Hŏng akŏ “Ênai čing čhar Lăn Dap Kngư - Ngŏ Dhŭng Asi bi klin”, hdră mâo 12 êpul tông čing mơ̆ng Gia Lai, Dak Lak, Lâm Đồng, dŭm čar nah Dưr hŏng dŭm êpul kdŏ mmuñ Thái Lan, Lào leh anăn Malaysia. Hdră kñăm mpŭ kơ Wăl dhar kreh čing čhar Lăn Dap Kngư - mnơ̆ng kriê pioh dhar kreh amâo êdah klă bi ala kơ anak mnuih, mbĭt anăn hưn mdah knhuah dhar kreh leh anăn klei găl hiu čhưn ênguê mơ̆ng čar Lâm Đồng.

Hlue si Đinh Văn Tuấn -  K’iăng Khua Knơ̆ng bruă sang čư̆ êa čar Lâm Đồng, dŭm bruă ngă srăng dưi mkŏ mjiing hrăm mbĭt ti 3 krĭng jăk siam: “êbâo mnga” Đà Lạt, “êa ksĭ mtah” Bình Thuận leh anăn “Dap kngư Liă lia” Dak Nông. Klei anei mđing kơ bruă mkŏ mjing Festival Čing čhar grăp gưl 2 thŭn sa blư̆, đru răng kriê mnơ̆ng kriê pioh, mđĭ klei bi lông kưt mmuñ Ngŏ Dhŭng Asi leh anăn bi mklă kơhưm Lâm Đồng - krĭng lăn bi klin lu mta, lar bra ênoh yuôm dhar kreh Lăn Dap Kngư kơ dlông rŏng lăn.