Blŭ hrăm ti Anôk bi kƀĭn, Khua bruă kƀĭn ala Trần Thanh Mẫn brei thâo, Klei bi kƀĭn tal 8 mâo lu mta phŭn hĭn hlăm dŭm klei bi kƀĭn mơ̆ng akŏ wưng păn bruă Anôk bruă kƀĭn ala tal 15 truh kơ ară anei. Hluê anăn, Anôk bruă kƀĭn ala srăng ksiêm dlăng 39 mta klei, hlăm anăn mâo 29 mta djŏ tuôm kơ bruă čih mkra klei bhiăn, 10 êpul bruă duh mkra – ala ƀuôn, ngăn prăk knŭk kna, ksiêm dlăng, hdră knuă druh lehanăn dŭm bruă mkăn. Klei bi kƀĭn tal 8, srăng pŏk hlăm hruê 21/10. Tĭng srăng mă bruă hlăm 29 hruê. Klei bi kƀĭn dưi mkŏ mjing 2 gưl.

Klei bi kƀĭn dưi hluê ngă êlâo kơ wưng mkŏ mjing Klei bi kƀĭn 1 mlan čiăng kơ dŭm anôk bruă čih mkra, bi mklă mâo wưng hluê ngă djŏ hŏng Hdră bhiăn; mbĭt anăn kñăm bi trông, bi tŭ ư kơ hdră hlăm klei bi kƀĭn tal 8, boh nik jing dŭm anôk bruă mâo klei blŭ ksiêm dlăng kơ hdră, wưng, hnơ̆ng tŭ jăk hluê si klei kčah mtrŭn, bruă mprăp mta phŭn kơ dŭm klei čih mkra hdră bhiăn, hdră mtrŭn čiăng thiăm mbŏ hlăm klei bi kƀĭn tal 8 hluê hdră khuăt.

Hluê si Khua bruă kƀĭn ala Trần Thanh Mẫn, hlăm wưng êgao, hdră bi hgŭm plah wah Knŭk kna lehanăn dŭm anôk bruă kƀĭn ala ƀrư̆ hruê ƀrư̆ kjăp, klă sĭt lehanăn tŭ dưn, dŭm anôk bruă mđĭ lar leh ai tiê đua klam, mprăp mơ̆ng hnưm, mơ̆ng kbưi, mă bruă jih hruê mlam čiăng mprăp kơ bruă čih mkra hdră bhiăn, hdră mtrŭn ba mdah kơ Anôk bruă kƀĭn ala. Hlăm boh klei ară anei, Khua bruă kƀĭn ala Trần Thanh Mẫn mtă:

 “Angĭn êbŭ mrô 3 mrâo êgao, dleh êdi dưi ksiêm dlăng, ba leh klei truh kjham snăk. Truh kơ ară anei, ka dưi ksiêm yap jih ôh klei luič liê. Kluôm Đảng, jih jang mnuih ƀuôn sang, lĭng kahan lŏ tlă anăp hŏng klei dleh dlan, lông dlăng mrâo. Knŭk kna dôk tlă anăp hŏng klei dleh dlan, klei kpĭ hlăm bruă hrui, bi liê ngăn prăk; hluê ngă mta kñăm mđĭ kyar, rơ̆ng klei hơĭt kjăp bruă duh mkra kluôm, ksiêm dlăng klei prăk luič ênoh lehanăn klei mđĭ ênoh dŭm mta mnơ̆ng dhơ̆ng kñăm rơ̆ng klei hdĭp hơĭt kjăp kơ mnuih ƀuôn sang. Kyua anăn, bruă Đảng êpul bruă kƀĭn ala, Anôk bruă Đảng Knŭk kna srăng bi hgŭm klă sĭt, tŭ dưn, djŏ hŏng klei čiăng hlăm hdră mđĭ kyar bruă duh mkra – ala ƀuôn, rơ̆ng klei hdĭp mnuih ƀuôn sang lehanăn hdră mđĭ kyar”.

          Leh hmư̆ dŭm klei blŭ bi trông, blŭ hrăm mơ̆ng phung khua phŭn bruă, khua dhar bruă, khua Êpul hgŭm djuê ana, dŭm dhar bruă mơ̆ng Anôk bruă kƀĭn ala, Khua knŭk kna Phạm Minh Chính čih yap myuôm klei bi hgŭm mơ̆ng Anôk bruă Đảng êpul bruă kƀĭn ala lehanăn Anôk bruă knuă druh Đảng knŭk kna ƀrư̆ hruê ƀrư̆ jăk hĭn; brei thâo klei bi kƀĭn kñăm ksiêm dlăng bruă dôk kpăk gun, brei bi mklă mbĭt čiăng mtrŭt mđĭ hnơ̆ng tŭ klei bi kƀĭn. Kyua anăn, Khua knŭk kna mtă kơ dua nah brei mâo klei bi hgŭm kjăp mơ̆ng bruă čih mkra hdră bhiăn, hdră mtrŭn. Khua knŭk kna ăt mtă kơ dŭm Phŭn, dhar bruă lŏ dơ̆ng bi hgŭm kjăp, tŭ dưn hŏng Êpul hgŭm djuê ana, dŭm Dhar bruă mơ̆ng Anôk bruă kƀĭn ala:

 “Êngao kơ bruă hluê ngă bi sĭt dŭm hdră mtrŭn mơ̆ng Đảng. Brei drei lŏ dơ̆ng mlih mrâo klei mĭn hlăm bruă čih mkra hdră bhiăn, mơ̆ng bruă knŏng mđing kơ hdră kriê dlăng, ară anei brei mđing bi kjăp jih jang hdră kriê dlăng kñăm ba wĭt boh tŭ dưn, ƀiădah ăt rơ̆ng kjăp klei đĭ kyar. Kâo ƀuh brei mlih mrâo hlăm anôk bruă čih mkra, bi mklă. Hluê hŏng anăn srăng dưi dưn yua jih klei găl mâo. Ară anei, mnuih mă bruă dôk kƀah. Brei drei mđing kriê dlăng jăk tal êlâo hĭn. Khă snăn, brei drei thâo pŏk mlar wăl anôk mrâo, mjing boh kdrŭt mđĭ kyar, tui duah djăp klei găl mâo hlăm ala ƀuôn, mnuih ƀuôn sang”.

Khua knŭk kna lač, tui hluê hŏng mdê bi klei čih mkra hdră bhiăn drei dưi ba mdah dŭm klei kčah mtrŭn klă klơ̆ng, hŏng dŭm bruă dleh dưi ksiêm dlăng, mâo klei hmăi prŏng. Bruă čih mkra hdră bhiăn brei hluê ngă hŏng ai tiê klă mngač, ti dŏ klă, kluôm, dưi hluê ngă, dưi bi mklă jing djŏ, hluê ngă tŭ dưn lehanăn lu mnuih sa ai srăng jing hdră bhiăn. Bi dŭm bruă ka klă, ka kluôm, ka sĭt dôk dleh dưi ksiêm dlăng, snăn dưi lông ngă, ngă êjai mă klei hriăm êjai, ƀrư̆ ƀrư̆.

Klah čŭn ti anôk bi kƀĭn, Khua bruă kƀĭn ala Trần Thanh Mẫn mtă, dŭm anôk bruă čih mkra brei mơĭt hră mơar truh kơ Anôk bruă kƀĭn ala êlâo kơ hruê 1/10, hlăm anăn mđing kơ 6 mta phŭn ba mdah ti 1 klei bi kƀĭn brei rơ̆ng boh tŭ dưn./.