Nguyễn Thái Tường Vân, Khua knơ̆ng bruă hiu atăt tuê Thái Loan, mâo anôk bruă ti Đông Nai brei thâo, knơ̆ng bruă mâo Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Lâm Đồng iêo jak nao hgŭm hlăm êpul ksiêm dlăng dŭm anôk hiu čhưn ênguê, wăl anôk hƀuê ênuk - dhar kreh, mnơ̆ng ƀơ̆ng huă, anôk hlăp mblul…hing ang ti 3 alŭ wăl Mũi Né, Đà Lạt leh anăn Gia Nghĩa. Klă klơ̆ng, êpul nao ksiêm dlăng dŭm anôk siam gưl ala čar Bàu Trắng, sang djă pioh êa msĭn leh anăn dlăng hdră Fisherman Show (Mũi Né), Delight Park Đà Lạt, XQ Sử quán; anôk hiu čhưn ênguê Langbiang Land  leh anăn hdră rang mdah “Kuič mngač krĭng lăn hing ang (Đà Lạt)”, anôk hiu čhưn ênguê tà Đùng, ƀuôn hiu čhưn ênguê Eva Village, Sang rang mdah ênai Gia Nghĩa),.. hŏng Nguyễn Thái Tường Vân, dŭm anôk anei ba wĭt lu klei ktuê dlăng jăk êdi:

“Ti Phan Thiết (hđăp), kâo ƀuh mâo hdră Fisherman Show jăk êdi mnuih ƀuôn sang Việt Nam drei lu jing ka thâo ôh, mkŏ mjing hlăm dŭm mlan êgao. Kâo hmăng hmưi dŭm hdră anei srăng ba truh kơ phung tuê klei rang mdah jăk êdi. Kâo pô ngă bruă hiu čhưn ênguê 29 thŭn leh ăt ƀuh klei jăk êdi hŏng dŭm hdră mrâo anei.

Bi Hoàng Công Định,, khua knơ̆ng bruă Dima-tour mñă klă, čar Lâm Đồng mrâo jing anôk hiu čhưn ênguê jăk êdi, mâo ênŭm dŭm mta msĕ si čư̆ dlông, ênao prŏng, êa ksĭ leh anăn plao ksĭ siam. Kyuanăn, anăn knăl bruă hiu čhưn ênguê srăng dưi pŏk mlar hĭn. Ti anăp klei anăn, dŭm anôk bruă hiu čhưn ênguê srăng mkŏ mjing dŭm mnơ̆ng dhơ̆ng mlir krĭng hro kơ tour hjăn păn. Klă klơ̆ng jing mkra mjing bruă hiu čhưn ênguê msĕ si êa ksĭ, čư̆ dliê bi mguôp hŏng anôk mdei msăn Mũi Né, Phú Quý  leh anăn Đà Lạt, nao čuă dŭm anôk hiu čhưn ênguê yang ƀuôn ti Dak Nông (hđăp). Khădah mâo lu klei găl, ƀiădah hluê si Định, klei kơ êlan klông ăt dôk jing klei kpăk kơ klei mkŏ krĭng plah wah Mũi Né, Đà Lạt leh anăn Gia Nghĩa.

“Mơ̆ng bi mŭt mbĭt, hmei mkŏ mjing dŭm tour plah wah Mũi Né leh anăn Đà Lạt, ƀiădah dôk kpăk hŏng bruă ba ti Dak Nông hđăp kyua êlan klông kbưi leh anăn phung tuê ka dưi bi djŏ guôp hŏng bruă nao mơ̆ng Mũi Né truh ti Dak Nông hlăm 10 mmông. Hmei dưi mkŏ mjing dŭm bĭt êlan jĕ hĭn, amâodah êdei dih êjai Mũi Né đĭ kyar tač êdeh phiơr srăng ba tuê mơ̆ng Mũi Né nao ti Đà Lạt leh anăn mơ̆ng Đà Lạt nao ti Dak Nông srăng pral hĭn.

