Nguyễn Thuý Linh, khua anôk Coffee&homestay Hoa Sứ ti alŭ Hữu Đức, ƀuôn hgŭm Phước Hữu, čar Khánh Hoà lŏ mprăp thiăm dua boh adŭ kơ tue hiu čhưn ênguê dôk ƀri hlăm knăm mơak Katê. Anôk ñu lŏ mprăp djăp mta mnơ̆ng mơ̆ng alŭ wăl mâo , msĕ si êa msĭn, kpiê vang, kđeh čĭm kbao sa mđiă, mnŭ rông phưi hlăm war, lehanăn dŭm mta mnơ̆ng mơ̆ng mnuih Chăm mñam mâo kdô čiêng, ao jhum…

        Čiăng mâo ai êwa mơak mñai hŏng hrue mơak Katê, ƀuôn hgŭm Phước Hữu tiŏ nao leh giăm 3 êtuh čô hđeh hriăm hră, phung hđeh êdam mniê êra mơ̆ng dŭm boh ƀuôn hlăm ƀuôn hgŭm nao bi kdŏ hlue ênhiang djuê ana pô. Khădah adiê amâo mâo jăk ôh, ƀiădah klei dôk mjuăt hriăm ti tač boh alŭ Hữu Đức ăt dôk mtluk mtlak jih ai tiê. Nguyễn Thuý Linh brei thâo:

        "Hlăm dŭm hrue êgao, phung amai adei mniê, hlăm ƀuôn mđing bi mdoh wăl hdĭp mda hlăm ƀuôn sang, phung hđeh bi mprăp hĕ klei hriăm êlâo čiăng truh tlam nao bi mguôp hlăm klei kdŏ muiñ, čiăng truh kơ hrue mơak  Katê nao hlăm klei kdŏ drông bruă mkŏ mjing. Bi hlăm grăp gŏ sang bi mdoh pưk sang, mprăp mnơ̆ng ƀơ̆ng huă, boh nik jing mnơ̆ng ƀơ̆ng hlue knhuah gru pô mơ̆ng djuê ana Chăm. Mbĭt hŏng anăn, mâo lu boh ƀuôn Chăm mkăn ăt bi mjuăt hriăm klei kdŏ, hlăm anăn mâo klei ktuh êyuh hĭn êdi dŭm mta ênhiang kdŏ mrâo. Dŭm thŭn êlâo mâo dŭm boh ƀuôn đuič ngă, ƀiădah thŭn anei lu boh ƀuôn bi tui ngă sơăi”.

        Mbĭt hŏng bruă mjuăt bi hriăm klei kdŏ muiñ, dŭm hrue êgao, ƀĭng hgŭm hlăm êpul hgŭm bruă mmai gŏ Chăm Bàu Trúc ktuh êyuh dôk mkra mjing lu mta mnơ̆ng pioh čhĭ kơ tue hlăm knăm mơak Katê anei.

        Phú Hữu Minh Thuần, Khua kiă kriê êpul hgŭm bruă mmai gŏ Chăm Bàu Trúc, ƀuôn hgŭm Ninh Phước, čar Khánh Hòa brei thâo, ară anei kah knar hlăm grăp hrue mâo êbeh 1.000 gưl čô tuê truh hŏng ƀuôn mmai gŏ Bàu Trúc nao dlăng lehanăn blei mnơ̆ng. Thŭn anei, êpul hgŭm bruă lŏ duh bi liê lu hĭn kơ alŭ wăl rang mdah mnơ̆ng pô leh mkra mjing. Bruă anăn, amâo mâo djŏ knŏng pioh hưn mdah klei jăk siam mơ̆ng mnơ̆ng mmai hlue knhuah dhar kreh djuê ana Chăm, ƀiădah tinăn lŏ bi mguôp mbĭt hŏng dŭm kdrăp pĕ tông ayŭ, mdah klei kdŏ muiñ hlue knhuah djuê ana, čiăng kơ phung tue thâo săng hĭn kơ klei hdĭp, knhuah bhiăn, lehanăn klei gĭr bi kriê pioh knhuah gru dhar kreh djuê ana Chăm. Thuần lŏ brei thâo:

