Mmông hriăm hlăm knhal jih hrue kăm, wăl tač sang hră gưl 1 Tô Hiệu, ƀuôn hgŭm Ea Kao, čar Daklak dôk ngă dŭm mta bruă hlăm dhar kreh. Phung hđeh mâo hriăm khăt mkra dŭm mta rup mkŏ. Dŭm pŏk mlar ngă rup êa mil gru grua, ngă rup ƀuôn sang, kơ klei hdĭp aguah tlam mlam hrue. Rup sang đun, kdrăp pĕ tông hŏng dŭm mta mnơ̆ng djah lŏ wĭt yua. Amuôn H Trâm Niê, hđeh hriăm hră adŭ 5E, lač:

“Kâo khăp snăk ngă STEM mơ̆ng adŭ mkŏ mjing bi êdah lu knhuah gru dhar kreh anak Ê Đê. Kâo khăp kơ knhuah gru dhar kreh djuê ana pô, kâo čang hmăng mgi dih sang hră srăng mkŏ mjing lu hĭn klei msĕ snei, kñăm bi kriê pioh knhuah gru dhar kreh djuê ana pô.”

Boh nik hlăm klei bi lông êyuh tiêng liêng êa mah tui duah klei thâo săng kơ dhar kreh dŭm djuê ana msĕ si Ê Đê, M’Nông. amuôn Đinh Diệp Anh, hđeh hriăm hră adŭ 3A brei thâo: Dŭm klei wĭt lač brei ƀuh klei thâo săng hlăm phung hđeh kơ sang krum, kơ čing čhar…

 “Kâo ƀuh bŏ hŏng klei mơak snăk, kâo lŏ thâo săng lu hĭn kơ dhar kreh anak Ê Đê msĕ si kơ sang đun, kơ čing čhar, kdrăp čŭt hơô lehanăn dŭm knăm djuê ana pô.”

Klei mơak mơ̆ng phung hđeh hlŏng truh kơ amĭ ama. Lê Đình Nam, mâo anak dôk hriăm ti sang hră gưl sa Tô Hiệu lač, hŏng hdră hriăm lehanăn lông ngă snăn phung hđeh mâo lu klei bi mlih jăk snăk.

“Phung hđeh bŏ hŏng klei mơak, lehanăn mprăp kơ hrue STEM, grăp hrue wĭt kơ sang yăl dliê yơh mâo ngă rtup snei, rup sdih, mâo phung nai mtô kdŏ, dôk hmăng nanao yơh, snăn amĭ ama ƀuh mơak mbĭt hŏng anak mơh.”

Tui si Đoàn Thị Tuyết Yến, Khua sang hră gưl sa Tô Hiệu, sang hră mâo giăm  1.200 čô hđeh hriăm hră, hlăm anăn mâo lu phung hđeh hriăm hră mnuih djuê ƀiă, dŭm bruă ngă msĕ snăn ti sang hră, kñăm brei hđeh mâo klei thâo hriăm êmuh, mâo klei thâo bi mguôp, lŏ mđĭ klei thâo săng, bi kriê pioh lehanăn bi lar knhuah gru dhar kreh.

 “Anei amâo mâo djŏ jing klei hriăm hơăi mang ti êngao mmông bi hriăm aguah tlam ôh, klei anei kñăm mđĭ ai tiê klei mĭn phung hđeh mâo klei thâo săng hĭn hlăm STEM msĕ si mkra bi hmô dŭm mta mnbơ̆ng yua, mnơ̆ng hlăm dhar kreh anak Ê Đê, bi kriê pioh lehanăn bi lar knhuah siam mơ̆ng dhar hreh alŭ wăl.”

Ti Daklak mâo leh lu boh sang hră mkŏ mjing klei bi mưng kơ dhar kreh hŏng lu hdră mkŏ mjing mdê mdê. Leh mâo nao hlăm klei anăn phung hđeh mâo klei găl ksiêm duah, hriăm êmuh lehanăn mâo lu klei thâo săng mrâo, dưi lŏ bi lar lehanăn kriê pioh knhuah gru dhar kreh ƀuôn sang pô. Dŭm klei mjŭt mjing anak anăp srăng jing atur kơ dhar kreh djuê ana dưi lŏ kriê pioh lehanăn bi lar hlăm yang ƀuôn./.