VOV4.Êđê- Hluê si klei bi mklă mơ̆ng anôk bruă djŏ tuôm, hlăm wưng ti anăp, klei ruă bi bŏk gŭ klĭt êmô, kbao ti Gia Lai huĭ srăng đĭ lar kyua ka dưi ksiêm dlăng ôh kjăp klei ruă anei. Klei ruă bŏk ti klĭt êmô, kbao dưi bi mklă jing tưp lar hluê hŏng dŭm mta mnơ̆ng kĕ đ’điêt ba kman klei ruă kyua anăn lĕ hlăm klei dleh dlan hlăm bruă ksiêm dlăng. Gia Lai jing alŭ wăl mâo ênoh êmô, kbao dôk mrô sa ti krĭng lăn dap kngư lehanăn dôk tal 2 kluôm ala hŏng êbeh 431 êbâo drei. Khădah jing alŭ wăl mâo ênoh êmô, kbao lu, ƀiădah ti krĭng anei rông hluê hdră hliê hluôt hlăm gŏ sang, rông phưi tha lehanăn krĭng rông amâo rơ̆ng klei doh êƀăt, hlăk klei ruă bi bŏk gŭ klĭt anei đĭ lar hluê dŭm mta mnơ̆ng đ’điêt kĕ. Anei jing sa hlăm dŭm klei dleh dlan, gun kpăk kơ hdră gang mkhư̆ klei ruă ti alŭ wăl čar. Kyua anăn, hdră mtô mblang, hưn mthâo čiăng kơ mnuih ƀuôn sang thâo săng kơ klei ruă bi bŏk gŭ klĭt mnơ̆ng rông mơ̆ng anăn mâo hdră gang mkhư̆ jing yuôm bhăn êdi lehanăn brei dưi mtrŭt mđĭ./.

                                                    Pô mblang: H’Nêč Êñuôl