VOV4.Êđê - Ka mâo ôh sa mlan mơ̆ng hruê bluh đĭ, klei ruă ti gŭ klĭt hlăm êmô kbao ti čar Gia Lai đĭ lar truh kơ 35 să, ƀuôn hgŭm, wăl krah ti 7 alŭ wăl hlăm čar. Anôk bruă mdrao mgŭn kơ mnơ̆ng rông čar Gia Lai brei thâo, tĭng truh kơ hruê 23/6, hlăm alŭ wăl mâo 846 drei êmô kbao hlăm 500 gŏ sang ti 35 să hlăm 6 kriêk lehanăn ƀuôn prŏng Pleiku mâo klei ruă.

Hlăm anăn mâo 31 drei djiê, ngă hmăi truh kơ dŭm êtuh êklăk prăk. kdriêk Čư̆ Sê mâo 10 anôk mâo klei ruă lehanăn kdriêk Krông Chro mâo 10 anôk mâo klei ruă jing dŭm alŭ wăl mâo klei ruă bluh đĭ pral hĭn. Anôk bruă mdrao mgŭn kơ mnơ̆ng rông čar Gia Lai hrăm mbĭt leh hŏng dŭm alŭ wăl mtrŭt mjhar kơ mnuih ƀuôn sang blei lehanăn tlŏ mgang êbeh 500 hnơ̆ng vaccine gang mkhư̆ klei ruă anei hlăm êmô kbao, brei êbeh 4.000 lĭt êa drao bi mdoh mdjiê kman kơ dŭm anôk mâo klei ruă. Anôk bruă mdrao mgŭn kơ mnơ̆ng rông čar Gia Lai lač, klei ruă anei srăng mâo klei bluh đĭ ktang hĭn, kyuanăn mnuih ƀuôn sang srăng ngă dŭm hdră êlan gang mkhư̆, mdrao klei ruă kơ jih jang mnơ̆ng rông jing êmô kbao.