Hŏng Dak Lak – krĭng phŭn mơ̆ng Lăn dap kngư mâo lu djuê ana, bruă hluê ngă hdră anei mâo pŏk ngă hlăm grăp hruê lehanăn mơ̆ng anăn ăt ƀuh amâo djŏ ƀiă ôh bruă brei ksiêm dlăng čiăng rơ̆ng klei bi knar mđrăm mbĭt.

Dak Lak ară anei mâo giăm 400 êpul tông čing, êbeh 150 êpul hgŭm bruă dhar kreh knhuah gru mơ̆ng dŭm êpul êya dŭm djuê ana mơ̆ng Krah - Dhŭng - Dưr. Dŭm knăm mơak msĕ si knăm mơak kphê Ƀuôn Ama Thuô̆t, rang mdah dhar kreh čĭng čar, hruê knăm dhar kreh dŭm djuê ana Việt Nam, Knăm mơak knhuah gru dŭm djuê ana Yŭ Dưr…jing leh anăn knăl mơ̆ng alŭ wăl, krĭng lăn jăk čiăng kơ dhar kreh dŭm djuê ana đĭ kyar hlăm yang ƀuôn. Y-Nuel Niê, mnuih Êđê, khua ƀuôn hiu čưn ênguê yang ƀuôn Akŏ Dhông brei thâo:

 “Hmei hơ̆k mơak kyua bruă Đảng čar, Bruă sang čư̆ êa čar, knơ̆ng bruă dhar kreh mjuăt ktang asei mlei leh anăn hiu čhưn ênguê uêñ mĭn kriê pioh dhar kreh amâo êdah klă, boh nik jing čĭng čhar, eirei, kdŏ čhuang leh anăn kdrăp pĕ tông djuê ana. Hlăm klei duh bi liê, bi lar dhar kreh, ƀuôn sang hmei kñăm mđĭ kyar bruă hiu čhưn ênguê yang ƀuôn. Phung tuê hriê tinei ksiêm dlăng, đru mkŏ mjing hnư hrui wĭt, rơ̆ng kơ klei đĭ kyar”.

Knŏng ti krĭng Yŭ Dak Lak, hlăm thŭn 2023 leh anăn 2024, mâo 10 ƀuôn hiu čhưn ênguê yang ƀuôn msĕ si ƀuôn Akŏ Dhông ngă bruă, brei ƀuh hdră tă mđĭ kyar bruă duh mkra mnơ̆ng kriê pioh, lač hlăm klei hưn bruă kđi čar Klei kƀĭn kluôm tal 14, mâo leh tur knơ̆ng hlăm klei hdĭp. Dhar kreh dôk jing ai dưi mđĭ kyar hdră duh ƀơ̆ng leh anăn klei ktưn hưn êpul êya.

Ƀiădah ti krah ai hdĭp mrâo mrang, bruă krŭ wĭt mnơ̆ng kriê pioh pătdah êmưt hĭn hŏng ngă bruă duh mkra mnơ̆ng kriê pioh. Đa đa klei blŭ, hdră bhiăn, kdrăp pĕ tông djuê ana Lăn Dap Kngư ka kbiă ôh mơ̆ng klei luč ram, phung mda asei ƀiă sơnăk hgŭm hlăm bruă yang ƀuôn. K’iăng nai prŏng, nai prĭn Buôn Krông Tuyết Nhung, k’iăng khua kiă kriê anôk bruă kreh knhâo yang ƀuôn leh anăn anak mnuih, sang hră gưl prŏng Lăn Dap Kngư lač, klei anei čiăng mkŏ mjing klei kpleh plah wah Mđĭ kyar kluôm dhuôm anak mnuih Việt Nam kơ knuih kniêng, klei thâo, klei siam, ai hdĭp, klei thâo hdĭp leh anăn bi lar bruă duh mkra mnơ̆ng kriê pioh, 2 mta phŭn mơ̆ng klei hưn mdah kđi čar Klei kƀĭn kluôm 14 mơng Đảng. Hluê si Buôn Krông Tuyết Nhung, čiăng klă sĭt bi kluôm čiăng mkŏ mjing dhar kreh knhuah gru:

 “Si srăng ngă čiăng kơ phung mda asei leh anăn ênuk êdei thâo hŏng grăp djuê ana, anak mnuih jing yuôm bhăn hĭn, knhuah gru dhar kreh jing yuôm hĭn. Drei srăng thâo klă kơ knhuah gru djuê ana pô čiăng kơ drei ktưn hưn leh anăn mjing klei ktưn hưn anăn jing bruă klă klơ̆ng. Hlăm wưng ñŭ kma anei klei tal êlâo drei čiăng jing boh tŭ dưn phŭn mơ̆ng pô, anăn jing hdră bhiăn djuê ana, klei blŭ, kdrăp čŭt hơô, ăt msĕ mơh dŭm klei čuăn hlăm êpul êya, klei anăn jing knhuah gru”.

