Hlăm dŭm hrue anei, ti sang kriê pioh kdrăp djuê ana Têrêsa hlăm ƀuôn hgŭm Tân Lợi (Dak Lak), klei dôk mjuăt hriăm mtluk mtlak. Hlăm sa boh adŭ msĕ si yăng đar, ênai  klông pút, ênai kŏk t’rưng kwang mbĭt hŏng ai êwa yan mnga dơ̆ng truh. Phung mda asei mnuih Xơ Đăng hlăk dôk mprăp hdră mdah kơ mnuih ƀuôn sang lehanăn kơ phung tue ƀri hlăm wưng akŏ thŭn mrâo.

Êa hŏ msah ao, A Bảo, 23 thŭn, hriê mơ̆ng ƀuôn Đăk Rơ Wa, ƀuôn hgŭm Kon Tum, čar Quảng Ngãi - ară anei hlăk dôk mă bruă ti sang kriê pioh kdrăp djuê ana Têrêsa, lač:

“Kdrăp pĕ tông djuê ana pô amâo mâo dưi kƀah ôh hlăm klei hdĭp grăp hrue, ñu jing msĕ si mnơ̆ng ƀơ̆ng kơ ai tiê. Hlăm klei hdĭp bi mâo klei mơak nanao. Msĕ si mơ̆ng ênuk aê aduôn pô êlâo dih, jih jang dôk jŭm kpur pui dôk hmư̆ pĕ đĭng klông pút, kŏk t’rưng…, kơ hdơ̆ng găp dôk hmư̆, ama pĕ đĭng klông pút, t’rưng pioh mjum anak pĭt. Boh nik hlăm dŭm hrue knăm mơak, akŏ thŭn mrâo, đĭng  klông pút, t’rưng kwang yơh iêo ba lu mnuih ƀuôn sang hriê hmư̆, mơak snăk.”

Bi Karôly, 29 thŭn, ti buôn H’Ring, ƀuôn hgŭm Cư M’gar (Dak Lak) lač, kdrăp  tông jing msĕ si klei hrĭng kơ klei hdĭp jih jang yang ƀuôn pĕ, jing msĕ si mnguh mngăt kơ ƀuôn sang tơdah grăp blư̆ mâo knăm mơak, yan mnga truh. Kyuanăn, phung mda asei hlăm sang kriê pioh anei mâo nanao klei hriăm mjuăt, lehanăn bi kriê pioh knhuah gru dhar kreh djuê ana, amâo mâo djŏ knŏng kyua klei khăp, ƀiădah lŏ jing kdrăp pioh pĕ tông kơ mnuih ƀuôn sang, lehanăn phung tue hmư̆:

“Kâo khăp snăk kơ kdrăp pĕ tông djuê ana pô. Hlăm wưng yan mnga truh, thhŭn mrâo, hmei tông hlăp kŏk, đĭng klông pút, t’rưng nao mbĭt hŏng čing, lehanăn bi kdŏ čhuang, čiăng mơak mbĭt hŏng phung tue hriê čhưn. Anei jing wưng čiăng lŏ hyuă kjăp hĭn klei thâo bi mguôp jih jang mnuih hlăm ƀuôn. Êjai pĕ tông, hlăm ai tiê pô ƀuh mơak snăk, boh nik hlăm akŏ thŭn mbhang mrâo, mâo bi tuôm aê aduôn, amĭ ama, ayŏng amai adei, kâo tông pĕ klông pút čiăng kơ jih jang mnuih bi kdŏ čhuang, mmông anăn klei mơak lŏ mđĭ hĭn.”

Bi A Tùng, 29 thŭn, ăt ti ƀuôn H’Ring, klei thâo răng kriê kdrăp pĕ tông djuê ana pô jing bruă klam hlăm klei bi kriê pioh dhar kreh mơ̆ng aê ama pô đưm.

“Đĭng klông pút, kŏk t’rưng jing yuôm bhăn snăk hlăm klei hdĭp mnuih ƀuôn sang djuê ana Xơ Đăng lehanăn dŭm djuê ana mkăn. Dŭm kdrăp anei jing yuôm bhăn msĕ hŏng čing čhar, hlăm klei kriê pioh. Ênuk aê aduôn pô êlâo dih, hlăm dŭm hrue akŏ yan mnga, knăm mơak huă êsei mrâo, hrue akŏ thŭn snăn amâo mâo dưi kƀah ôh đĭng klông pút, ênai čing čhar, mbĭt hŏng klei muiñ ênhiang djuê ana pô, jing bi kriê pioh knhuah gru djuê ana Xơ Đăng.”

Klei hur har mơ̆ng phung mda asei msĕ hŏng A Bảo, Karôly amâodah A Tùng amâo mâo djŏ knŏng mjing dŭm klei kưt muiñ jăk siam, ƀiădah lŏ bi lar knhuah gru pô hlăm yang ƀuôn. Pê Đoan, jing mnuih buôn H’Ring, tuôm ƀuh leh lu blư̆ amuôn adei ƀuôn sang pô mdah hlăm dŭm hrue knăm mơak, mgei ai tiê blŭ:

“Phung hđeh thâo êdi diñu hlăk kdrăp pĕ tông djuê ana, thâo kriê pioh knhuah gru mơ̆ng aê aduôn hđăp. Diñu khăp snăn diñu hriăm êmăt pral, lehanăn mâo hiu mdah hlăm djăp anôk, jih jang mnuih hlăm ƀuôn mơak snăk.”

Amâo mâo djŏ knŏng hlăm klei hdĭp aguah tlam mlam hrue ôh, mbĭt hŏng dŭm  hrue knăm mơak, msĕ si knăm huă êsei mrâo, jih jang kdrăp pĕ tông mơ̆ng phung mda asei sang kriê pioh dhar kreh Têrêsa mdah jing leh klei bi mơak, lehanăn mnơ̆ng đru lŏ bi hyuă kjăp hĭn klei thâo bi mguôp hlăm ƀuôn sang. A Vi Voan, khua ƀuôn buôn Kon H’Ring, ƀuôn hgŭm Cư M’gar (Dak Lak), lač:

“Phung hđeh diñu dôk mda sơăi, ƀiădah diñu thâo mpŭ, thâo khăp, bi kriê pioh knhuah gru dhar kreh djuê ana pô, thâo tông čing, tông kŏk t’rưng, klông pút, ting ning… Buôn sang hmei bŏ hŏng klei mơak, kyua phung hđeh thâo lŏ bi lar, kriê pioh dhar kreh mơ̆ng aê ama pô đưm.”

Mơ̆ng dŭm klei dôk hriăm mjuăt bŏ hŏng klei hur har ti sang kriê pioh knhuah gru dhar kreh Têrêsa hlŏng truh kơ dŭm klei hiu mdah hlăm dŭm knăm mơak ƀuôn sang, phung mda asei djuê ana Xơ Đăng lŏ dơ̆ng kuč klei thâo khăp kơ dhar kreh djuê ana kơ phung hđeh gưl mrâo. Anăn yơh jing klei thâo khăp, jing bruă klam, jing klei êpa mhao čiăng kơ đĭng klông pút, t’rưng, ting ning, čing čhar... Kwang nanao, čiăng kơ dhar kreh djuê ana Xơ Đăng lŏ dơ̆ng hdĭp kjăp hŏng thŭn mlan./.