Ƀri akŏ thŭn mrâo, mprăp drông Têt djuê ana, ti krĭng Lăn dap kngư mkŏ mjing lu knăm mơak dhar kreh. Anei ăt jing wưng kơ mnơ̆ng pơ̆k mñam dŭm djuê ana dưi hưn mdah mbĭt hŏng ênai čing, ênhiang kdŏ. Amai H’Blim ti ƀuôn Ja Rah, să Nâm Nung, čar Lâm Đồng mbĭt hŏng ung lehanăn phung anak čư̆ kdrăp čŭt hơô djuê ana Mnông nao ti knăm mơak “Tăm Blang m’prang bon” brei thâo:

“Djuê ana Mnông mâo kdrăp čŭt hơô siam lehanăn dŭm ênai čing, enhiang kdŏ jăk êdi, kdrăp čŭt hơô čŏng mñam, hdră mdêč čing jăk mơh hmư̆, mâo ya wưng snăn mdah kơ mnuih ƀuôn sang dlăng, đa đa lŏ ruah hdră tông čing djŏ guôp hŏng ênhiang kdŏ, knhuah dhar kreh djuê ana snei jăk êdi, kâo kreh brei ung lehanăn phung anak nao hgŭm hŏng kâo.

Êa mil mnơ̆ng pơ̆k mñam amâo djŏ knŏng jing kdrăp kơ knăm mơak,ƀiădah jing knhuah dhar kreh hlăm êpul êya dŭm djuê ana Lăn dap kngư. Ka Thu ti să Hòa Ninh, čar Lâm Đồng brei thâo, mnơ̆ng pơ̆k mñam siă suôr hŏng mnuih K’ho dơ̆ng mơ̆ng mrâo kkiêng truh kơ hruê wĭt kơ aê aduôn atâo atiêt.

“Kâo kreh mtă kơ čô anak, khădah ară anei amâo mâo kƀah mnơ̆ng pơ̆k mñam hlăm sang mnia, ƀiădah hŏng djuê ana pô, mnơ̆ng pơ̆k mñam brei thâo kriê pioh, amâo dưi luič, kyua truh knhal tuič, amâo mâo sa blah mnơ̆ng pơ̆k mñam hêñ snăk hŏng ƀuôn sang, hŏng aê aduôn atâo atiêt. Brei mâo mnơ̆ng pơ̆k mñam djuê ana tơdah wĭt hŏng aê aduôn atâo atiêt.

          Kbiă hriê mơ̆ng klei čiăng ară anei, hlăm hla pŏk ala ƀuôn, mơ̆ng mdê bi pô truh kơ anôk bruă mkra mjing, êpul hgŭm bruă… ƀlêč ƀlir êa mil mnơ̆ng pơ̆k mñam dŭm djuê ana Lăn dap kngư. Mrâo anei, êpul hŭm bruă pơ̆k mñam mnơ̆ng Tơng Bông, Knơ̆ng bruă sang čư̆ êa ƀuôn hgŭm Êa Kao, čar Dak Lak ăt mkŏ mjing hdră livestream hŏng akŏ “ Ƀuôn Tơng Jŭ – Ea Kao kkuh drông”, mđung mmông anăn mtam hlăm kdrăp êlan hla pŏk ala ƀuôn Facebook, Zalo OA, TikTok.

Hdră kñăm hưn mthâo mnơ̆ng pơ̆k mñam djuê ana lehanăn hưn mthâo gru hmô bruă hiu čhưn ênguê ƀuôn Tơ̆ng Jŭ, hŏng dŭm mta mnơ̆ng čŭt hơô djuê ana kơ êkei, mniê Êđê, kơ phung hđeh, ao dai, ca vat, čhiăm, kdrăp mñam hluê ênuk mrâo. Hluê hdră livestream, alŭ wăl hưn mthâo leh kluôm wăl anôk lăn adiê, wăl anôk mjĕ mjuk dhar kreh mơ̆ng ƀuôn hgŭm Êa Kao mguôp hŏng klei hdĭp ngă bruă duh mkra pla mjing mơ̆ng mnuih ƀuôn sang, boh nik mnuih djuê ƀiă.

Ti Gia Lai mâo lu anôk hiu čhưn ênguê êpul êya jăk siam msĕ si Plei Ôp ƀuôn hgŭm Pleiku, ƀuôn hiu čhưn ênguê êpul êya Ia Mơ Nông, să Ya Ly, amâo dah homestay Đinh A Ngưi ti să Tơ Tung… nmnuih Jarai lehanăn Bahnar mkŏ mjing leh hdră tui ksiêm dhar kreh, mnơ̆ng pơ̆k mñam, tông čing, tui ksiêm knăm mơak, mnơ̆ng ƀơ̆ng huă lehanăn klei hdĭp, mjing hdră duh ƀơ̆ng kjăp mguôp hŏng buă kriê pioh knhuah gru djuê ana./.