Pô riu yang Y Phi Mjâo, ƀuôn A1, ƀuôn hgŭm Ea Sup, čar Dak Lak brei thâo, hluê si klei bhiăn mơ̆ng đưm, leh hrui pĕ boh mnga, grăp čô hlăm ƀuôn bi mkŏ mjing klei ngă yang. Klei ngă yang bi êdah klei hdơr kơ boh tŭ sa thŭn mă bruă, akâo kơ sa thŭn mrâo êđăp ênang, ana pla mjing čăt đĭ, ƀuôn sang suaih pral, bi mguôp.

Hlăm klei mĭn mnuih Jarai, phung yang kơup mgang nanao kơ ƀuôn sang, boh nik jing yang êa, yang dliê. Khădah lu klei bhiăn hđăp dưi bi hrŏ leh, klei ngă yang ăt dưi djă pioh, msĕ sa kdrông mkŏ plah wah anak mnuih hŏng lăn, hŏng dliê, bi êdah klei hdơr leh anăn klei đăo knang yang srăng kơup mgang ƀuôn sang, ana pla mjing čăt đĭ. Pô riu yang Y Phi Mjâo lač:

Ngă yang ƀuôn čiăng kơ ƀuôn sang êđăp ênang, suiah pral. Leh klei ngă yang ƀuôn hmei srăng ngă yang êa, ngă yang mnơ̆ng rông msĕ si ŭn, kbao, êmô đĭ lar, amâo mâo klei ruă. Klei ngă yang anei hmei ngă msĕ mnuih Lào. Hmei ngă yang čiăng kơ grăp čô mâo klei hơ̆k mơak.

Êlâo kơ ngă yang, mduôn ƀuôn srăng bi kƀĭn ƀuôn čiăng mbha bruă. Phung êkei êdam srăng nao hlăm dliê mă mơô, mă đrao mdơ̆ng gơ̆ng ngă yang. Gơ̆ng ngă yang dưi dlăng msĕ si kdrông mkŏ ai tiê, đru kơ mnuih ƀuôn sang jĕ giăm hĭn hŏng yang. Êjai anăn, phung mniê dôk ti sang tăp mdiê, mđam kpiê leh anăn mprăp dŭm mta mnơ̆ng ƀơ̆ng knhuah gru. Y Nô Ksơr, buôn A1,  să Ea Sup, čar Dak Lak brei thâo:

 “Akŏ thŭn hmei kreh ngă yang êa, yang čư̆, yang mnơ̆ng rông. Hlăm hruê 29 tết, jing wưng akŏ thŭn hmei srăng ngă. Hruê anei jih jang ƀuôn bi kƀĭn, tinei mâo ƀuôn A1,A2 ngă mbĭt, grăp thŭn sơnăn sơăi”.

Leh ngă yang ƀuôn, mnuih ƀuôn sang hlăm ƀuôn lŏ iêo pô ngă yang mkăn ngă yang êa. Klei ngă yang anei ti pin êa, anôk bi mguôp hŏng klei hdĭp grăp hruê. Hlăm klei ngă yang anei srăng kă mrai kơ mduôn ƀuôn, sa hdră bhiăn mâo boh tŭ akâo kơ klei êđăp ênang, răng mgang leh anăn bi mguôp ƀuôn sang.

Hluê si Y Duk Ksơr, mnuih ƀuôn sang ƀuôn B1, să Ea Suo, čar Dak Lak, anei jing hdră bhiăn amâodưi kƀah hlăm klei hdĭp mơ̆ng mnuih Jarai, bi êdah klei bi mguôp hŏng dliê kmrơ̆ng, mbĭt anăn mtă mtăn kơ anak čô thâo mpŭ kơ akŏ êa, lăn ala leh anăn dliê kmrơ̆ng.

 “Ngă Yang ƀuôn akâo kơ angĭn hjan siam, mâo lu boh mnga, mdiê mkuê̆ bŏ hjiê, mâo djăp mnơ̆ng ƀơ̆ng huă, myun mdan hlăm thŭn. Mnơ̆ng ngă yang jing sa drei kbao. Bi klei ngă yang êa jing ngă yang hŏng ŭn, čiăng kơ grăp gŏ sang mâo klei hdĭp trei mđao, yâo mơak, anak čô ênŭm ênap, amâo mâo pô knap mñai. Kơ klei ngă yang ya dŏ mâo ba dŏ anăn yơh, pô ba briah, pô ba mnŭ, pô ba čeh kpiê, jih jang mnuih ƀuôn sang hlăm ƀuôn srăng nao ngă yang thŭn mrâo, yan mrâo.”

Klei ngă yang akŏ thŭn mrâo mơ̆ng mnuih Jarai amâo djŏ knŏng jing klei bhiăn myang ƀiădah lŏ jing wưng kơ grăp čô hlăm ƀuôn bi tuôm, bi mguôp ƀuôn sang. Dŭm klei bhiăn đưm sơnăn dưi djă pioh leh anăn bi mlih brei djŏ guôp, đru kơ phung mda asei thâo săng kơ knhuah gru dhar kreh, mbĭt năn bi mguôp êpul êya hlăm klei hdĭp mrâo mrang./.