Hrue knhal tuič hrue kăm, ti sang hră hđeh điêt Hoa Hồng, ƀuôn hgŭm Ia Dreh, čar Gia Lai, hlăm wăl sang hră hŏng lu êa mil kdrăp djuê ana, mbĭt hŏng ênai čing mơak m’ưr. Jing bruă dôk bi pơ̆k mñam, bi hrĭ mñam, lehanăn klei tông čing čhar djuê ana  Jarai. Tinei, amâo mâo djŏ hjăn phung mbruă, ƀiădah mbĭt hŏng nai mtô, phung hđeh hriăm hră bi kƀlêč ƀlir hŏng kdrăp djuê ana pô mơh. Nai mtô Nay H’Tố Trinh, nai mtô ti sang hră hđeh điêt Hoa Hồng dôk atăt hđeh ksiêm dlăng phung mbruă dôk mñam, lehanăn mâo phung mbruă djă ti kngan ktrâo atăt bruă pơ̆k mñam:

Sang hră hđeh điêt hmei mkŏ mjing dŭm bruă lông ksiêm dlăng djăp dhar kreh djuê ana, brei phung hđeh hriăm msĕ si tông čing, hrĭ mñam, đêč giêng... Hmei iêo jak phung thâo mbruă pơ̆k mñam, hrie hưn mdah kdrăp pô mñam, lehanăn tinăn hlŏng mtô bi hriăm phung hđeh. Jing nai mtô, čang hmăng proư̆ng êdi jing hmei atăt hđeh dơ̆ng thâo ƀuh mơ̆ng điêt, thâo săng kơ boh tŭ dưn mơ̆ng bruă pơ̆k mñam, jing ngăn dưn mơ̆ng aê aduôn pô đưm, mơ̆ng anăn mâo klei thâo bi mpŭ, lehanăn kriê pioh kơ gưl êdei.”

 Phung mbruă hlăm bruă pơ̆k mñam, hrĭ mñam, lehanăn phung thâo tông čing, hriê mơ̆ng dŭm boh ƀuôn Nông Siu, ƀuôn Bha Nga, ƀuôn Blak (hlăm ƀuôn hgŭm Ia Dreh, čar Gia Lai) đru leh kơ phung hđeh sa hdră jăk snăk kơ dhar kreh djuê ana pô. Nay H’Kông – Khua êpul hgŭm bruă pơ̆k mñam ƀuôn Nông Siu myưng m’ang hŏng mnơ̆ng pô leh mñam dưi ba rang mdah lehanăn čhĭ mnia hlăm dŭm bruă dhar kreh čar mâo, hŏng ênoh prăk mâo čhĭ êbeh kơ 50 êklăk prăk, asei mlei ñu pô mâo leh bruă Mặt trận čar Gia Lai mđup brei hră bi mni. Ƀiădah klei yuôm bhăn hĭn jing, mơ̆ng klei anăn hưn mdah knhuah gru dhar kreh mnuih djuê ana Jarai, boh nik mtô dŭm bruă djuê ana pô kơ hđeh gưl mrâo.

“Hmei nao hlăm bruă hưn mdah bruă pơ̆k mñam, ti tlâo boh sang hră hđeh điêt hlăm alŭ wăl. Tinei hmei amâo mâo djŏ knŏng rang mdah hưn mthâo kơ mnơ̆ng leh mñam, ƀiădah lŏ mtô bi hriăm kơ phung hđeh dŭm êlan kơ bruă pơ̆k mñam. Leh dưi ƀuh ti ală mta diñu, mâo pai hŏng kngan diñu pô hlăm dŭm mta mnơ̆ng leh mñam, phung hđeh khăp snăk. Hmei čang hmăng kơ phung hđeh mgi dih leh prŏng, srăng tui hriăm lehanăn hŏng kiê kngan diñu pô srăng mñam, msĕ hŏng di neh, di aprŏng  mtô bi hriăm leh diñu. Klei phung hđeh khăp tui hriăm ba kơ hmei lu klei mơak mơh, kyuadah diñu srăng jing phung lŏ čuê bruă anei êdei anăp.”

Lông tui hriăm dŭm bruă dhar kreh djuê ana pô ti ƀuôn hgŭm Ia Dreh, čar Gia Lai mâo leh bruă sang čư̆ êa lehanăn dŭm êpul êya sa ai. Nguyễn Thị Ly Na -  K’iăng khua êpul hgŭm bruă mniê ƀuôn hgŭm Ia Dreh brei thâo, mơ̆ng thŭn dih, hlăk ka bi mŭt mbĭt ôh, knơ̆ng bruă sang čư̆ êa kdriêk Krông Pa (hđăp) mkŏ mjing leh êpul hgŭm bruă pơ̆k mñam ƀuôn Nông Siu, mâo 17 čô ƀĭng hgŭm, kñăm kriê pioh lehanăn mđĭ bi lar knhuah gru dhar kreh djuê ana Jarai ti alŭ wăl. Bruă mơ̆ng êpul hgŭm amâo mâo djŏ knŏng ba wĭt prăk kăk kơ amai adei, ƀiădah lŏ bi lar knhuah gru dhar kreh djuê ana pô kơ hđeh gưl mrâo:

“Leh sang hră hđeh điêt Hoa Hồng iêo jak êpul mbruă klei pơ̆k mñam hriê kơ sang hră čiăng hưn mdah kơ phung hđeh ƀuh knhjuah gru dhar kreh mnuih Jarai. Êpul hgŭm ăt mđrăm mbĭt hŏng phung amai adei hlăm ƀuôn sang, thâo bi kriê pioh knhuah gru dhar kreh pô, čang hmăng jih jang mnơ̆ng pô mkra mjing mâo lu mnuih thâo mơ̆ng dŭm bruă bi mguôp hlăm dhar kreh”.

 Dŭm klei mkŏ mjing ti sang hră hđeh điêt Hoa Hồng, ƀuôn hgŭm Ia Dreh, čar tGia Lai mjing leh sang hră anei jing anôk mkŏ mjing jăk kơ dhar kreh, anôk bi lar knhuah gru dhar kreh djuê ana amâo mâo djŏ knŏng mâo hlăm sang kriê pioh, ƀiădah dưi bi lar mơ̆ng dŭm aruăt mrai, mnal pơ̆k mñam, lehanăn dŭm ênhiang čing mâo kwang./.