Mâo leh lu blư̆ jing pô bi blŭ hlăm klei mjing amĭ ama, snăn Aê Sên ti Buôn Tơng Jŭ, Ƀuôn hgŭm Ea Kao, čar Daklak lač, klei mjing amĭ ama, amâodah duah anôk đĭ huă mơ̆ng anak Êđê jing sa klei bhiăn jăk siam snăk, hlăm anăn mâo klei  mjuăt bi hriăm hlăm yang ƀuôn, tơdah leh dua čô mnuih tal êlâo ka thâo kral ƀiădah truh kơ klei mjĕ mjing iêo amĭ iêo ama, jing hĕ mmnuih sa boh sang. Mkŏ mjing klei mjĕ mjing brei mâo klei mprăp hĕ bi jăk, lehanăn ngă hlăm klei thâo bi mpŭ:

‘Klei mjing amĭ, mjing ama mơ̆ng anak Êđê snăn êlâo hĭn, êngao kơ ênŭm ênam jih jang găp ênuê djuê êpul dua nah snăn lŏ mâo dŭm klei thâo săng kơ klei bhiăn, čĭng bi mblang lehanăn ngă bi mngač hĭn djŏ tui si klei bhiăn mâo leh mơ̆ng đưm, lehanăn bruă klam mơ̆ng dua nah, leh klei mjĕ mjing jing leh amĭ jing leh ama, mâo snăn kơh dưi đru kơ dua nah kjăp djă pioh klei anăn lă lar”.

Ară anei, klei bhiăn mjing amĭ mjing ama mơ̆ng anak Êđê ăt kreh mkŏ mjing. Mnơ̆ng mđup brei amâo mâo jing yuôm ôh, dah mâo ŭn điêt, mâo mnŭ knô, sa čeh kpiê, leh dnăn dua boh kông pioh mjing mnơ̆ng bi buh ti kngan dua nah. Tơdah mnuih ngă klei mjing amĭ ama lĕ hlăm klei dleh dlan, ƀiăwdah mâo klei čiăng mjĕ mjing, snă\n amâo mâo guôn mprăp lu ôh, khă bi mâo sa čeh kpiê, lehanăn djăp ênŭm dua nah găp djuê, mâo mnuih bi mklă, amâo mâo guôn dŏ yuôm ngăn tŭ ôh.

Êjai Aê Sên jing pô bi ala kơ găp djuê lač; klei mjing amĭ anak mâo mkŏ mjing ti anăp dua nah găp djuê thâo, pô jing anak kgŭ mă tŏ kpiê mơ̆ng pô bi ala ba kơ mniê anăp jing amĭ mjing, bi êdah klei thâo mpŭ. Leh kơ anăn, pô jing anak mđup brei kơ pô tal dua hlăm găp djuê.

Tui si klei bhiăn anak Êđê, mnuih yap jing anak hlăm klei mjing anăn srăng dưi dưn jih jang klei tŭ dưn  kơ ai tiê lehanăn mnơ̆ng dhơ̆ng. leh anăn, pô jing anak anăn srăng mâo bruă klam hŏng amĭ ama mjing, amâodah ayŏng amai adei hlăm sang pô mjing leh anăn jing ayŏng jing adei pô mơh. Pô jing amĭ mâo bruă klam srăng mtă mtăn mtô mblang, mâo klei khăp, lehanăn klei thâo mđing uêñ msĕ hŏng anak pô kkiêng mơh. Mklăk hŏng anak anak mjing brei mâo klei thâo mpŭ, lehanăn dlăng ba amĭ mjing msĕ hŏng amĭ pô kkiêng mơh.

 Amĭ H’ước, ti buôn Tơng Jŭ, ƀuôn hgŭm Ea Kao, čar Daklak lač:

‘Tơdah pô mjing amĭ ama, snăn pô yap amĭ ama anôk mjing anăn ăt jing msĕ si amĭ ama kkiêng pô mơh. Jih jang djăp mta ra klei mơak mñai, ênguôt hnĭng đru bi klam. Ami ama dju djuăm duam ruă anak bi dlăng ba mdrao mgŭn, tơdah gŏ sang mâo klei amâo mâo jăk snăn pô đru mklam mbĭt. Kyuanăn, tơdah dua nah mâo leh klei mjĕ mjing brei mâo pô bi klă mơ̆ng dua nah găp djuê, lehanăn pô ngă klei kuôl kă čiăng truh kơ klei bi tŭ ư sa ai mbĭt, anăn yơh jing klei yuôm bhăn hĭn”.

Tui si klei bhiăn mâo leh mơ̆ng đưm anak Êđê, mnuih yap jing anak mjing, srăng jing anak msĕ si anak kkiêng, hdĭp mda mơak mñai ênguôt hnĭng bi mâo mbĭt. Čiăng dưi bi sĭt klei anei, snăn bi mâo amiêt khua awa mduôn jing pô bi sĭt. Aê Sên ti ƀuôn hgŭm Ea Kao, čar Daklak brei thâo:

“Tơdah mkŏ mjing leh klei đĭ huă, mjing amĭ ama anăn, tơdah sa hlăm dua nah amâo lŏ čiăng ôh, čiăng lăm lui yơh klei jing amĭ jing ama anăn, snăn hlei pô ngă soh srăng ba kđĭ kơ pô adih. Mmông anei pô bi blŭ msĕ si hmei srăng mblang hĕ bi nik kơ dua nah thâo săng kơ klei bhiăn, lehanăn kơ ênoh đŭ kyua ngă soh hŏng klei leh kuôl kă, luič sa drei ŭn ba kđi ti anăp amiêt khua awa mduôn, jing pô bi blŭ msĕ hŏng hmei”.

Klei bhiăn mjing amĭ ama, anôk đĭ huă mơ̆ng anak Êđê jing klei hrăng, pioh hyuă kjăp klei thâo bi mguôp plah wah dua nah jing msĕ si sa thung k’ŭt, sa găp sa djuê. Hlăm klei hdĭp ênuk ară anei, khădah mkŏ mjing klei mjĕ mjing amâo mâo ktrŏ msĕ si mphŭn dô ôh hlăm klei bhiăn mkŏ mjing, ƀiădah anei jing knhuah bi êdah klei jăk siam kơ klei khăp, kơ bruă klam, lehanăn mjing sa klei hyuă kjăp djă pioh nanao klei jăk siam anăn, mjing sa knhuah jăk hlăm dhar kreh, năng bi kriê pioh lehanăn brei thâo mpŭ./.