Găn 80 thŭn êgao, Sang mđung asăp blŭ Việt Nam jing leh ƀĭng găp sĭt suôr, juăt mưng hŏng ƀuôn sang Lăn dapkngư. Amâo djŏ knŏng mđung dŭm klei mrâo, dŭm ênhiang mmuñ, hmư̆ dŭm hdră mđung mơ̆ngsang mđung asăp blŭ Việt Nam, lŏ đru kơ mnuih ƀuôn sang mâo klei thâo kơ hdră pla mjing, rông mnơ̆ng, răng mgang dliê, kriê pioh kjăp knhuah dhar kreh jăk siam mơ̆ng djuê ana… Mơ̆ng anăn, mnuih ƀuôn sang mâo leh klei kpưn đĭ mkŏ mkra gŏ sang trei mđao, yâo mơak. Mnuih ƀuôn sang dŭm djuê ana ti krĭng lăn dap kngư dlăng Sang mđung asăp blŭ msĕ si ƀĭng găp sĭt suôr mơ̆ng pô.

Khua mduôn Y Thành 68 thŭn, să H’Ra, čar Gia Lai mgei ai tiê brei thâo:

 “Mơ̆ng Sang mđung asăp blŭ anei yơh, kâo dưi hmư̆ đŏk Răk hră hưn mthâo klei hnŭk êngiê mơ̆ng Awa Hô hlăk thŭn 1945, kâo mgei ai tie êdi. Ăt mơ̆ng Radio anei yơh, hruê 30-4-1975, mnuih ƀuôn sang thâo kwar Dhŭng dưi mtlaih êngiê. Hlăk anăn kâo dôk ti kđông kahan, hmư̆ klei anei jih jang mnuih ƀuôn sang hơ̆k mơak… Tal dua jing kâo hmư̆ hlăm hdră mđung mơ̆ng Sang mđung asăp blŭ Việt Nam anei mâo klei Bahnar, Jarai, Sedang lehanăn dŭm djuê ana mkăn… kâo mơak êdi hlăk klei blŭ amĭ kkiêng pô dưi kriê pioh, mđĭ kyar hlăm hdră mđung. Mbĭt anăn, lŏ mâo hdră ktrâo lač kơ mnuih ƀuôn sang rông mnơ̆ng, pla mjing, mkŏ mkra krĭng ƀuôn sang kâo. Kâo khăp êdi hmư̆ hdră mđung lehkơnăn kâo lŏ mtô dŭm klei jăk dưi hmư̆ hlăm hdră mđung kơ mnuih ƀuôn sang”./.