Klei rang mdah “Thŭn mlan ka kbưi – Gia Lai –Kon Tum êdei thŭn 1975” mkŏ mjing ti wăl tač bi mguôp, ƀuôn prŏng Pleiku, rang mdah 150 pŏk rup yuôm kơ klei hdĭp mnuih ƀuôn sang ti Gia Lai – Kon Tum hlăm dŭm thŭn tal êlâo leh  mtlaih êngiê. Dŭm pŏk rup klă klơ̆ng kơ klei hdĭp, klei hriăm, klei mă bruă knuă…bi êdah ai tiê gĭr ktưn găn klei dleh dlan mơ̆ng mnuih ƀuôn sang leh hruê mâo klei êngiê.

Ti sang djă piôh mnơ̆ng đưm čar Gia Lai, klei rang mdah hŏng akŏ “Gia Lai 50 thŭn mkŏ mjing leh anăn đĭ kyar” hưn mdah 3 mta phŭn mâo: Ea mil dhar kreh Gia Lai, Gia Lai hlăm klei krŭ kdơ̆ng mtaih êngiê djuê ana, 50 thŭn mkŏ mjing leh anăn đĭ kyar. Klei rang bi klă knuă gru hing ang leh anăn dŭm boh tŭ dưn bruă duh mkra, dhar kreh, ala ƀuôn, klei êđăp ênang mơ̆ng čar, mbĭt anăn bi klă klei đăo knang kơ klei gĭt gai mơ̆ng Đảntg. Leh anăn jing klei rang mdang “50 thŭn klei čih yăl dliê čar Gia Lai” rang mdah 80 pŏk rup kač, rup siam mbĭt hŏng 120 hdră ksiêm duah kơ klei čih yăl dliê. Dŭm klei rang mdah anei pŏk ƀăng truh hruê 4/5.