Hŏng klei găl mơ̆ng čưl dliê, mnơ̆ng kriê pioh, čar Lâm Đồng dôk bi klă kơhưm jing anôk mâo klei găl leh anăn mdê hĭn. Ƀiădah, čiăng bi mguôp dŭm mnơ̆ng dhơ̆ng, anôk hiu čhưn ênguê ti dŭm alŭ wăl mâo hnơ̆ng tŭ jăk, mâo ai bi ktưn jing boh klei hŏng bruă kriê dlăng leh anăn phung ngă bruă hiu čhưn ênguê. K’iăng khua nai prŏng, nai prĭn Phạm Thị Huyền sang hră gưl prŏng Kinh tế Quốc dân Hà Nội  lač: Lâm Đồng ară anei amâo djŏ knŏng mâo 1 amâodah 2 yan, ƀiădah mâo truh 4 yan. Si srăng ngă čiăng duah klei găl, klei msĕ, êjai phung tuê hruê hŏng Lâm Đồng srăng dưi ktuê dlăng kluôm dhuôm.

“Bruă Lâm Đồng mrâo srăng ngă jing bi kƀĭn jih jang dŭm mta drei mâo hlăm sa klei hưn  hŏng phung tuê. Kâo pô lač bruă mkŏ mkra ară anei ti čar Lâm Đồng ăt ka dưi mkŏ kjăp ôh, klei mkŏ bruă hiu čhưn ênguê plah wah 3 alŭ wăl adôk êdu. Si srăng ngă čiăng mâo sa Lâm Đồng, grô kơ 3 Lâm Đồng msĕ hŏng êlâo dih”.

Čiăng mgaih msir boh klei êlan klông mkŏ dŭm anôk hiu čhưn ênguê ti alŭ wăl, Lâm Đồng dôk akâo kơ gưl dlông ba hlăm klei čuăl mkra êlan dơ̆ng pral Ngŏ Yŭ mkŏ Phan Thiết - Bảo Lộc - Gia Nghĩa. Phạm Văn Mạnh, khua knơ̆ng bruă mkŏ mkra čar brei thâo:

“Ară anei phŭn bruă mkŏ mkra sa ai hŏng bruă anei. Knŏng kơ mkra mđĭ êlan mơ̆ng Gia Nghĩa nao ti Di Linh leh anăn êlan dơ̆ng mrô 28B, ară anei dưi duh bi liê mkra mđĭ, êlan mơ̆ng Di Linh wĭt ti Gia Nghĩa dôk akâo kơ gưl dlông dăp hlăm ênoh prăl wưng man dưn čiăng mkra mđĭ. Ti anăp, hmei mñă kơ čar dăp ngăn prăk čiăng mkra mđĭ, ênưih êrô êbat, găl kơ tuê hiu čhưn ênguê.

Mbĭt hŏng bruă duh bi liê kơ êlan klông, bruă hiu čhưn ênguê Lâm Đồng ăt dôk tă hdră kơ bruă hiu čhưn ênguê kluôm, hơĭt kjăp leh anăn kdlưn hĭn. Nguyễn Văn Lộc, khua knơ̆ng bruă dhar kreh, mjuăt asei mlei leh anăn hiu čhưn ênguê čar Lâm Đồng brei thâo, bruă hiu čhưn ênguê mâo leh hdră êlan ba yua klei găl mơ̆ng čar Lâm Đồng hlăm hră kak hiu čhưn ênguê hlăm lăn čar.

“Hmei srăng mkŏ mjing lu mta bruă, sa anôk truh 3 alŭ wăl ti čar Lâm Đồng. mbĭt anăn mkŏ mjing dŭm tour, êlan hiu čhưn ênguê mrâo čiăng mkŏ 3 krĭng, đru kčĕ hŏng Bruă sang čư̆ êa čar, Êpul khua bruă Đảng čar ba mdah hdră mtrŭn kơ mđĭ kyar bruă hiu čhưn ênguê wưng thŭn 2025 - 2030 leh anăn tă hdră truh thŭn 2045.

Dŭm hdră ngă hlăm klei čuăl mkă, mkŏ krĭng leh anăn tă hdră mđĭ kyar bruă hiu čhưn ênguê brei ƀuh klei kpưn đĭ ktang phĭt mơ̆ng bruă hiu čhưn ênguê čar Lâm Đồng. Hluê anăn bi klă kơhưm mơ̆ng sa anôk truh lu klei găl leh anăn mdê hĭn hlăm klei ktuê dlăng mơ̆ng phung tuê.