô mnơ̆ng, suôt hĕ jih mnơ̆ng bi rai. Ti knhal tuč jing klei bhiăn sač êa ngă hjan, mơĭt klei hmăng hmưi mơ̆ng mnuih ƀuôn sang čiăng kơ êa hlĭm hjan čiăng kơ ana kyâo mtâ čăt đĭ mta mda, amâo mâo mnơ̆ng ngă, čĭm čap bi rai.

Mduôn Y- Bang Byă (kreh iêo aê Y-Răk), ti ƀuôn Ky brei thâo, anei jing sa hdră bhiăn yang ƀuôn mâo mnuih Êđê djă pioh mơ̆ng đưm truh kơ ară anei.

“Hlăm sa thŭn mnuih ƀuôn sang srăng bi tuôm, mjĕ mjuk kơ klei hdĭp, klei mă bruă knuă. Hlăm dŭm ƀuôn, anăn jing hruê knăm bi tuôm, bi hriăm hdơ̆ng pô hlăm bruă lŏ hma, akâo hjan kơ thŭn anei mâo boh mnga ba wĭt klei hdĭp trei mđao, ƀrư̆ hruê klei hdĭp mơ̆ng mnuih ƀuôn sang dưi đĭ kyar hĭn”.

Leh klei ngă yang akâo hjan, grăp čô bi nao ti sang dhar kreh ƀuôn čiăng ngă klei ngă yang akâo klei suaih pral kơ mduôn leh anăn mnăm kpiê čeh, kdŏ mmuñ, tông ayŭ. Anei jing wưng čiăng kơ mnuih Êđê mtă mtăn kơ anak čô kơ hdră bhiăn jăk siam, yuôm bhăn êdi mơ̆ng djuê ana. Jing pô klă anăp mprăp kơ klei ngă yang hŏng mnuih ƀuôn sang hlăm ƀuôn, ayŏng Y-Long Niê Siêng, ti ƀuôn Ky, ƀuôn prŏng Ƀuôn Ama Thuôt brei thâo:

“Hŏng phung êdam êra hmei jing yuôm bhăn sơnăk. Tal 1 jing kriê pioh, bi mlar dhar kreh mnuih Êđê. Tal 1 jing, hmei dưi hriăm kơ bruă mprăp kơ klei ngă yang akâo hjan, čiăng dưi djă pioh leh anăn bi lar kơ ênuk êdei anăp”.

Klei ngă yang akâo hjan, mnuih Êđê pia jing Kăm Mah, jing sa hdră bhiăn knhuah gru dưi ngă hlăm grăp thŭn, leh mnuih ƀuôn sang êmiêt jih pưk hma, knŏng guôn mă hjan lĕ čiăng ƀuh pla. Klei ngă yang anei kreh mkŏ mjing ti knhal jih mlan 3 amâodah hlăm mlan 4, êjai yan adiê ti wưng không kƀah êa hĭn. Mnuih Êđê mâo klei mĭn, leh klei ngă Kăm mah kơ mnuih ƀuôn sang dưi buh pla čiăng dưi mâo angĭn hjan siam, amâo mâo hlô dliê, čĭm čap bi rai.

Hluê si Y-Ơm Êñuôl (Ama H’Lim), khua bruă đảng ƀuôn Ky brei thâo, ti anăp dŭm klei hmăi mơ̆ng wăl krah, klei ngă bruă lŏ hma mơ̆ng ƀuôn mâo lu klei mlih, ktŭng mbĭt dŭm klei mlih hlăm dŭm hdră bhiăn leh anăn klei đăo knang hlăm bruă lŏ hma. Khădah sơnăn, ƀiădah hlăm dŭm thŭn giăm anei, hŏng klei đru mơ̆ng knŭk kna leh anăn dhar bruă dhar kreh, đa đa hdră bhiăn dưi mkŏ wĭt leh anăn dưi rơ̆ng hlăm ƀuôn sang.

“Hŏng klei gĭt gai mơ̆ng ƀuôn prŏng, mơ̆ng čar čiăng kriê pioh knhuah gru dhar kreh djuê ana, kyuanăn hmei ăt gĭr mkŏ wĭt hluê hdră bhiăn đưm, mâo boh tŭ dưn čiăng lŏ čuê kơ ana čô êdei anăp”.

Mbĭt hŏng klei ngă yang akâo hjan, ti ƀuôn Ky ară anei ăt dôk djă pioh pin êa leh anăn klei ngă yang pin êa. Êpul tông čĭng, kdŏ mmuñ mơ̆ng ƀuôn ăt nao hriăm leh anăn nao rang mdah hlăm lu hdră dhar kreh mơ̆ng čar, ƀuôn prŏng. Anei jing hdră čiăng kơ mnuih ƀuôn sang, boh nik jing phung mda asei hlăm ƀuôn dưi thâo klă hĭn leh anăn hrăm mbĭt kriê pioh knhuah dhar kreh jăk siam mơ̆ng djuê ana pô./.