Jing sa hlăm dŭm klei ngă yang hlăm klei pla mjing mdiê, klei ngă yang kpơ̆ng gơ̆ng ngă yang mơak mdiê blĕ dưi ngă khuăt, mnơ̆ng ngă yang kăn lu lei. Êlâo kơ nao ti hma kpơ̆ng gơ̆ng ngă yang, pô sang leh anăn găp djuê ngă yang ti sang. Ti sang Điểu Dray, bon Bu Prâng 1, să Quảng Trực, čar Lâm Đồng, ai êwa mprăp kơ klei ngă yang mkŏ mjing kdrưh kơăm leh anăn hơuh mđao. Grăp čô gră bruă, bi ngă jăk bruă pô, bi êdah klei mpŭ kơ yang leh anăn aduôn aê tâo tiêt.

Phung mniê knă êsei, mprăp mnơ̆ng ngă yang, mđam kpiê čeh. phung êkei nao koh ana mơô kpă, dôk mtah čiăng ngă gơ̆ng ngă yang, leh anăn bi msiam hŏng mdiê, rup čĭm čap, hlô mnơ̆ng, hruh hnuê. Anei jing dŭm klei bi hmô akâo kơ mdiê đĭ hriê jăk, bi asăr, suôt jih klei amâo mâo jăk, hlô mnơ̆ng. Điểu Dray brei thâo:

Grăp thŭn, êjai mdiê dơ̆ng blĕ, dŭm gŏ sang mnuih Mnông ngă yang kpơ̆ng gơ̆ng ngă yang. Êlâo kơ klei ngă yang sa hruê, phung êkei hlăm gŏ sang nao hlăm dliê ruah ana mơô prŏng, siam, kpă čiăng ngă gơ̆ng ngă yang. Ngă yang čiăng kơ phung yang srăng tôk ti gơ̆ng anăn leh anăn krơ̆ng kơ mngăt mdiê dôk ênang ti hma”.

Hŏng mnuih Mnông, klei ngă yang anei mâo boh tŭ dưn yuôm bhăn, akâo kơ mdiê blĕ siam, asăr lu. Klei ngă yang ăt jing wưng bi hdơr kơ lăn adiê leh anăn hyuă kjăp klei bi mguôp ƀuôn sang, ksum mbŭ knhuah dhar kreh leh anăn mtô mtă kơ anak čô kơ klei thâo hdơr, bruă klam hŏng lăn ala, ana kyâo mtâo. Mẹ Ngiêp, bon Bu Prâng 1, să Quảng Trực brei thâo:

Klei ngă yang anei čiăng lač jăk kơ yang hơêč hmưi kơ anak mnuih hlăm klei ngă lŏ hma, akâo kơ yang suôt hĕ kuih, prôk, ŭn dliê leh anăn hluăt amâo mâo bi rai mdiê, ăt akâo kơ anak čô hlăm gŏ sang suiah pral”.

Leh mâo djăp mnơ̆ng, pô sang đŭng mnơ̆ng ngă yang leh anăn dưm kgă ku hlăm bŭng. Ung djă gơ̆ng ngă yang nao êlâo, mô̆ gui bŭng nao êdei, mbĭt hŏng mnuih ƀuôn sang bi nao kơ hma. Truh ti hma, pô sang duah anôk mâo mdiê siam, anôk ti krah čiăng ngă yang, leh anăn kpơ̆ng gơ̆ng ngă yang, leh anăn dua ung mô̆ êbat jŭm dar gơ̆ng nga yang, sač êrah mnŭ, ruêh leh anăn blŭ hrăm hŏng mdiê, akâo kơ mdiê čăt đĭ pral, blĕ bi knar, bi asăr. Hdră bhiăn anăn bi êdah klei đăo knang ana mdiê mâo mngăt leh anăn srăng thâo săng kơ ai tiê mơ̆ng anak mnuih.

Pô gai klei ngă yang jing pô hma amâodah pô mâo kơhưm hlăm ƀuôn. Ñu mia êrah mnŭ hlăm dŭm mta mnơ̆ng yua leh anăn ngă yang, iêo jak phung yang wĭt dlăng leh anăn hơêč hmưi kơ gŏ sang mâo lu boh mnga, klei hdĭp trei mđao, yâo mơak.

“Ơ phung yang: yang mdiê, yang dliê, yang êa…hruê anei ieo diih wĭt hŏng gŏ sang huă ƀơ̆ng, gŏ sang kâo ngă yang akâo kơ diih kơup mgang kơ mdiê gŏ sang mâo klei jăk, mâo asăr lu, amâo mâo brei hluăt, kuih, prôk bi rai. Ơ phung yang hriê huă êsei, mnăm kphê čeh mbĭt hŏng gŏ sang leh anăn mnuih ƀuôn sang”.

Leh mdơ̆ng gơ̆ng ngă yang hlăm hma, jih jang wĭt ti sang pô sang čiăng huă mnăm. Klei mơak sơnăn mơ̆ng sang anei truh sang dih êlâo kơ yang mdiê blĕ, čiăng akâo kơ sa yan trei mđao. Anei ăt jing wưng bi mguôp êpul êya, kah mbha klei hơ̆k mơak mă bruă knuă, hmăng hmưi kơ sa yan mâo lu boh mnga.