Ăt mâo klei mĭn msĕ hŏng k’iăng nai prŏng, nai prĭn Buôn Krông Tuyết Nhung hlăm bruă mkŏ mjing anak mnuih Việt Nam nao mbĭt hŏng wăl dhar kreh jăk siam, mrâo mrang, amai H’Zawut Ƀuôn Yă, ti ƀuôn hgŭm Ea Tul, čar Dak Lak hmăng hmưi, dŭm mta phŭn klei hưn kđi čar srăng dưi ksiêm dlăng leh anăn ngă mơ̆ng phŭn:

 “Kâo đăo knang klei blŭ jing mngăt êwa djuê ana. Kâo mtô klei Êđê hlăm dŭm mbah online yang ƀuôn, kah mbha klei hriăm, jĕ hiăm hŏng grăp čô dưi hriăm klei blŭ djuê ana pô. Tơdah grăp čô mpŭ leh anăn yua klei blŭ djuê ana pô, dhar kreh mơ̆ng sa djuê ana srăng adôk nanao”.

Mơ̆ng dŭm klei gĭr mơ̆ng êpul êya, phung ksiêm duah leh anăn phung mda asei, ai tiê mă dhar kreh jing ai ktang mơ̆ng lam kơ klei đĭ kyar hơĭt kjăp hlăm Hră mơar klei kƀĭn kluôm tal 14 mơ̆ng Đảng dưi bi klă klơ̆ng mbruă ti Dak Lak. Klei anei ăt găl guôp hŏng hdră tă hlăm hră mơar klei kƀĭn kluôm bruă Đảng čar Dak Lak gưl tal 18: Bi lar ktang boh tŭ dhar kreh dŭm djuê ana, mkŏ mjing čar Dak Lak mâo klei jhŏng, klei thâo khăp, mbruă, kriê pioh leh anăn bi lar wăl dhar kreh čĭng čar Lăn Dap Kngư nao mbĭt hŏng mđĭ kyar hơĭt kjăp, mtrŭt mđĭ klei mlih mrô hlăm bruă dhar kreh, mjuăt asei mlei leh anăn hiu čhưn ênguê. Trần Hồng Tiến,  khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak brei thâo:

 “Knơ̆ng bruă dôk gĭr jing sa hlăm dŭm anôk bruă nao êlâo hlăm klei mlih mrô čiăng yua hlăm bruă kriê dlăng dhar kreh, hiu čhưn ênguê, mjuăt ktang asei mlei, hlăm klei bi hriăm, ktuê dlăng klei bi lông, čiăng mkŏ mjing klei găl hĭn kơ mnuih ƀuôn sang leh anăn knơ̆ng bruă. Mđĭ kyar bruă pô hŏng bruă hiu čhưn ênguê thực tế ảo; mlih mrô kluôm dŭm mnơ̆ng kriê pioh ti alŭ wăl čar Dak Lak čiăng kơ phung tuê dưi mŭt dlăng dŭm mbah hâo hưn mơ̆ng čar čiăng ksiêm hriăm. Mđĭ hnơ̆ng jăk klei ngă bruă mơ̆ng dhar bruă leh anăn ăt ƀrư̆ ƀrư̆ bi klă hdră mtrŭn mrô 57 mơ̆ng gưl dlông kơ klei bi mlih mrô”.

“Mkŏ mjing leh anăn mđĭ kyar dhar kreh Việt Nam mrâo mrang, jiă kma knhuah gru djuê ana, hrăm mbĭt hlăm tur knơ̆ng boh tŭ ala čar, boh tŭ dhar kreh, boh tŭ gŏ sang leh anăn hnơ̆ng čuăn anak mnuih Việt Nam”, jing klei mñă klă hlăm klei hưn kđi čar Klei kƀĭn kluôm tal 14 . Leh anăn ti Dak Lak, hŏng bruă grăp čô bi myuôm dhar kreh, grăp ƀuôn sang bi msiam kơ klei mdê hjan, hdĭ jăk hlăm sa čar mâo 49 djuê ana hdĭp mda, brei ƀuh klei klă sĭt leh anăn hdră tă mơ̆ng klei hưn mdah. Sa knhuah dhar kreh mrâo găl guôp hŏng dhar kreh kđi čar, dhar kreh mnia mblei, čô̆ kơ bruă, dhar kreh gŏ sang - sang hră mơar leh anăn yang ƀuôn… dôk dưi mkŏ mjing hơĭt kjăp.