Ngă yang, mbĭt hŏng bruă duah mnơ̆ng ngă yang, gŏ sang pô hma iêo ênŭm ênap êkei mniê hlăm ƀuôn đru kơ gŏ sang buh mdiê. Gŏ sang mprăp dŭm mta mnơ̆ng msĕ mjeh mdiê, mjeh ktơr, asăr kmŭn, ya ut, mjeh trŏng, mjeh amrêč. Bi kơ mnơ̆ng ngă yang, hluê si klei găl gŏ sang dưi mâo ŭn amâodah mnŭ leh anăn kpiê čeh. Phung hlăm ƀuôn nao đru ba mbĭt đĭng nuh čiăng trôk asăr mjeh.

Amĭ Nư ti să Ea Wer, čar Dak Lak brei thâo, klei ngă yang buh mdiê jing sa kdrêč yuôm hlăm klei hdĭp mơ̆ng mnuih Mnông, bi êdah klei bi mguôp êpul êya.

Leh êmiêt pưk hma, gŏ sang srăng mprăp buh mdiê. Êlâo hĭn srăng duah mjeh mdiê jăk, leh anăn hưn hŏng grăp čô hruê đru pô buh mdiê. Leh klei ngă yang, êkei kăp kjuk ƀăng, mniê tiŏ buh nah tluôn. Leh sa hruê buh mdiê hlăm hma gŏ sang bi huă ƀơ̆ng iêo grăp čô bi huă êsei, mnăm kpiê čeh.

Aguah ưm, pô hma ruah sa anôk dlông hĭn hlăm hma, êmiêt bi doh ngă pưk mdưm mnơ̆ng ngă yang. Ti djiêo jing sa boh bung mâo asăr mjeh, kpiê čeh dưi mbŏ êa, mnŭ leh čuh, sa gŏ điŏ, mbĭt hŏng dŭ mta mnơ̆ng msĕ si wăng, giê sơmuôr, đĭng nuh. Klei kwưh hưn hŏng yang čư̆, yang dliê, yang hma, hmăng mâo angĭn hjan siam, čiăng kơ mdiê čăt đĭ, amâo mâo mnơ̆ng bi rai, mâo lu boh mnga. Leh ngă yang, pô sang tuh asăr mdiê hlăm đĭng nuh, kjuk ƀăng leh anăn buh. Leh anăn mnuih ƀuôn sang hlăm ƀuôn ngă hluê. Amĭ Ly, ti să Ea Wer, čar Dak Lak brei thâo, klei bhiăn anei mơ̆ng mnuih Mnông mâo leh mơ̆ng đưm.

‘Êlâo dih knŏng knang kơ yan adiê, amâo mâo hbâo pruê, kyuanăn leh jah ênăh ngă hma diñu buh mdiê ti hma anăn 2 - 3 thŭn, leh lăn sah kba diñu nao jah ti ksơr hđăp, leh 3 thŭn lŏ wĭt buh hma êlâo. Diñu amâo lŏ bi rai dliê ôh. Ară anei djăp hma bi pla êtak, ktơr leh anăn kbâo, bi mdiê knŏng ngă mdiê lŏ đuč, mnuih ƀuôn sang đĭ kyar leh, ngă djŏ klei bhiăn, amâo duah bi rai dliê, ƀiădah klei ngă yang hma êlâo kơ mŭt yan ăt ngă djŏ hŏng klei bhiăn đưm”.

Leh ruê̆ sa hruê mă bruă ti hma, gŏ sang pô hma hŏng grăp čô bi huă ƀơ̆ng leh anăn hlăp lêñ, kdŏ mmuñ, bi êdah klei bi mguôp. Ară anei, grăp thŭn ti dŭm ƀuôn mnuih Mnông ngă ƀiă êdi sa blư̆ klei ngă yang, čiăng bi êdah klei lač jăk hŏng yang brei leh kơ mnuih ƀuôn sang mâo boh mnga./.