A Hring, mnuih Sedang ti ƀuôn Đăk Manh, să Đăk Rơ Nga, kdriêk Đăk Tô, čar Kon Tum lač: Gŏ sang ñu ăt msĕ hŏng 120 gŏ sang hlăm ƀuôn mâo leh klei hdĭp h’ĭt kjăp, đĭ kyar msĕ ară anei kbiă hriê mơ̆ng klei đru phung knuă druh mtrŭt mjhar bruă ngă lŏ hma mơ̆ng kdriêk wĭt ktrâo lač mnơ̆ng pla djŏ guôp hŏng yan adiê, lăn ala lehanăn ba wĭt klei tŭ dưn. Klei hdĭp đĭ kyar, sa kdrêč kbiă hriê mơ̆ng hdră mtrŭn brei čan prăk hŏng ênoh prăk mnga hdjul mơ̆ng knơ̆ng prăk. Khă snăn, čiăng ba wĭt boh tŭ bruă duh mkra, leh čan prăk, brei ba yua djŏ hdră mơ̆ng klei mkra lăn, ruah mjeh, hbâo pruê, hdră dlăng kriê brei mâo klei mđing. Dŭm gŏ sang hlăm ƀuôn mâo lăn, čan prăk čiăng duh kơ bruă, ƀiădah ngă bruă amâo tŭ dưn kyua ka thâo yua prăk djŏ hdră. Bi gŏ sang ñu mdê, ñu thâo čih klă klơ̆ng ênoh bi liê kơ yan bruă, kñăm ba wĭt klei tŭ dưn. Dŭm hruê anei leh mphŭn hrui pĕ kphê, A Hring pioh leh êbeh 100 êklăk prăk, mâo 50 ton tôn hbâo mnơ̆ng rông, hbâo vi sinh čiăng pruê kơ đang war leh hrui êmiêt.

"Kâo čan knơ̆ng prăk Agribank kdriêk Đăk Tô êbeh 1 êklai prăk, blei mjeh ana ksu, hbâo pruê, blei mjeh makka, hlăk anăn 55 êbâo prăk sa ana. Ară anei kâo mâo 7 ha ksu, 4ha makka, Hlăm thŭn anei, kâo srăng tla jih prăk ti knơ̆ng prăl lŏ dơ̆ng mđĭ kyar bruă duh mkra.

Ăt ti ƀuôn Đăk Manh, gŏ sang A Chăanmao 10 ha ksu, 6 ha kphê, makka. Hlăm wưng hrui pĕ tal êlâo leh êgao, hlăm 4ha makka pla pluă hlăm đang kphê mâo leh 5 ton boh. Hŏng ênoh čhĭ boh mtah grăp ton ti đang 32 êklăk prăk, gŏ sang kâo mâo êbeh 150 êklăk prăk. A Chắc mkra leh sang prŏng, blei êdeh oto lehanăn duh kơ anak čô nao hriăm hră.

“Mâo čan prăk ti knơ̆ng prăk lŏ hma mđĭ kyar kdriêk Đăk Tô kâo blei mjeh makkka, kphê, durian lehanăn dŭm mta mjeh mkăn, blei hbâo pruê, êa drao mdjiê hluăt… Kyua duh djŏ hdră snăn mnuih ƀuôn sang tinei mâo hnư hrui wĭt h’ĭt kjăp, boh nik kyua thâo duh kơ ana kphê anăn mnuih ƀuôn sang mâo djăp ênŭm prăk tla ti knơ̆ng prăk. Dlăng kluôm, mkă hŏng 10 thŭn êlâo klei hdĭp đĭ kyar leh mkă hŏng êlâo.

A Như, khua ƀuôn Pleilay, să Ya Chim, ƀuôn prŏng Kon Tum brei thâo: Pleilay mâo 296 gŏ sang, 960 čô, lu jing mnuih Jarao. Păt čiăng jih ƀuôn dưi čan prăk ti knơ̆ng prăk Agribank čiăng duh kơ bruă pla mjing. A Dit, sa gŏ sang ti Pleilay, mrâo mkra sang giăm 150 êklăk prăk lač:

Kâo jing mnuih Jarai, lač jăk kơ Knơ̆ng prăk brei leh kâo čan 50 êklăk prăk hŏng ênoh prăk mnga hdjul. Kâo duh ênao êa rông kan, pla kphê, tiu, gŏ sang kâo đĭ kyar leh mkă hŏng êlâo. Hrui êmiêt čhĭ tiu mâo ênoh m’ak mơh. Kâo lač jăk kơ knơ̆ng prăk đru leh kơ mnuih ƀuôn sang mâo prăk duh ngă bruă.

Amai Y Cô Viên, ƀuôn Kep Ram, să Hòa Bình, ƀuôn prŏng Kon Tum mâo 2,5 ha ksu, bê 13 drei, 1 ha hbei ƀlang, 8 sao mdiê lŏ 2 yan. Ti đang ksu, hbei, bê, thŭn 2022 amai mâo leh êbeh 80 êklăk prăk. Amai Y Cô Viên brei thâo, ară anei dôk ngă hră m’ar čan 150 êklăk čiăng mkra hjiê dôk pioh mnơ̆ng.

Kâo duh pla ksu, rông bê êmô. Mă prăk blei rơ̆k kơ êmô, dlăng kriê bê, êmô gŏ sang. Tal dua kâo yua prăk anei mdơ̆ng sang čhĭ hbâo pruê. Mă hbâi pruê mơ̆ng anôk bruă ba wĭt čhĭ lehanăn mjing klei găl kơ mnuih ƀuôn sang nao blei găl ênưih hĭn lehanăn mâo ênoh găl mơh čiăng dlăng kriê mnơ̆ng pla. Tal tlâo kâo mdơ̆ng anôk čhĭ mnơ̆ng čiăng lŏ mâo ƀiă prăk hrui wĭt.

Nguyễn Công Thành Phương, k’iăng khua anôk bruă Agribank Kon Tum breo thâo: Prăk brei mnuih djuê ƀiă čan ti knơ̆ng prăk Agribank Kon Tum giăm 650 êklai prăk hŏng êbeh 4 êbâo čô čan. Păt čiăng jih ba yua djŏ mta kñăm kyua anăn dưi mđĭ lar jăk hdră msir klei ư̆ êpa bi hrŏ klei ƀun knap.

“Lu phung čan mkăp yua kơ bruă rông mnơ̆ng, pla mjing. Mbĭt hŏng bruă hluê ngă hdră mtrŭn brei čan hŏng ênoh prăk mnga hdjul, Agribannk Kon Tum lŏ mtô kơ hdră êlan mtrŭn mơ̆ng Đảng, hdră bhiăn mơ̆ng Knŭk kna, hưn dŭm gru hmô jăk, hdră ngă mrâo đru mđĭ klei thâo mơ̆ng mnuih djuê ƀiă./.