        "Thŭn anei tue hrie lu, kyuanăn êpul hgŭmbruă duh bi liê thiăm kơ anôk rang mdah mnơ̆ng dhơ̆ng pô mkra mjing, pioh kơ tue hiu čhưn nao dlăng lehanăn blei mprăp hlăm yan Katê anei. Tơdah tui si klei phung tue čiăng srăng mâo pô kăp mblang, lehanăn dlăng dŭm klei kdŏ muiñ hlue knhuah djuê ana Chăm leh čar Khánh Hoà mrâo dưi mkŏ mjing snăn sĭt nik ênoh tue hiu čhưn srăng lu hĭn, kyuadah hdră hâo hưn mâo mkŏ leh hŏng čar Ninh Thuận hđăp, lehanăn čar Khánh Hoà mrâo, kyuanăn mâo klei ling lar prŏng”.

         Bi ti čar Lâm Đồng, dŭm hrue anei, dŭm anôk knhuah gru msĕ si sang yang  Pô Nit ti ƀuôn hgŭm Bắc Bình, sang yang Pô Klaong Mơ-nai ti Lương Sơn, wăl sang mtao Chăm ti ƀuôn hgŭm Hồng Thái, mnuih ƀuôn sang bi mdoh wăl ƀuôn sang, kă hla čhiăm gru hlăm grăp boh sang. Boh nik, ti sang tuôr Pô Sah Inư hlăm ƀuôn hgŭm Phú Thuỷ, čar Lâm Đồng srăng mâo 9 boh ƀuôn hgŭm mnuih djuê ana Chăm hŏng lu bruă dhar kreh mâo mkŏ mjing, msĕ si: Mdah ayŭ ki Saranai, bi lông tăp mdiê, bi lông đua abŭ êa găn lu êlan dleh, hlăp klei guôm ală čăm gŏ lăn, lehanăn mdah klei ngă bruă mmai gŏ lăn, bruă pơ̆k mñam djuê ana  Chăm, boh nik mdah mnơ̆ng ƀơ̆ng Chăm.

         Trần Đức Dũng, Khua kiă kriê knhuah gru sang tuôr Pô Sah Inư brei thâo:

        “Bruă mprăp êmiêt ară anei mâo ngă leh hŏng klei kjăp. Thŭn 2025 jing thŭn tal êlâo knăm mơak Katê mâo mkŏ mjing leh čar Lâm Đồng mrâo dưi mkŏ mjing. Dŭm bruă ngă mkăn mơ̆ng knăm mơak ăt dôk djă pioh si knhuah bhiăn mơ̆ng mnuih Chăm, dưi lŏ bi kơrŭ lehanăn mdah tal anei ti sang tuôr Pô Sah Inư. Mbĭt hŏng anăn, hmei ăt mkŏ mjing dŭm bruă yuôm bhăn jing knăm mơak drông tue hriê čhưn.”

        Katê jing knăm hlue knhuah gru đưm mơ̆ng djuê ana Chăm. Anei amâo mâo djŏ knŏng pioh kơ mnuih Chăm bi êdah klei thâo hdơr knga kơ aê aduôn atâo atiêt lehanăn yang adiê, ƀiădah lŏ bi êdah ai tiê klei thâo bi mguôp hlăm ƀuôn sang. Hlăm grăp yan mơak dhar kreh djuê ana Chăm dưi lŏ bi kriê pioh lehanăn bi lar mđrăm mbĭt mơ̆ng dua boh čar Khánh Hòa lehanăn Lâm Đồng. Anei ăt jing wưng lŏ bi lar kơ knhuah gru djuê ana Chăm truh hŏng phung tue hlăm ala čar lehanăn mơ̆ng ala tač êngao, đru mđĭ kyar bruă hiu čhưn ênguê mơ̆ng dŭm alŭ wăl hŏng klei kjăp hĭn./.