Hlăm 2 mlan knhal jih thŭn, čar Lâm Đồng srăng mkŏ mjing lu klei mjing ai êwa jăk mơak, iêô jak tue hiu čhưn hlăm leh anăn êngao ala čar hŏng klei mñă jing Knăm mơak čing čhar Ngŏ Dhŭng Asi thŭn 2025, Knăm mơak čê lu ala čar, Knăm mơak drông thŭn bhang mrâo 2026… Mbĭt hŏng anăn čar ăt mđĭ ktang bruă mtrŭt mjhar, hưn mdah hiu čhưn ênguê mơ̆ng bruă yua ênoh mrô anôk truh, pŏk mlar klei bi hgŭm lu ala čar leh anăn nao hlăm klei hiu čhưn ênguê prŏng.

 Hlăm anăn Knăm mơak čê lu ala čar - World Tea Fest 2025 hnơ̆ng prŏng, tal êlâo mkŏ mjing ti Việt Nam, ti čar Lâm Đồng mơ̆ng hruê 11/11 - 07/12/2025, mĭn tĭng iêô jak 20 êbâo gưl tue hiu čhưn hlăm ala čar leh anăn ala tač êngao. Tinei, lu bruă ngă hnơ̆ng lu ala čar srăng mâo mkŏ mjing msĕ si: Hưn mdah, hưn mthâo mnơ̆ng dhơ̆ng čê leh anăn kdrăp mrâo mkra mjing mrâo mrang, Klei bi trông kơ hdră bruă mđĭ hnơ̆ng anăn knăl čê Việt Nam, bi lông čê hŏng anôk bruă bi ala leh anăn tue ala êgao; knăm mơak êlan dơ̆ng ƀuôn prŏng leh anăn dhar kreh čê; Hdră hiu čhưn ênguê wăl pla mjing čê; hŏng dŭm hdră kdŏ mmuñ. Nguyễn Văn Lộc,  Khua Knơ̆ng bruă Dhar kreh, mjuăt asei mlei leh anăn hiu čhưn ênguê čar Lâm Đồng, brei thâo:

“Hmei lŏ dơ̆ng mkŏ mjing klei bi kƀĭn prŏng čiăng iêô jak tue hiu čhưn. Mbĭt anăn hmei mă bruă hŏng Êpul hgŭm hiu čhưn ênguê mâo tour, êlan, hdră đru mdul ênoh, mtrŭn ênoh sang jưh ăt msĕ mơh dŭm anôk dôk jưh čiăng drông tue hlăm gưl jih thŭn Noel, mŭt thŭn bhang mrâo. Dŭm klei dhar kreh, mjuăt asei mlei leh anăn hiu čhưn ênguê mkŏ mjing lu snăk, boh nik gưl knhal jih thŭn”.

Klă sĭt kkuh drông bi hdơr 85 thŭn hruê mkŏ mjing bruă Đảng čar Dak Lak (23/11), Knăm mơak jih jang djuê ana (18/11), bi hdơr 20 thŭn Hruê mnơ̆ng kriê pioh dhar kreh Việt Nam (23/11), čar Dak Lak mkŏ mjing Hruê kăm mnơ̆ng kriê pioh dhar kreh dŭm djuê ana čar Dak Lak thŭn 2025 hŏng akŏ “Ênai kwang čing čhar - bi mguôp êpul êya”, mkŏ mjing mơ̆ng hruê 18/11 - 23/11/2025, ti Sang kriê pioh mnơ̆ng dhơ̆ng Dak Lak (ƀuôn hgŭm Ƀuôn Ama Thuôt) leh anăn Sang kriê pioh mnơ̆ng Phú Yên (ƀuôn hgŭm Tuy Hòa).  Hruê kăm mnơ̆ng kriê pioh dhar kreh jing hdră bruă ngă yuôm bhăn êlam, kñăm mpŭ kơ ênoh yuôm mnơ̆ng kriê pioh ti čar Dak Lak leh anăn mnơ̆ng kriê pioh wăl dhar kreh čing čhar; kơrŭ wĭt klei ktưn hưn, bruă klam êpul êya hlăm bruă răng kriê leh anăn mđĭ lar knhuah dhar kreh djuê ana; mbĭt anăn hưn mdah rup Dak Lak - krĭng lăn mơ̆ng ênai kwang čing čhar, anôk bi klin klei jăk siam leh anăn klei čang hmăng gĭr ktưn đru mđĭ hiu čhưn ênguê dhar kreh hơĭt kjăp, pŏk mlar klei mjĕ êrô, bi hgŭm leh anăn mjing klei duh ƀơ̆ng kơ êpul êya alŭ wăl mơ̆ng bruă ngă dhar kreh - kdŏ mmuñ - hiu čhưn ênguê jăk siam. Anei ăt jing gưl bo hdơr 20 thŭn Wăl dhar kreh čing čhar Lăn Dap Kngư mâo UNESCO yap jing mnơ̆ng kriê pioh dhar kreh amâo êdah klă bi ala kơ anak mnuih.

 Hruê kăm mkŏ mjing mâo lu klei jăk siam, êdah êdi jing Klei bi lông dhar kreh čing čhar leh anăn kdrăp tông ayŭ djuê ana Dak Lak, hŏng klei hgŭm  mơ̆ng dŭm êpul phung mbruă mơ̆ng dŭm să, ƀuôn hgŭm ti čar, lŏ mkŏ mjing dŭm klei bhiăn, knăm mơak djuê ana mguôp hŏng bruă kriê pioh čing čhar.  Mbĭt anăn jing

Famtrip mkŏ hiu čhưn ênguê “Mkŏ mnơ̆ng kriê pioh - bi mguôp êpul êya”, hưn mthâo dŭm, tour hiu čhưn dlăng, ksiêm dlăng dhar kreh alŭ wăl, bruă ngă mdê hjăn mơ̆ng êpul êya dŭm djuê ana, duah dŭm mta klei dhar kreh djuê ana ti čar.

Bi ti čar Khánh Hòa, Êpul hgŭm hiu čhưn ênguê pŏk ngă Klei bi lông bruă klei mrâo leh anăn Video clip kơ klei hiu čhưn ênguê thŭn 2025 hŏng akŏ “Hiu čhưn ênguê Khánh Hòa -  Rup lu êa mil”. Anei jing bruă ngă dôk hlăm hdră mtrŭt jhar, hưn mdah hiu čhưn ênguê mơ̆ng čar. Leh bi mŭt anôk bruă knŭk kna, wăl hiu čhưn ênguê ti čar Khánh Hòa dưi pŏk mlar, ngă kơ ruh hiu čhưn ênguê jing “jăk siam” hĭn. Êngao kơ anôk  truh mưng leh msĕ si kplang Nha Trang - sa hlăm dŭm kplang siam hĭn dlông rŏng lăn, kjhôč ksĭ Cam Ranh hŏng anôk mdei msăn jăk siam, sang yang đưm Ponagar, ƀuôn prŏng đưm Diên Khánh amâodah klei mdah kdŏ mmuñ jăk siam, klei mguôp wăt wăl Ninh Thuận hđăp đru kơ rup hiu čhưn ênguê Khánh Hòa mâo thiăm lu klei jăk siam.