“Knuă druh nao B” jing boh blŭ čiăng lač kơ phung knuă druh mơ̆ng kwar Dưr hŏng ai tiê čŏng pô găn čư̆ Trường Sơn nao ti kwar Dhŭng bi blah hlăm wưng mơ̆ng 1965 – 1975. Hlăm hruê knăm ti Gia Lai, hlăm ai êwa kdrưh kơăm leh anăn mgei ai tiê, 11 čô knuă druh nao B leh anăn găp djuê mơ̆ng 22 čô knuă druh mkăn tŭ mă dŭm hlâo hră mơar dưi djă pioh jăk hlăm êbeh 50 thŭn.

Dŭm mă mnơ̆ng hlăm anăn mâo: Hră mơar, hră čih, mêđai, hră mkiêt mkiêm amâodah hră kak asei…jing ngăn prăk mâo phung knuă druh, phung hriăm lu kwar Dưr mơĭt ti Êpul hluh hlir gưl dlông, êjai čŏng pô nao ti kwar Dhŭng kyua klei mĭn krŭ kdơ̆ng. Anei jing dŭm mta mnơ̆ng bi klă kơ ai tiê siă suôr leh anăn klei đăo knang hlăm klei mĭn mtlaih êngiê djuê ana mơ̆ng sa ênuk “nao” kyua lăn čar.

Phạm Văn Nguyên (82 thŭn), sa čô nai dưi tiŏ nao ti kwar Dhŭng thŭn 1972, mgei ai tiê êjai djă ti kngan dŭm mta mnơ̆ng ênuk hlăk ai:

 “Mbĭt hŏng kâo thŭn anăn mâo 5 čô ayŏng adei nao sa hruê. Ară anei mă hră mơar, kâo mgei ao tiê. Mah jiăng nao hŏng kâo đa đa luč leh, amâo thâo dưi mă mơh hĕ. Hră mơar anei jing mnơ̆ng yuôm bhăn amâodưi wơr ôh hŏng kâo. Kâo dôk ti Gia Lai mâo 53 thŭn, ară anei dưi wĭt tinei jing klei hơ̆k mơak kâo”.

Leh knăm jao wĭt hră mơar, čar Gia Lai mphŭn pŏk klei rang mdah “Krŭ kdơ̆ng krĭng lăn Bazan”. Mkŏ mjing truh jih hruê 30/4, klei rang mdah lĭ bi bi êdah bruă krŭ kdơ̆ng leh anăn krŭ wĭt mơ̆ng lĭng kahan, mnuih ƀuôn sang Gia Lai mơ̆ng leh mâo klei kuôl kă Geneva thŭn 1954 truh kơ ară anei. Klei rang mdah dưi mbha jing dua gưl jing “Găn săp pui klei bi blah” leh anăn “Kpưn đĭ ti krah čư̆ čhiăng”. Hluê anăn lŏ bi êdah dŭm êtuh hră mơar, rup yuôm kơ klei mtlaih êngiê Gia Lai (17/3/1975) leh anăn mtlaih êngiê kwar Dhŭng (30/4/1975), ăt msĕ mơh dŭm klei gĭr krŭ wĭt leh anăn mđĭ kyar mơ̆ng čar Gia Lai, mơ̆ng sa čar krĭng čư̆ čhiăng dleh dlan ƀrư̆ ƀrư̆ jing alŭ wăl mâo klei đĭ kyar pral.

Đỗ Xuân Quý, sa čô găp djuê mơ̆ng knuă druh nao B, mbĭt leh hŏng 4 gưl hlăm gŏ sang nao hlăm klei rang mdah hŏng lu klei mgei ai tiê:

"Kâo mgei ai tiê êdi. Kâo ba mbĭt gŏ sang, anak čô hriê tinei čiăng dưi thâo kơ knhuah gru aê ama, čiăng lŏ čuê, čiăng răng mgang lăn čar Việt Nam ƀrư̆ hruê ƀrư hơĭt kjăp”.

Knăm jao wĭt hră mơar knuă druh nao B leh anăn klei rang mdah “Krŭ kdơ̆ng krĭng lăn Bazan” dưi mkŏ mjing djŏ wưng lăn čar mđing truh bi hdơr 50 thŭn hruê hluh hlir lăn čar, đru bi lar hbuê ênuk hing ang leh anăn klei hdĭp mrâo mrang. Hdră bruă msĕ sa klei mtă mtăn kơ ênuk mda asei hruê anei hdĭp năng hŏng hƀuê ênuk, leh anăn mâo bruă klam rŭ mjing êdei anăp lăn čar.