Êpul phung nai êa mdrao mơ̆ng sang êa drao gưl dlông Huế mkŏ mjing hdră mkă dlăng, mdrao klei ruă amâo mâo mă prăk kơ mnuih ƀuôn sang ti dŭm să krĭng taih kbưi čar Lâm Đồng. Mĭn tĭng srăng mâo hlăm brô 2.000 čô mnuih ƀuôn sang dưi dưn boh tŭ mơ̆ng hdră anei.

Klă sĭt, mơ̆ng hruê 6 – 10/8, êpul phung nai êa mdrao anei srăng ngă bruă ti dŭm să Dă Chais leh anăn Đưng Knơ̆, kdriêk Lạc Dương leh anăn Đông Thanh, Phúc Thọ, kdriêk Lâm Hà. Anei jing dŭm alŭ wăl taih kbưi, mâo lu mnuih djuê ƀiă. Mnuih ƀuôn sang srăng dưi mkă dlăng, mă êa drao amâo mâo luč prăk hŏng dŭm mta klei ruă, klei ruă phung hđeh, ală leh anăn ƀăng êgei. Hlăm hdră mkă dlăng klei ruă ti să Đưng Knơ̆, kdriêk Lạc Dương hruê mbruê, êpul dưi mkă dlăng, mbha êa drao kơ giăm 500 čô mnuih ƀuôn sang. Mđup brei 400 hnư mnơ̆ng kơ dŭm gŏ sang knŭk kna dlăng ba, gŏ sang ƀun, gŏ sang dleh dlan hlăm să.