Ti knơ̆ng bruă duh bi liê rŭ mdơ̆ng pưk sang Thái Bình (anôk ti Quy Nhơn) êpul êya bruă dôk ba yua giăm 30 boh êdeh êran hŏng pui kmlă ngă bruă hiu čhưn ênguê ti Quy Nhơn, bruă kăp ksiêm, lŏ mkra wĭt mâo ngă nanao. Hồ Thanh Khiết, Khua kiă kriê anôk bruă anei brei thâo, jih jang êdeh mâo ksiêm dlăng kjăp, čiăng pral dưi thâo ƀuh, mghaih msir mtam ti anôk jhat, rơ̆ng dưi mâo klei êđăp ênang tơdah mdiăng tue hiu čhưn.

 “Knơ̆ng bruă mâo leh sa êpul kăp mkra truăn lehanăn mâo êpul bi đru. Tơdah êdeh jhat snăn mâo klei hưn mtam čiăng kơ knơ̆ng bruă tiŏ nao êpul kăp mkra nao mkra mtam. Bitơdah mkra amâo mâo thâo, snăn brei êdeh anăn amâo lŏ dưi êran ôh, lehanăn lŏ mlih mă êdeh mkăn. Hnơ̆ng êđăp ênang jing brei mâo nanao klei kăp ksiêm pui mtrang mngač, pre jing dua mta anôk yuôm bhăn hĭn kơ klei êđăp ênang êdeh.”

 Ti dŭm êpul bruă kăp dŭ mdiăng prŏng snăn bruă kăp ksiêm êdeh bi êran hŏng pui kmlă ăt mkŏ mjing kjăp mơh. Lê Hùng Thịnh, K’iăng khua knŏng bruă Sun Taxi ti Bình Định brei thâo, bruă ksiêm dlăng êdeh êdâo mâo ngă nanao hlăm grăp hrue, lehanăn mkra jêñ jêñ bi djăp ênoh čuăn kjăp.

 “Hlăm klei mdiăng tue grăp hrue, tơdah ayŏng adei bi mlih mmông mă bruă, tŭ mă êdeh êlâo kơ nao mă bruă, snăn mâo pô kăp ksiêm êdeh êdâo lŏ ksiêm hĕ pre, volang lehanăn jih jang dŏ mkăn mơ̆ng êdeh. Phung kăp ksiêm êdeh dôk kiă kriê kăp mă bruă nanao hrue mlam čiăgn bi pral mkra mtam tơdah mâo êdeh jhat, lehanăn mtă mtăn kơ tue đĭ bi hlue gưl ênŭm klei êđăp ênang đuĕ hiu.”

Hŏng êpul mgăt êdeh, klei êđăp ênang hlăm jih kdrêč êlan pô đuĕ hiu ba klei jăk kơ tue đĭ yơh jing tal êlâo. Phan Tấn Duy, sa čô mgăt êdeh êran hŏng pui kmlă mdiăng tue hiu čhưn lač, êlâo kơ mdiăng tue, pô mgăt êdeh ksiêm dlăng hĕ jih jang kdrăp yua hlăm êdeh êdâo, lehanăn mtă mtăn kơ phung đĭ hyuă hĕ klei krơ̆ng êđăp ênang djŏ hŏng mta mtrŭn. Phan Tấn Duy brei thâo:

 “Êlâo kơ mgăt êdeh tal êlâo jing ksiêm dlăng hĕ êdeh, dlăng pui mtrang mngač, pre, pông êdeh, tơdah êđăp ênang leh snăn kơh pô mgăt êdeh kbiă kơ tač, nao mdiăng tue. Snăn leh tuĕ đĭ mâo mtam klei mtă mtăn brei hyuă hĕ klei krơ̆ng bi kjăp, dôk bi khuăt hlăm êdeh, lehanăn ăt kăn mdiăng mnuih êgao hnơ̆ng rei, kyua klei êđăp ênang hlăm êlan klông yơh jing tal êlâo hĭn”.

Ară anei hlăm čar Gia Lai mâo 3 knơ̆ng bruă duh mkra ngă bruă pioh mdiăng tue hiu čhưn ênguê hŏng ênoh truh 119 boh êdeh. Leh mâo anôk bruă mâo klei dưi ksiêm dlăng, dŭm anôk ngă bruă mâo mkăp brei leh hră dưi mă bruă djăp klei kčah mtrŭn kơ klei êđăp ênang. Bruă mâo klei čŏng kăp ksiêm, mkra wĭt êdeh êdâo amâo mâo djŏ knŏng đru krơ̆ng kơ klei êđăp ênang kơ tue hiu čhưn, ƀiădah lŏ mđĭ hnơ̆ng jăk klei mă bruă kơ êpul êya pô mjing k’hưm prŏng hlăm klei mă bruă, ba klei jĕ giăm jăk hŏng tue hiu čhưn, bi êdah klei thâo lehanăn mbruă hlăm bruă hiu čhưn ênguê krĭng êa ksĭ Quy Nhơn kơ yan srăng mâo lu mnuih hiu čhưn tinăp./.