VOV4.Êđê- Sa anôk mâo klei ruă bŏk hlăm klĭt êmô, kbao ti să Đăk Djrăng, kdriêk Mang Yang, Gia Lai. Klă klơ̆ng, hruê 28-5, mâo 19 drei êmô mơ̆ng 12 gŏ êsei ti ƀuôn Brêp leh anăn Đê Rơn ti să Đăk Djrăng, kdriêk Mang Yang) mâo dŭm klei bi knăl mâo êa dŭng, êa ală, mâo dŭm anôk bŏk hlăm akŏ, tian, jơ̆ng, êngoh hlơr 40 độ C leh anăn amâo đei ƀơ̆ng mnơ̆ng. Anôk bruă rông mnơ̆ng leh anăn mdrao mgŭn čar Gia Lai mă mta ksiêm mkă mơĭt kơ Anôk bruă mdrao kơ mnơ̆ng rông krĭng 5 čiăng ksiêm mkă. Hruê 31-5, klei tŭ ksiêm mkă brei ƀuh, mâo 2 mta mâo klei ruă bŏk hlăm klĭt. Truh tlam 1/6, ênoh êmô mâo klei bi knăl đĭ truh 27 drei, ti 20 gŏ sang. Bruă sang čư̆ êa alŭ wăl hưn mdah leh krĭng klei ruă tưp bŏk hlăm klĭt êmô, kbao jing să Đăk Djrăng, să pŏk ngă leh dŭm hdră mjêč čiăng gang mkhư̆ klei tưp lar, hmaĭ truh kơ klei suaih pral mnơ̆ng rông.

Mnuih ƀuôn sang ba čuh dơr êmô kbao mâo klei ruă djiê

Klei ruă tưp hlăm dŭm mnơ̆ng rông ti čar Kon Tum ăt dôk ngă lu klei hmăi amâo jăk kơ mnuih rông. Hlăm 2 să knông lăn Dak Ñong lehanăn Dak Plô ti kdiêk Dak Glei, čar Kon Tum, ară anei mâo giăm 200 drei êmô, kbao djiê kyua klei ruă mâo kman bi aklŏ êrah. A Mon, k’iăng khua bruă sang čư̆ êa să Dak Plô, kdiêk Dak Glei, čar Kon Tum brei thâo, mơ̆ng hruê 11 - 31/5 hlăm 3 alŭ hlăm să, jing: Dak Book, Pêng Lang lehanăn Bung Tôn mâo 69 drei êmô, kbao djiê lehanăn knŭk kna iuê mthưr leh bruă brei čuh rai. Boh phŭn klei djiê anei dưi bi mklă mơ̆ng knơ̆ng bruă lŏ hma ti kdriêk jing mâo kman bi klŏ êrah. Ti anăp klei djêi êmô, kbao lu, bruă sang čư̆ êa mtrŭt mjhar kơ mnuih ƀuôn sang mă krư̆ hĕ dŭm drei êmô, kbao dôk lui tha, tlŏ êa drao mgang, ƀiădah klei djiê êmô, kbao ăt dôk lu. Ti čar Kon Tum, klei ruă tưp kơ mnơ̆ng rông dôk dleh dưi ksiêm dlăng lehanăn ngă klei hmăi amâo jăk kơ pô rông. Ară anei, mbĭt hŏng anôk ruă ngă kơ giăm 200 drei êmô, kbao djiê ti 2 să knông lăn Dak Ñong lehanăn Dak Plô ti kdiêk Dak Glei, anôk bruă rông mơ̆ng dhơ̆ng lehanăn anôk bruă mdrao mgŭn kơ mnơ̆ng rông čar lŏ čih yap klei ruă kđuič bŏk gŭ klĭt kơ êmô hlăm 3 kdriêk Kon Plông, Sa Thây lehanăn Ia H’Drai. Êngao kơ anăn, klei ruă tiăn ô̆ eh hlăm ŭn ăt mâo kei hyưt srăng bluh đĭ hlăm grăp mnĭt mmông.

Pô mblang: H’Zawut Ƀuôn Yă - H’Nêč Êñuôl