Kban Rạch Miễu 2 (ti êa krông Tiền) mkŏ čar Tiền Giang hŏng Bến Tre mâo ênoh bi liê êbeh 6.800 êklai prăk dôk mjêč bi leh čiăng ba yua. Snăn Bến Tre - Tiền Giang mâo leh 2 kban “mkŏ klei mơak”, msir mgaih klei “kpăk đuôm êdeh” mâo nanao hlăm lu thŭn êgao. Trần Văn Bon, Kgua Knơ̆ng bruă rŭ mkra čar Tiền Giang hơ̆k mơak brei thâo:

“Kban Rạch Miễu anei bi leh êbeh 80%, hdră bruă anei bi leh êmưt hĭn hlăm hruê 2/9/2025. Anei jing klei yuôm bhăn snăk kơ klei mđĭ kyar bruă duh mkra - ala ƀuôn 1 čar Tiền Giang leh anăn  Bến Tre leh anăn dŭm čar ktuê hang ksĭ mơ̆ng krĭng”.

Hŏng lu prăk bi liê mơ̆ng gưl dlông, alŭ wăl, kah knar grăp thŭn, čar Tiền Giang duh bi liê êbeh 800 êklai prăk mđĭ kyar anôk bruă êlan klông nah gŭ. Dŭm hdră bruă pŏk mlar, mđĭ dŭm ktuê êlan phŭn klă klơ̆ng bi leh, bruă găn êrô mnuih ƀuôn sang găl ênưih, êdeh ô tô dưi nao truh ti dŭm să, alŭ. Ngô Tấn Lâm, ti să Tam Bình, kdriêk Cai Lậy, čar Tiền Giang bi êdah:

“Kâo hdĭp 2 gưl kiă kriê snăn ƀuh gưl anei jăk snăk, êlan klông krĭng ƀuôn sang đĭ kyar. Grăp boh sang mâo sơăi  êdeh 2-3 boh, mnuih ƀuôn sang mdrŏng sah. Kban êlan ară anei pô nao truh, alŭ Ngũ Hiệp ară anei dưi mkŏ kban jăk snăk, mnuih ƀuôn sang mdrŏng. Hlăm dŭm thŭn êlâo dih, mnuih ƀuôn sang mkra sang ti tur lăn, ƀiădah ară anei mkŏ mkra krĭng ƀuôn sang hŏng bê tông, mâo sang mkra 3-5 tal, Anôk ba čhĭ mnơ̆ng dhơ̆ng lŏ hma kyua mâo kban anăn găl ênưih, snăk”.

Bến Tre tuôm dlăng jing “plao ksĭ” kyua mâo mơ̆ng 3 plao êa, êa krông lu snăk. Truh ară anei, dŭm hô̆ mtam găn êa krông dưi hrô hŏng kban bê tông kjăp. Thŭn dih, Bến Tre jing alŭ wăl tal êlâo mơ̆ng krĭng dap Mnai krông Cửu Long mphŭn ngă bruă hdră bruă rŭ mkra ktuê êlan jơ̆ng ktuê hang ksĭ. Nguyễn Trúc Sơn, K’iăng Khua Knơ̆ng bruă sang čư̆ êa čar Bến Tre brei thâo:

 “Ktuê êlan hang ksĭ, thŭn 2024 hmei pŏk ngă leh sa kdrêč leh anăn sa boh kban. Thŭn 2025 hmei lŏ dơ̆ng mkŏ mjiing ktuê êlan hang ksĭ anei, êlâo hĭn mkŏ hŏng čar Tiền Giang leh anăn čar Trà Vinh, jing 2 anôk mâo hdră bruă nah gŭ prŏng hmei tuh êyuh jing ai tiê rŭ mkra hdră bruă anei hlăm thŭn 2025, hŏng klei găl dăp leh kơ wưng 2024-2025”.

Truh ară anei, čar Sóc Trăng mâo 17 ktuê êlan mjing sa hdră êlan klông mlir, đru mđĭ kyar bruă duh mkra - ala ƀuôn leh anăn iêô jak duh bi liê dŭm hdră bruă hlăm čar. Boh nik mĭn tĭng truh hruê 30/4 thŭn anei, kban Đại Ngãi 2 leh anăn kdrêč mkŏ 2 kdriêk Long Phú leh anăn kdriêk Cù Lao Dung (Sóc Trăng) srăng bi leh, mjing klei mkŏ êlan lông găl ênưih plah wah dŭm čar ktuê hang ksĭ nah Dhŭng leh anăn hŏng ƀuôn prŏng Hồ Chí Minh. Nguyễn Thanh Chiều, Khua Êpul hgŭm bruă lŏ hma An Phát ti să An Thạnh 1, Cù Lao Dung, Sóc Trăng, brei thâo:

 "Hlăk êlâo Cù Lao Dung mâo êa krông, ngă gun kpăk, tơdah pô găn êa krông srăng dleh dlan. Kban Đại Ngãi bi leh, găn êrô snăn Êpul hgŭm bruă hmei srăng mđĭ kyar hĭn, mâo ai ktang bi ktưn lu hĭn hŏng mnơ̆ng dhơ̆ng boh kroh, boh nik boh soai. Hmei dôk mâo hdră kčah pŏk anôk mkra mjing boh suai êun leha năn mđi’ kyar hiu čhưn ênguê hlăm wăl jăk siam”.

Ti dŭm alŭ wăl mkăn msĕ si An Giang, Đồng Tháp, Cà Mau, Vĩnh Long anôk bruă êlan klông nah gŭ ăt dưi bi leh, bi hrŏ klei bi kpleh dŭm alŭ wăl, bi hrŏ wưng găn êrô kơ mnuih ƀuôn sang.

 Hlue si Phŭn bruă rŭ mkra, ară anei, krĭng dap mnai Krông Cửu Long ăt ngă leh, leh anăn dôk pŏk ngă 9 hdră bruă êlan klông yuôm bhăn ala čar hŏng ênoh bi liê hlăm brô 106.000 êklai prăk. Năng ai dưi bi mklă ka tuôm mâo ôh anôk bruă êlan klông krĭng dap mnai krông Cửu Long mâo hlăm brô 1.200 km êlan dơ̆ng êran pral hŏng 3 ktuê êlan Dưr -Dhŭng leh anăn Ngŏ -Yŭ. Truh ară anei, krĭng anei ăt čuăl mkă leh tač êdeh phiơr, êlan êrô hlăm êa ti krĭng wăl.

Boh sĭt brei ƀuh, êlan klông nao êlâo, bruă duh mkra đĭ kyar mbĭt. Thŭn êgao, hnơ̆ng đĭ kyar bruă duh mkra mơ̆ng krĭng dap mnai Krông Cửu Long mâo 7,3%, lu hĭn hnơ̆ng kah knar mbĭt kluôm ala. Prăk hrui wĭt kah knar grăp čô mnuih hlăm krĭng mâo 80,7 êklăk prăk hlăm thŭn 2024.

 Hŏng dŭm hdră bruă, êlan klông dôk dưi bi leh leh anăn mjêč bi leh hlăm dŭm thŭn kơ anăp srăng jing klei găl yuôm bhăn đru kơ krĭng lăn mâo Dua păn êa krông “kpưn đĭ” mđĭ kyar, kjăp ktang mŭt hlăm ênuk mrâo mơ̆ng ala čar./.