Găn hlăm 35 thŭn mkŏ mjing lehanăn mđĭ kyar, Êpul hgŭm mă rup mniê Hải Âu- jing sa boh sang kơ phung mă rup mniê bi êdah leh klei mbruă pô hlăm klei mă rup, mâo ba wĭt leh lu klei pah mni hlăm klei bi lông mơ̆gn êpul mă rup Việt Nam lehanăn hŏng ala tač êngao. Ƀri bi hdơr 35 thŭn hrue mkŏ mjing, Êpul hgŭm mă rup Hải Âu mâo rang mdah leh lu rup hŏng lu êa mil jăk siam lač kơ  “Knhuah siam klei hdĭp mơ̆ng djăp djuê ana Việt Nam”.

 54 pŏk rup jing jăk hĭn mâo yuôl mdah, dưi hrŏng ruah leh mơ̆ng 298 pŏk rup mơ̆ng 25 čô pô mă rup dăp yuôl hlăm ênoh “knhuah siam klei hdĭp mơ̆ng dŭm djuê ana Việt Nam”. Nguyễn Hồng Nga, Khua hlăm êpul hgŭm phung mă rup Việt Nam,  K’iăng khua êpul hgŭm phung mă rup ƀuôn prŏng Hồ Chí Minh, K’iăgn khua êpul hgŭm phung mă rup Hải Âu brei thâo:

     “Čiăng dưi mâo dŭm mta rup siam pioh dăp dưmhlăm hdruôm “Knhuah siam klei hdĭp dŭm djuê ana Việt Nam:, Êpul hgŭm hmei hiu mă leh rup truh hlăm dua thŭn dôk dăp, lehanăn mâo hrŏng ruah mơ̆ng dŭm êbâo pŏk rup, čiăng duah dŭm mta rup jing jăk hĭn pioh dăp hlăm hdruôm hră yuôl mdah rup anei. Anei jing sa mta bruă dleh, tal anei mâo truh 36 djuê ana, hmei mâo dăp leh rup hlăm hdruôm hră, kñăm ba jih jang dŭm djuê ana mơ̆ng dưr hlŏng kơ dhŭng, mơ̆ng lăn dap kngư, krĭng dap mnai truh krĭng taih kbưi, ti anôk hmei truh leh hlăm dăl 35 thŭn êgao.”

   Nao dlăng rup mâo lu mnuih dưi ƀuh knhuah siam mơ̆ng lăn ala dliê kmrơ̆ng, anak mnuih lehanăn dhar kreh hlăm djăp čar kwar mâo leh phung mă rup bi êdah ai tiê klei mĭn pô hŏng rup anei jing phung mniê hiu mă rup mơ̆ng êpul hgŭm Hải Âu. Nguyễn Trùng Nhị, ɃP Hồ Chí Minh, lač:

    “Anôk phung amai adei hải Âu kliêng êjai mă rup dưi bi êdah jih kơ knhuah klei jing kơ djuê ana, bŏ hŏng klei năng mpŭ, dưi bi êdah leh knhuah dhar kreh mdê mdê mơ̆ng dŭm djuê ana, dôk hlăm knhuah dhar kreh mbĭt mơ̆ng Việt Nam.

Trà My, pô dôk hriăm ti sang hră gưl prŏng Rmit, brei thâo: 

    “Hriê dlăng klei yuôl mdah rup anei, hrue anei, kâo dưi thâo ƀuh lu knhuah siam hŏng lu êa mil mdê mdê, lač kơ rup klei jing kdrưh k’ang. Dưi bi êdah klei siam mơ̆ng anak mnuih amâo mâo djŏ knŏng ti ƀô̆ mta, ƀiădah nao mđrĭng anăn jing klei siam mbĭt hŏng ƀuôn sang, lăn êa, hŏng dliê kmrơ̆ng amâo mâo dưi tlaih ôh hŏng anak mnuih jing anôk digơ̆ hdĭp mda”.

   Mbĭt hŏng dŭm bruă yuôl mdah rup, Êpul hgŭm Hải Âu lŏ kah sa ênoh prăk mâo mơ̆ng bruă rang mdah rup, pioh kơ keh đru dŏng, mđrăm mbĭt sa ai tiê ngă klei bi đru hŏng phung dôk găn klei dleh dlan, boh nik phung djŏ êa drao ruă diosin. Klei yuôl mdah rup “Knhuah siam klei hdĭp dŭm djuê ana Việt Nam” pŏk êngiê ƀăng bhă ti sang dăp pioh ngăn drăp phung mniê Việt Nam hlŏng truh jih hrue 15/10./.